2 Bakyabazinga 22 - Baibuli Ekibono kya Katonda 2014

Kyabazinga Yosia owa Buyudaaya

¹ Yosia yali agheza emyaka munaana egy'obukulu ghe yafuukira kyabazinga wa Buyudaaya. Era yaafuga okumala entangama ya myaka amakumi asatu na mulala (31) mu Yerusalemu. Inhina yali ayetebwa Yedida, mughala wa Adaia ow'e Bozikathi.

² Yosia yaakolanga ebituufu Musengwa Katonda by'asiima, yaajiira ku mpisa ng'edha dhaadha we Daudi, yaaloba kukyuka kudhireka kwira eno oba ere.

Ekitabo eky'Amateeka bakizuula

³ Kyabazinga Yosia, mu mwaka gwe ogweikumi n'omunaana nga n'afuga Buyudaaya, yaatuma omughandiisi we Shafani, mutabane wa Azalia era mwidhukulu wa Meshullamu, aje mu isinzizo lya Musengwa Katonda, ng'amukoba ati:

⁴ “Ja eri Hilikia Omukulu wa Bakabona, omukobe abale empiiya abaigazi b'omulyango ogwingira mu isinzizo dhe basoloizaagho ku bantu.

⁵ Badhighe abasaadha abalabirira omulimo ogw'okulongoosa eisinzizo, ate abo badhisasule

⁶ ababaadhi, n'abazimbi, n'abatemi b'amabaale, era baguleku embaawo n'amabaale amateme okulongoosa eisinzizo.

⁷ Aye empiiya edhinaagemesebwa abasaadha abo, tidhiidha kwetaagisa kubalirirwa kubona bwe dhikozeseibwa, kuba bakola na bwesigwa.”

⁸ Agho Hilikia Omukulu wa Bakabona yaakoba Shafani omughandiisi ati: “Nzwire ekitabo ky'Amateeka mu isinzizo.” Yaakigha Shafani, yaakisoma.

⁹ Shafani oyo yairayo eri kyabazinga, yaamukobera ati: “Abagheereza bo batoireyo empiiya dhoonadhoona dhe baagaine mu isinzizo, baadhigemya abasaadha abali ku gw'okulongoosa eisinzizo lya Musengwa Katonda eryo.”

¹⁰ Era Shafani yaakoba kyabazinga ati: “Hilikia kabona ampaire ekitabo.” Yaakisomeramu kyabazinga.

¹¹ Agho kyabazinga bwe yawulira ebyasomwa mu kitabo ky'Amateeka, yaakanulamu ebivaalo bye olw'okunakughala.

¹² Yaagha ekiragiro eri Hilikia kabona, ni Ahikamu mutabane wa Shafani, ni Akabori mutabane wa Mikaia, ni Shafani omughandiisi, ni Asaia omugheereza wa kyabazinga. Yaabakoba ati:

¹³ “Muje mubuuze Musengwa Katonda ku lwange ni ku lw'abantu boonaboona ab'omu Buyudaaya, ebigema ku ebyo ebyaghandiikibwa mu kitabo kino ekizuuliibwa. Obusungu bwa Musengwa Katonda buli kututumbukiraku ng'oti muliro, kuba badhaadha baife tibaagondera bibono ebyo ebiri mu kitabo kino, ni babikoleraku nga bwe byali n'okukolerwaku.”

¹⁴ Agho Hilikia kabona, ni Ahikamu, ni Akabori, ni Shafani, ni Asaia, baaja eri Huluda omulanzi omukazi, muka Shallumu. Shallumu oyo yali mutabane wa Tikava era mwidhukulu wa Harahasi. Omukazi oyo yabanga mu kiketezo ekiyaaka ekya Yerusalemu, era nga iba oyo Shallumu n'akuuma eiterekero ly'ebivaalo eby'omu isinzizo. Agho baayogera n'omukazi oyo ku nsonga eyo.

¹⁵ Yaabakoba ati: “Musengwa Katonda wa Isiraeli akoba ati, ‘Omuntu abatumye ye ndi mumukobe muti,

¹⁶ Musengwa Katonda akoba ati, akabi akoogerwaku mu kitabo kino kyabazinga wa Buyudaaya ky'asomye, nja kukatuusa ku kifo kino ni ku bantu baamu.

¹⁷ Nga bwe banviireku ni baniokeza obubbaani eri emisambwa, ni bansungughaza n'ebyo byonabyona bye bakoze, obusungu bwange bwidha kutumbukira ku kifo kino ng'oti muliro, era tibulizikira.

¹⁸ Aye kyabazinga wa Buyudaaya, abatumye okuneebuuzaaku, mumukobe muti nze Musengwa Katonda wa Isiraeli nkoba nti, bw'owuliire ebyo ebighandiikiibwa mu kitabo ekyo,

¹⁹ weeneniiza era weewombeeka mu maiso gange. Era okanwiremu ebivaalo byo olw'okunakughala era waalira amaziga, bw'owuliire ebyo bye nayogera ku kifo kino ni ku bantu abakibaamu, nga bwe balizikirira ni bafuuka ekibono abantu kye bakozesa okukolima. Kale ni mpuliire okusaba kwo.

²⁰ Ndikutwala weeyimba ku badhaadha bo abaafa, waaziikibwa mu miraala. Era tolibona ku kabi ke ndituusa ku kifo kino.’ ” Agho abasaadha bairayo baakobera kyabazinga ebibono ebyo.