2 Bakyabazinga 21 - Baibuli Ekibono kya Katonda 2014

Kyabazinga Manasse owa Buyudaaya

¹ Manasse yali agheza emyaka ikumi n'ebiri egy'obukulu ghe yafuukira kyabazinga wa Buyudaaya, era yaafuga okumala entangama ya myaka amakumi ataanu n'etaanu (55) mu Yerusalemu. Inhina yali nga ni Hefuziba.

² Manasse oyo yaakolanga ebibi eri Musengwa Katonda, ng'ajiira ku mpisa edheenhinhalwa edh'abamaghanga agandi Musengwa Katonda oyo be yabinga mu nsi eyo ng'Abaisiraeli bali kumpi okutuukayo.

³ Yaazimba buyaaka ebifo ebigulumivu eby'okusinzizaamu, lata we Hezekia bye yali azikiriiza. Yaataagho alutaari edh'okusinzizaaku omusambwa Baali, era yaakola ekifaananie eky'omusambwa omukazi Ashera, nga kyabazinga Ahabu owa Isiraeli bwe yakola. Yaasinzanga eby'oku igulu byonabyona era yaafuuka mugheereza waabyo.

⁴ Yaazimba alutaari mu isinzizo Musengwa Katonda lye yayogeraku ati: “Mu Yerusalemu mwe banansinzizanga.”

⁵ Era yaazimbira eby'oku igulu byonabyona alutaari mu mpya eibiri edh'eisinzizo lya Musengwa Katonda.

⁶ Yaayokya mutabane we ng'ekigheebwayo ekyokebwa, yaajanga mu balaguzi ni mu basamize, era yaakolanga eby'obulogo n'eby'emizimu. Yaakolanga inho ebibi eri Musengwa Katonda, yaamuleetera okusungughala.

⁷ Yaata mu isinzizo ekifaananie eky'omusambwa omukazi Ashera kye yabaadha. Ate nga eisinzizo eryo Musengwa Katonda lye yakoba Daudi ni mutabane we Solomoni ati: “Mu isinzizo lino eriri mu kibuga Yerusalemu kye nalondamu mu bibuga byonabyona eby'ebika bya Isiraeli, mwe banansinzizanga enaku dhoonadhoona.

⁸ Era tiriirayo kutoola Baisiraeli mu nsi ye nagha badhaadha baibwe, ni mbaleetera kutambulatambula eyo batyo, kasita banaatangayo omwoyo okukola byonabyona bye nabalagira, n'okukuuma amateeka goonagoona n'ebiragiro omugheereza wange Musa bye yabagha.”

⁹ Aye abantu baaloba kugondera Musengwa Katonda, era Manasse yaabasendasenda yaabaleetera okukola ebibi okusinga n'abantu abamaghanga agandi bye baakola, Musengwa Katonda be yazikiriza ng'Abaisiraeli bali kumpi okutuuka yo.

¹⁰ Agho Musengwa Katonda ng'abita mu bagheereza be abalanzi, yaakoba ati:

¹¹ “Kyabazinga Manasse owa Buyudaaya akoze ebyenhinhalwa ebyo, era yaakola ebibi ebisinga ebyo byonabyona Abamori abaamusooka bye baakola. Mu nsambo eyo aleeteire n'ab'omu Buyudaaya okwonoona nga basinza ebitali Katonda bye yataagho.

¹² N'olw'ekyo nze Musengwa Katonda wa Isiraeli, nkoba nti, ndidha kuleeta akabi ku Yerusalemu ni ku Buyudaaya, kiisi anaakawulirangaku amatu ge gamuwaawaalenga buwaawaale.

¹³ Ndibonereza Yerusalemu ng'oti bwe nabonereza Samaria, era ng'oti bwe nabonereza kyabazinga Ahabu owa Isiraeli n'ab'endhu ye. Ndisaaniagho abantu mu Yerusalemu, ng'oti n'omuntu bw'asiimuula esowaani n'agikaza, ate n'amala n'agifundika.

¹⁴ Ndirekulira agho abantu bange abaliwonagho, naabaghaayo mu ngalo dh'abazigu baibwe, baabeegabula era baabafuula omunhago gwaibwe.

¹⁵ Abantu bange abo ndibakola ekyo, kuba baakola ebibi ye ndi bansungughaza, okuviira irala ku lunaku badhaadha baibwe lwe baaviiraku e Misiri n'okutuusa ni ye buli eno.”

¹⁶ Kyabazinga Manasse yaita abantu kamaala inho abaziraku musango, yaidhuza Yerusalemu kyonakyona omusaayi kyabuna. Okwo yaayongeraku ekibi eky'okuleetera ab'omu Buyudaaya okukola ebibi eri Musengwa Katonda.

¹⁷ Ebindi byonabyona Manasse bye yakola n'ebibi bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

¹⁸ Agho Manasse yaafa yeeyimba ku badhaadha be abaafa, era yaaziikibwa mu nimiro y'omu kisaagaati kya kyabazinga, eyetebwa eya Uzza. Mutabane we Amoni yaamusikira ku bwakyabazinga.

Kyabazinga Amoni owa Buyudaaya

¹⁹ Amoni yali agheza emyaka amakumi abiri n'ebiri egy'obukulu ghe yafuukira kyabazinga wa Buyudaaya, era yaafuga okumala entangama ya myaka ebiri mu Yerusalemu. Inhina yali nga ni Meshullemethi, mughala wa Haruzi ow'e Yotiba.

²⁰ Amoni oyo yaakolanga ebibi eri Musengwa Katonda, nga lata we Manasse bye yakolanga.

²¹ Yaajiiranga ku mpisa dha lata we, yaasinzanga ebitali Katonda lata we oyo bye yasinzanga, era yaabikubiranga amakiryaivu.

²² Yaava ku Musengwa Katonda, Katonda wa badhaadha be, yaaloba kugema biragiro bye naire.

²³ Agho abakungu be baamukolera olukwe, baamutemulira mu kisaagaati kye eky'obwakyabazinga.

²⁴ Aye abantu ab'omu Buyudaaya baita abo boonaboona abaakolera Amoni oyo olukwe, era baataagho mutabane we Yosia yaamusikira ku bwakyabazinga.

²⁵ Ebindi byonabyona Amoni bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

²⁶ Agho Amoni baamuziika mu magombe ge mu nimiro eyetebwa eya Uzza. Mutabane we Yosia yaamusikira ku bwakyabazinga.