2 Bakyabazinga 20 - Baibuli Ekibono kya Katonda 2014

Hezekia alwala aye yaamala yaawona

¹ Agho mu biseera ebyo, Hezekia yalwala inho kumpi afe. Omulanzi Isaia mutabane wa Amozi yaajaayo okumubona, yaamukoba ati: “Musengwa Katonda akoba ati, ‘Tegeka eby'omu ndhu yo bukalamu, kuba oja kufa, toidha kuwona.’ ”

² Agho Hezekia yaakyuka yaalinga eri ekimante, yeeghemba Musengwa Katonda ng'akoba ati:

³ “Wo Musengwa Katonda, nkweghemba oidhukire nga bwe mbairenga omwesigwa y'oli, nga ngondera by'ondagira n'omwoyo mulala, era nga nfuba buliidho okukola by'osiima.” Hezekia oyo yaatimbuka, yaalira inho amaziga.

⁴ Agho Isaia bweyali ava aghali kyabazinga, aye ng'akaali na kubita mu luya olwa ghagati, Musengwa Katonda yaayogera naye.

⁵ Yaamukoba okwirayo akobe Hezekia omukulembeze w'abantu ba Musengwa Katonda oyo ati: “Musengwa Katonda, Katonda wa Daudi dhaadha wo akoba ati, ‘Mpuliire ky'onsabye era naabona n'amaziga go. Kale ni bona, ndidha kukuwonia, era ku lunaku olwokusatu oidha kuja mu isinzizo.

⁶ Ndidha kwongera emyaka ikumi n'etaanu ku bulamu bwo. Era ndidha kukuwonia iwe n'ekibuga kino Yerusalemu, nkutoole mu ngalo dha kyabazinga w'e Assiria. Ndidha kulwaniriranga ekibuga kino olw'ekitiibwa kyange n'olw'ebyo bye nasuubiza omugheereza wange Daudi.’ ”

⁷ Agho Isaia yaakoba ati: “Muleete ekitole ky'ebibala ebikaziibwa eby'emitiini, mutoolekuuku, muteeku ku ibwa lya Hezekia, asobole okuwona.”

⁸ Agho Hezekia yaabuuza Isaia ati: “Kamanhiso ki akanaakakasa nga Musengwa Katonda aidha kumponia, era nga ku lunaku olwokusatu nnaasobola okuja mu isinzizo?”

⁹ Isaia yairamu ati: “Musengwa Katonda aidha kukugha akamanhiso akakakasa ng'aja kutuukiriza ekyo ky'akobye. Mpegaano londaku ky'oyenda: Oyenda ekinsense kije emberi obuleeyi bwa bigere ikumi, oba kiire einhuma obuleeyi bwa bigere ikumi?”

¹⁰ Hezekia yairamu ati: “Kiba kyangu okuja emberi obuleeyi obw'ebigere eikumi. Aye kireke kiire einhuma obuleeyi obw'ebigere eikumi.”

¹¹ Isaia yaasaba Musengwa Katonda, era Musengwa Katonda oyo yaizaayo ekinsense einhuma ebigere ikumi, ku lupimo olw'amadaala kyabazinga Ahazi lwe yakola.

Abakwenda abaava e Babilonia

¹² Mu biseera ebyo, kyabazinga w'e Babilonia ng'ayetebwa Merodaki Baladani, mutabane wa Baladani, yaawulira nga Hezekia bweyali alwaire. Agho yaamughandiikira embaluwa, yaagigha abakwenda baagitwala, baatwaliraku n'ekirabo.

¹³ Hezekia yaabasangaalira, yaabalaga eby'obukombe bwe byonabyona ebyali mu iterekero: feeza, zaabu, obuwoowo, omuzigo ogw'omughendo einho, eby'okulwanisa, ni byonabyona ebyali mu materekero ge. Ghazira kintu waire ekirala kiti ekyali mu kisaagaati kye eky'obwakyabazinga oba mu bwakyabazinga bwe bwonabwona, ky'ataabalaga.

¹⁴ Agho Isaia omulanzi yaidha eri kyabazinga Hezekia, yaamubuuza ati: “Abasaadha bano baviiriire gha okwidha y'oli era bakobye ki?” Hezekia yairamu ati: “Baviire mu nsi ey'eghala, e Babilonia.”

¹⁵ Era Isaia yaabuuza ati: “Baboine ki mu kisaagaati kyo eky'obwakyabazinga?” Hezekia yairamu ati: “Baboine ebiri mu kisaagaati kyange eky'obwakyabazinga byonabyona, ghazira kintu kiri mu materekero gange kya ntabalaze.”

¹⁶ Isaia yaakoba Hezekia ati: “Wulira Musengwa Katonda ky'akoba:

¹⁷ ‘Manha ng'ekiseera kiidha kutuuka, byonabyona ebiri mu kisaagaati kyo eky'obwakyabazinga, n'ebyo badhaadha bo bye baatereka okutuusa buti, babitwale e Babilonia. Tighalibaagho waire ekirala kiti ekirisigalagho.

¹⁸ N'abandi ku batabane bo beene, balibatwala baabalaawa, baafuuka bagheereza ba mu kisaagaati ekya kyabazinga w'e Babilonia.’ ”

¹⁹ Agho Hezekia yaakoba Isaia ati: “Musengwa Katonda by'ayogeire birungi.” Hezekia yakoba atyo, kuba yalowooza mule ati: “Bisobola bitya obutaba birungi, ng'ate ghaja kubaagho miraala na butebenkevu mu biseera byange?”

Enkomerero y'obufuzi bwa Hezekia

²⁰ Ebindi byonabyona Hezekia bye yakola, omuli n'eby'amaani bye yakola, n'ensambo ye yasimamu ensulo n'omweta n'aingiza amaadhi mu kibuga, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

²¹ Agho Hezekia yaafa, yeeyimba ku badhaadha be abaafa. Mutabane we Manasse yaamusikira ku bwa kyabazinga.