2 Bakyabazinga 2 - Baibuli Ekibono kya Katonda 2014

Eliya atwalibwa mu igulu

¹ Agho ekiseera nga kiri kumpi okutuuka Musengwa Katonda atwale Eliya mu igulu, ng'amutwalira mu mpewo eyeezungulula n'amaani, Eliya oyo ni Elisha baali nga bali kuva Giligali.

² Agho Eliya yaakoba Elisha ati: “Nkweghemba osigale ghano, kuba nze Musengwa Katonda antumye nje ntuuke e Betheli.” Aye Elisha yaakoba ati: “Ndayira mu Musengwa Katonda omulamu era weena nga bw'oli omulamu nti tiidha kukuleka.” Kale baaja e Betheli.

³ Agho ekikunsu eky'abalanzi abaali e Betheli baidha ye Elisha, baamubuuza bati: “Okiidhi nga Musengwa Katonda olwaleero aja kukutoolaku musengwa wo amutwale?” Elisha yairamu ati: “Yii, nkiidhi. Imwe mwesirikire.”

⁴ Agho Eliya yaakoba Elisha ati: “Elisha, nkweghemba osigale ghano, kuba nze Musengwa Katonda antumye e Yeriko.” Aye Elisha yaakoba ati: “Ndayira mu Musengwa Katonda omulamu era weena nga bw'oli omulamu nti tiidha kukuleka.” Kale baaja e Yeriko.

⁵ Agho ekikunsu eky'abalanzi abaali e Yeriko baaseeta ye Elisha, baamubuuza bati: “Okiidhi nga Musengwa Katonda olwaleero aja kukutoolaku musengwa wo amutwale?” Elisha yairamu ati: “Yii, nkiidhi. Imwe mwesirikire.”

⁶ Agho Eliya yaakoba Elisha ati: “Nkweghemba osigale ghano, kuba nze Musengwa Katonda antumye nje ku mwiga Yorudani.” Aye Elisha yaakoba ati: “Ndayira mu Musengwa Katonda omulamu era weena nga bw'oli omulamu nti tiidha kukuleka.” Kale bombi beeyongerayo,

⁷ baatuuka baayemerera ku mbali kw'omwiga Yorudani. Abalanzi amakumi ataanu okuva mu kikunsu ky'abalanzi, boona baaja, baayemerera nga ghakaalighooku akata okutuuka ku Eliya ni Elisha.

⁸ Agho Eliya yaagema ekivaalo kye, yaakizingamu, yaakikozesa okukuba ku maadhi, amaadhi geegabamu ghabiri ku luuyi ni ku luuyi, bombi baasomoka nga babita ku itaka ikalu.

⁹ Bwe baamala okusomoka, Eliya yaakoba Elisha ati: “Saba kye mbe nkukolere nga bakaali kuntwala kukuvaaku.” Elisha yairamu ati: “Nkusaba onganhe nfune omugabo gwa mikuzi ebiri ogw'omwoyo gwo.”

¹⁰ Eliya yaamukoba ati: “Ky'osabye kikalangufu. Aye bw'onambona nga bali kuntwala okukuvaaku, oidha kukifuna. Aye bw'otambone, toidha kukifuna.”

¹¹ Bwe baali nga bakaatambula nga bwe baghaya, amangu ago ghaidhagho ekigaali eky'omu lutalo eky'omuliro n'embalaasi edh'omuliro, byayawula buli muntu ku mwine, Eliya yaatwalibwa ghaigulu ng'ali mu mpewo eyeezungulula n'amaani.

¹² Elisha yaakibona, era yaaleekaana ati: “Lata wange, lata wange! Iwe ow'amaani ng'oti n'ebigaali eby'omu lutalo n'embalaasi ebirwanirira Isiraeli!” Yaalekera agho okumubona. Agho Elisha oyo yaagema ebivaalo ebibye, yaabikanulamu ghabiri olw'okunakughala.

¹³ Yaalonda ekivaalo ekyava ku Eliya ni kigwa, yairayo, yaayemerera ku mbali kw'omwiga Yorudani.

¹⁴ Yaakozesa ekivaalo ekyava ku Eliya ni kigwa, yaakuba ku maadhi ng'akoba ati: “Musengwa Katonda, Katonda wa Eliya, ali gha?” Bwe yakuba ku maadhi, geegabamu ghabiri ku luuyi ni ku luuyi, Elisha oyo yaasomoka.

¹⁵ Abalanzi abaali e Yeriko bwe baamubona, baakoba bati: “Obuyinza bwa Eliya buli ku Elisha.” Agho baidha okumweisuusaayo, era baakuba amakiryaivu agho mu maiso ge,

¹⁶ baamukoba bati: “Bona eno, ife abagheereza bo tuli ghano n'abasaadha amakumi ataanu ab'amaani. Tukweghemba obaganhe baje, baagale musengwa wo. Kisoboka okuba nti omwoyo gwa Musengwa Katonda gwamubbeedie gwamuta ku lusozi, oba mu kiiko.” Elisha yaabairamu ati: “Busa, mutabatuma.”

¹⁷ Aye baayongera okumupikiriza okutuusa ensoni lwe dhaamugema n'akoba ati: “Kale mubatume.” Agho baatuma abasaadha amakumi ataanu, baayagala Eliya okumala enaku isatu, aye baalemwa okumubona.

¹⁸ Agho baira ye Elisha ng'abateegereire e Yeriko, yaabakoba ati: “Nze tyabakoba nti mutaja?”

Ebyewuunhio Elisha bye yakola

¹⁹ Agho abandi ku basaadha ab'omu kibuga Yeriko baaja ye Elisha, baamukoba bati: “Isebo, ekibuga kino kiri ghalungi, nga weena bw'oli kubona. Aye amaadhi gaagho mabi, n'eitaka tiribaza mere.”

²⁰ Elisha yaakoba ati: “Mute omuunhu mu kibya ekiyaaka, mukindeetere ghano.” Baakireeta gh'ali.

²¹ Yaaja aghali ensulo y'amaadhi, yaasuulamu omuunhu ogwo ng'akoba ati: “Musengwa Katonda akoba ati, ‘Amaadhi gano ngafiire malamu. Tigakairayo kuvaamu lumbe waire okutoolamu abantu enda.’ ”

²² N'okuva ku olwo, amaadhi ago gaasigala nga malamu ni ye buli eno, ng'Elisha bwe yakoba.

²³ Agho Elisha yaava e Yeriko, yaaja e Betheli. Bwe yali ng'ali kutambula mu ngira, abaisuka abatobato baava mu kibuga, baamuyeeyereza nga bakoba bati: “Va agho oje, iwe kapaata! Va agho oje, iwe kapaata!”

²⁴ Elisha yaakyuka, yaalinga einhuma yaababona, era yaabakolimira mu liina lya Musengwa Katonda. Agho ebisolo ebikambwe bibiri ebikazi byava mu kibira, byayuzayuza abaana amakumi ana n'ababiri (42) ku abo.

²⁵ Mwene yeeyongerayo yaatuuka ku lusozi Karumeli, ate yaamala yaava eyo yaaja e Samaria.