2 Bakyabazinga 17 - Baibuli Ekibono kya Katonda 2014

Kyabazinga Hoshea owa Isiraeli

¹ Mu mwaka ogweikumi n'ebiri nga kyabazinga Ahazi n'afuga Buyudaaya, Hoshea mutabane wa Ela yaafuuka kyabazinga wa Isiraeli, era yaafugira mu Samaria okumala entangama ya myaka mwenda.

² Yaakolanga ebibi eri Musengwa Katonda, aye ate yaaloba kwagayaga na bakyabazinga abaamusooka okufuga Isiraeli.

³ Agho kyabazinga Shalumaneseri ow'e Assiria, yaalumba Hoshea yaamughangula mu lutalo, Era Hoshea oyo yaaghanga Shalumaneseri omusolo.

⁴ Aye kyabazinga oyo ow'e Assiria yaagwa mu lukwe lwa Hoshea olw'okudheema, nga Hoshea oyo agheereiza abakwenda okusaba kyabazinga So owa Misiri amuyambe, era nga Hoshea oyo alekeire n'okugha kyabazinga w'e Assiria omusolo nga bwe yakolanga buli mwaka. Agho kyabazinga w'e Assiria yaagema Hoshea oyo, yaamusiba mu ikomera.

Ekibuga Samaria bakighangula

⁵ Agho kyabazinga Shalumaneseri ow'e Assiria yaalumba ensi Isiraeli, yaazingiza ekibuga Samaria okumala entangama ya myaka esatu.

⁶ Mu mwaka ogwomwenda nga kyabazinga Hoshea n'afuga Isiraeli, kyabazinga w'e Assiria yaagema ekibuga Samaria, era yaakukumba abantu ab'omu Isiraeli yaabatwala mu Assiria nga banhage. Abandi yaabata mu kibuga Hala, abandi kumpi n'omwiga Habori mu kiketezo ky'e Gozani, ate abandi mu bibuga eby'Abamedia.

⁷ Ebyo byabaagho, kuba Abaisiraeli baakola ebibi eri Musengwa Katonda waibwe, eyabatoola mu nsi Misiri mu mikono gya kyabazinga waayo. Abaisiraeli abo baasinzanga emisambwa,

⁸ era baajiiranga ku mpisa dh'abamaghanga agandi, Musengwa Katonda ge yabinga mu nsi eyo nga beene Abaisiraeli bali kumpi okutuukayo. Abaisiraeli abo baajiiranga ni ku mpisa bakyabazinga ba Isiraeli dhe baatangagho,

⁹ era baakolanga mu ngiso ebintu ebitaalinga bituufu, Musengwa Katonda waibwe by'ataasiimanga. Beezimbiranga ebifo ebigulumivu eby'okusinzizaamu, mu bibuga byaibwe byonabyona, okuviira irala ku kisembayo obutono okutuukira irala ku kisingamu obunene.

¹⁰ Baasimba empango n'ebifaananie eby'omusambwa omukazi, Ashera, ku buli lusozi olugungumavu, na buli ghansi mu kinsense kya muti muzibirivu.

¹¹ Baaniokezanga obubbaani mu bifo ebigulumivu byonabyona eby'okusinzizaamu, ng'abamaghanga agandi bwe baakolanga, Musengwa Katonda be yabingamu nga beene Abaisiraeli bali kumpi okutuukayo. Baakolanga ebibi, baaleetera Musengwa Katonda okusungughala,

¹² baasinzanga ebitali Katonda, Musengwa Katonda bye yabakoba ati: “Mutabisinzanga!”

¹³ Ate nga Musengwa Katonda yalabulanga Isiraeli ni Buyudaaya ng'abita mu balanzi ni mu baboni, ng'akoba ati: “Mukyuke, muve mu mpisa dhaimwe embi mugeme ebiragiro byange ebiri mu Mateeka gange, ge nagha badhaadha baimwe nga mbita mu bagheereza bange abalanzi.”

¹⁴ Aye baaloba kuwulira, baaba ba mpwitu nga badhaadha baibwe bwe baakola, abaaloba okwesiga Musengwa Katonda waibwe.

¹⁵ Baaloba kugemanga biragiro bye, waire okukuuma endagaano ye yakola ni badhaadha baibwe, era baaloba kufangayo ku kulabula, kwe yabalabulangamu. Baasinzanga ebisinzibwa ebitali Katonda ebitagasa, olwo ni beene baafuuka ebitagasa, era baajiiranga ku mpisa edh'abamaghanga agandi agabeezungulwire. Ate nga Musengwa Katonda yabalobera okwebisanga ng'oti n'abamaghanga ago.

¹⁶ Baava ku biragiro byonabyona ebya Musengwa Katonda waibwe, beekolera ebifaananie bibiri eby'ente ento mu kyuma ekisaanuusiibwa, beekolera n'ekifaananie ky'omusambwa omukazi Ashera. Baasinzanga emuunienie dhoonadhoona edh'oku igulu, era baasinzanga ni Baali yeena.

¹⁷ Baaghangayo abaana baibwe abalenzi n'abaghala ng'emisengo egyokebwa. Beeraguzanga era baakolanga eby'obulogo, era beegheerangayo irala okukola ebibi, baaleetera Musengwa Katonda okusungughala.

¹⁸ Agho Musengwa Katonda yaasungughalira inho Abaisiraeli, yaababinga mu maiso ge ghaaloba kusigalagho waire omulala ati, okutoolaku ab'omu Buyudaaya bonka.

¹⁹ N'ab'omu Buyudaaya boona tibaagema biragiro bya Musengwa Katonda waibwe, aye baajiiranga ku mpisa ab'omu Isiraeli dhe beeteeragho.

²⁰ Musengwa Katonda yaalekulira agho baidhukulu ba Isiraeli boonaboona, yaababonereza ng'abaghaayo mu mikono gy'abazigu baibwe, okutuusa lwe yababingira irala mu maiso ge.

²¹ Musengwa Katonda bwe yamala okwawula Isiraeli ku b'endhu ya Daudi, ab'omu Isiraeli baafuula Yeroboamu mutabane wa Nebati kyabazinga waibwe. Yeroboamu oyo yaaleetera ab'omu Isiraeli okuva ku Musengwa Katonda, era mu nsambo eyo yaabaleetera okukola ebibi ebitaloodheka.

²² Ab'omu Isiraeli abo baakolanga ebibi byonabyona Yeroboamu bye yakolanga, baaloba kulekera,

²³ okutuusa Musengwa Katonda lwe yababinga mu maiso ge, nga bwe yabalabula ng'abita mu bagheereza be abalanzi boonaboona. Agho ab'omu Isiraeli baabatoola mu nsi yaibwe, baabatwala mu Assiria ye bakaali ni ye buli eno.

Abassiria basenga mu Isiraeli

²⁴ Agho kyabazinga w'e Assiria yaasengula abantu okubatoola mu bibuga, Babiloni, ni Kutha, ni Avva, ni Hamathi, ni Sefarivaimu. Yaabatwala okubasenza mu bibuga bya Samaria, mu kifo ky'Abaisiraeli. Abantu abo baatwala ensi Samaria yaaba yaibwe, baabanga mu bibuga byayo.

²⁵ Bwe baali nga baakatoolera okubaayo, tibaasinzanga Musengwa Katonda. N'olw'ekyo Musengwa Katonda oyo kyeyava n'abasindikira empologoma ni dhibaitamu abandi.

²⁶ Ghaabaagho abaakobera kyabazinga w'e Assiria bati: “Abantu be watwala okubasenza mu bibuga by'e Samaria, tibaidhi mateeka ga musambwa gwa mu nsi eyo. N'olw'ekyo omusambwa ogwo kye gwava ni gubasindikira empologoma, era dhiri eyo dhiri kubaita.”

²⁷ Agho kyabazinga w'e Assiria yaalagira ati: “Mutwaleyo owundi ku bakabona be mwatoolayo aje abenga eyo abeegerese amateeka ag'omusambwa gw'omu nsi eyo.”

²⁸ Agho owundi ku bakabona be baatoola mu Samaria, yaaja yaabanga e Betheli, yaabeegeresanga bwe bagwaine okutyanga Musengwa Katonda.

²⁹ Aye abantu aba buli ighanga mu bibuga byaibwe mwe baabanga, baayongeranga okwekolera ebifaananie by'emisambwa gyaibwe, baabita mu bifo ebigulumivu eby'okusinzizaamu, Abasamaria bye baaleka nga bazimbye.

³⁰ Abantu abaava e Babiloni baakola ebifaananie by'omusambwa Sukkothi Benothi, abaava e Kuthi baakola eby'omusambwa Nerugali, Abaava e Hamathi baakola eby'omusambwa Ashima,

³¹ abaava mu Avva baakola eby'emisambwa Nibuhazi ni Tarutaki, ate abantu abaava e Sefarivaimu baaghangayo abaana baibwe ng'emisengo egyokebwa eri emisambwa gyaibwe, Adurammeleki ni Anammeleki.

³² Abantu abo baasinzanga ni Musengwa Katonda, era beerondangamu bakabona abaabagheerangayo emisengo mu masabo ag'omu bifo ebigulumivu bye baasinzizangamu.

³³ Kale ni baasinzanga Musengwa Katonda, aye nga era basinza n'emisambwa gyaibwe, nga bajiira ku mpisa dh'ensi ye baava.

³⁴ Ni ye buli eno bakaakola nga bwe baakolanga eira. Tibatya Musengwa Katonda, era tibagema mateeka ge waire okugondera ebiragiro bye, bye yagha ab'eizaire lya Yakobo ye yatuuma eriina Isiraeli.

³⁵ Musengwa Katonda yakola nabo endagaano, yaabalagira ati: “Mutasinzanga bakatonda bandi era mutabikubiranga makiryaivu, waire okughangayo emisengo ye bali.

³⁶ Aye mutyenga nze Musengwa Katonda eyabatoola mu nsi Misiri nga nkozesa amaani agataloodheka. Ninze ye munaakubiranga amakiryaivu era ninze ye munaaghanga emisengo.

³⁷ Mutenga inho omwoyo era mugemenga buliidho amateeka goonagoona n'ebiragiro bye nabaghandiikira. Mutasinzanga bakatonda bandi,

³⁸ era muteerabiranga ndagaano ye nakola n'imwe.

³⁹ Aye nze Musengwa Katonda waimwe, ninze ye mube mutyenga, era ninze ndidha okubawonianga abazigu baimwe boonaboona.”

⁴⁰ Aye abantu abo baaloba okuwulira, baasigala nga bakaajiira ku mpisa dhaibwe edh'eira.

⁴¹ Kale abantu ab'amaghanga ago baasinzanga Musengwa Katonda, aye nga era basinza n'ebifaananie ebibaadhe eby'emisambwa gyaibwe. N'abaana baibwe boona baakolanga batyo, era n'abaidhukulu baibwe batyo bwe bakaakola ni ye buli eno.