2 Bakyabazinga 15 - Baibuli Ekibono kya Katonda 2014

Kyabazinga Uzzia owa Buyudaaya

¹ Mu mwaka ogwamakumi abiri n'omusanvu (27) nga kyabazinga Yeroboamu Owokubiri n'afuga Isiraeli, Uzzia mutabane wa Amazia yafuuka kyabazinga wa Buyudaaya.

² Yali agheza emyaka ikumi na mukaaga egy'obukulu, era yaafugira mu Yerusalemu okumala entangama ya myaka amakumi ataanu n'ebiri (52). Inhina nga ni Yekolia ow'e Yerusalemu.

³ Uzzia yaakolanga ebituufu Musengwa Katonda by'asiima, nga lata we Amazia bye yakolanga.

⁴ Aye ate ebifo ebigulumivu eby'okusinzizaamu tiyabitoolagho. Kale abantu baasigala nga bakaagheera emisengo n'okuniokeza obubbaani mu bifo ebyo.

⁵ Agho Musengwa Katonda yaaleetera Uzzia okulwala endwaire ey'ebigenge, yaaba nayo okutuusa lwe yafa. Yaabanga mu ndhu yiye yenka. Mutabane we Yothamu yaasigala nga n'alabirira ekisaagaati kye eky'obwakyazinga, era nga n'afuga ensi eyo.

⁶ Ebindi byonabyona Azaria bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

⁷ Agho Uzzia yaafa yeeyimba ku badhaadha be abaafa, era yaaziikibwa mu lwambiidhi lwa badhaadha be abo mu kyetebwa Ekibuga kya Daudi. Mutabane we Yothamu yaamusikira ku bwakyabazinga.

Kyabazinga Zekaria owa Isiraeli

⁸ Mu mwaka ogw'amakumi asatu n'omunaana (38) nga kyabazinga Uzzia n'afuga Buyudaaya, Zekaria yaafuuka kyabazinga wa Isiraeli, kyabazinga Yeroboamu owokubiri nga n'amuzaala. Yaafugira mu Samaria okumala entangama ya myezi mukaaga.

⁹ Yaakola ebibi eri Musengwa Katonda nga badhaadha be bwe baakolanga. Yaakola ebibi ng'ebya Yeroboamu mutabane wa Nebati, ebyaleetera Isiraeli okwonoona.

¹⁰ Agho Shallumu mutabane wa Yabeshi yaamukolera olukwe, yaamufumitira mu Ibuleamu, yaamwita, era yaafuga mu kifo kye.

¹¹ Ebindi byonabyona Zekaria bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

¹² Ekyo kyatuukiriza Musengwa Katonda kye yasuubiza kyabazinga Yehu, ati: “Ab'eizaire lyo okutuuka ku luse olwokuna, balityama ku kityamo eky'obwakyabazinga bwa Isiraeli.”

Kyabazinga Shallumu owa Isiraeli

¹³ Mu mwaka ogwasatu n'omwenda (39) nga kyabazinga Uzzia n'afuga Buyudaaya, Shallumu mutabane wa Yabeshi yaafuuka kyabazinga wa Isiraeli, era yaafugira mu Samaria okumala entangama ya mwezi mulala.

¹⁴ Agho Menahemu mutabane wa Gadi, yaava e Tiruza yaaja e Samaria, yaita Shallumu, yaafuga mu kifo kye.

¹⁵ Ebindi byonabyona Shallumu bye yakola, omuli n'olukwe olw'okwita Zekaria lwe yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

¹⁶ Agho Menahemu yaazikiriza ekibuga Tappua, n'abaakirimu boonaboona, n'ebiketezo ebikiriiraine okuviira irala e Tiruza kuba baaloba okumwiguliragho okwingira. N'abakazi boonaboona abaakirimu nga bali mabunda, amabunda yaagabaagamu!

Kyabazinga Menahemu owa Isiraeli

¹⁷ Mu mwaka ogwamakumi asatu n'omwenda (39) nga Uzzia n'afuga Buyudaaya, Menahemu mutabane wa Gadi yaafuuka kyabazinga wa Isiraeli. Yaafugira mu Samaria okumala entangama ya myaka ikumi.

¹⁸ Yaakola ebibi eri Musengwa Katonda, era enaku edh'obulamu bwe dhoonadhoona yaaloba kulekera okukola ebibi ng'ebya Yeroboamu mutabane wa Nebati, ebyaleetera Isiraeli okwonoona.

¹⁹ Agho Puli kyabazinga w'e Siria, yaalumba Isiraeli. Menahemu yaagha Puli oyo kilo emitwalo amakumi asatu n'ena (340,000) edha feeza, olwo Puli oyo aghange okuyamba Menahemu okukakata ku bwakyabazinga.

²⁰ Empiiya edho dhe yagha kyabazinga w'e Siria, Menahemu yadhisoloza ku basaadha boonaboona abakombe ab'omu Isiraeli. Kiisi musaadha yaghaayo ebitundu amakumi ataanu ebya feeza. Agho Puli kyabazinga w'e Siria yaakyuka yairayo, yaaloba kusigala mu nsi eyo Isiraeli.

²¹ Ebindi byonabyona Menahemu bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

²² Agho Menahemu yaafa yeeyimba ku badhaadha be abaafa. Mutabane we Pekahia yaamusikira ku bwakyabazinga.

Kyabazinga Pekahia owa Isiraeli

²³ Mu mwaka ogwamakumi ataanu (50) nga kyabazinga Uzzia n'afuga Buyudaaya, Pekahia mutabane wa Menahemu yaafuuka kyabazinga wa Isiraeli. Yaafugira mu Samaria okumala entangama ya myaka ebiri.

²⁴ Yaakola ebibi eri Musengwa Katonda nga Yeroboamu mutabane wa Nebati bye yakola, ebyaleetera Isiraeli okwonoona.

²⁵ Agho omuduumizi ow'eigye lye ayetebwa Peka, mutabane wa Remalia, yaakola olukwe n'abasaadha amakumi ataanu abaava e Gileadi, yaamwitira e Samaria mu kifo eky'okwewogomamu eky'omu kisaagaati kya kyabazinga. Olwo Peka oyo yaafuuka kyabazinga mu kifo kya Pekahia.

²⁶ Ebindi byonabyona Pekahia bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

Kyabazinga Peka owa Isiraeli

²⁷ Mu mwaka ogwamakumi ataanu n'ebiri (52) nga kyabazinga Uzzia n'afuga Buyudaaya, Peka mutabane wa Remalia yaafuuka kyabazinga wa Isiraeli. Yaafugira mu Samaria okumala entangama ya myaka makumi abiri.

²⁸ Yaakola ebibi eri Musengwa Katonda nga Yeroboamu mutabane wa Nebati bye yakola, ebyaleetera Isiraeli okwonoona.

²⁹ Mu biseera Peka bye yafugiramu Isiraeli, ghaabaagho kyabazinga Tigulathi Pileseri ow'e Assiria yaidha yaagema ebibuga Iyoni, ni Abeli Bethi Maaka, ni Yanoa, ni Kedeshi, ni Hazori, n'ebiketezo eby'e Gileadi, n'eby'e Galilaaya, n'eby'e Nafutali. Era yaatwala n'abantu mu Assiria nga banhage.

³⁰ Mu mwaka ogwamakumi abiri (20) nga kyabazinga Yothamu mutabane wa Uzzia n'afuga Buyudaaya, Hoshea mutabane wa Ela yaakola olukwe, yaafumita Peka mutabane wa Remalia, yaamwita. Olwo Hoshea oyo yaafuuka kyabazinga mu kifo kye.

³¹ Ebindi byonabyona Peka bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

Kyabazinga Yothamu owa Buyudaaya

³² Mu mwaka ogwokubiri nga kyabazinga Peka mutabane wa Remalia n'afuga Isiraeli, Yothamu mutabane wa Uzzia yaafuuka kyabazinga wa Buyudaaya.

³³ Yali agheza emyaka amakumi abiri n'etaanu egy'obukulu, era yaafuga okumala entangama ya myaka ikumi na mukaaga mu Yerusalemu. Inhina yali nga ni Yerusha mughala wa Zadoki.

³⁴ Yothamu yaakolanga ebituufu Musengwa Katonda by'asiima, nga lata we Uzzia bye yakolanga.

³⁵ Yaazimba omulyango ogw'eitale ogw'eisinzizo lya Musengwa Katonda. Aye ate ebifo ebigulumivu eby'okusinzizaamu tiyabitoolagho. Kale abantu baasigala nga bakaagheerayo emisengo n'okuniokeza obubbaani mu bifo ebyo.

³⁶ Ebindi byonabyona Yothamu bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

³⁷ Mu biseera Yothamu bye yafugiramu, Musengwa Katonda mwe yatoolereza okusindika Rezini kyabazinga wa Siria ni Peka kyabazinga wa Isiraeli era mutabane wa Remalia, baaja baalumba Buyudaaya.

³⁸ Agho Yothamu yaafa yeeyimba ku badhaadha be abaafa, era yaaziikibwa mu badhaadha be abo, mu kyetebwa Ekibuga kya Daudi dhaadha we. Mutabane we Ahazi yaamusikira ku bwakyabazinga.