2 Bakyabazinga 14 - Baibuli Ekibono kya Katonda 2014

Kyabazinga Amazia owa Buyudaaya

¹ Mu mwaka ogwokubiri nga kyabazinga Yehoashi mutabane wa Yehoahazi n'afuga Isiraeli, Amazia mutabane wa Yoashi yaafuuka kyabazinga wa Buyudaaya.

² Yali agheza emyaka amakumi abiri n'etaanu egy'obukulu ghe yafuukira kyabazinga, era yaafuga okumala entangama ya myaka amakumi abiri na mwenda mu Yerusalemu. Eriina lya inhina nga ni Yehoaddini ow'e Yerusalemu.

³ Amazia yakola ebituufu Musengwa Katonda by'asiima, aye tiyatuuka ku ebyo dhaadha we Daudi bye yakola. Amazia oyo yakola ebyo byonabyona lata we Yoashi bye yakolanga.

⁴ Aye ebifo ebigulumivu eby'okusinzizaamu tibaabitoolagho. Abantu baasigala nga bakaagheera emisengo n'okuniokeza obubbaani mu bifo ebyo.

⁵ Agho Amazia bwe yamala okukakata ku bwakyabazinga, yaita abakungu be abaita lata we, kyabazinga Yoashi.

⁶ Aye tiyaita baana baibwe, kuba yajiira ku kyaghandiikibwa mu Kitabo eky'Amateeka ga Musa, nga Musengwa Katonda bwe yalagira ati: “Abazaire mutabaitanga lwa misango baana baibwe gye baiziiza, n'abaana mutabaitanga lwa misango gya bazaire baibwe gye baiziiza. Omuntu aidha kwitibwanga lwa musango gw'anaabanga ng'aiziiza mwene.”

⁷ Amazia yaitiramu Kiiko ky'Omuunhu abaisirukale Abaedomu omutwalo mulala (10,000), yaanhaga ekibuga Sela mu lutalo, yaakituuma eriina Yokitheeli, lye bakaakyeta ni ye buli eno.

⁸ Agho Amazia yaatuma abakwenda eri kyabazinga Yehoashi owa Isiraeli, mutabane wa Yehoahazi era mwidhukulu wa Yehu, ng'akoba ati: “Idha twagaanane, tulinzaganie obweni.”

⁹ Ate kyabazinga Yehoashi owa Isiraeli yaagheereza kyabazinga Amazia owa Buyudaaya obukwenda ng'akoba ati: “Olukandwa olwali ku lusozi Lebanoni lwagheereza obukwenda eri omuvule ogwali ku lusozi olwo Lebanoni, nga lukoba luti: ‘Gha mutabane wange mughala wo amubayize.’ Agho ensolo ey'omu nsiko ey'oku lusozi Lebanoni bweyali ebita, yaatyankirira olukandwa olwo.

¹⁰ Kituufu waghangula Edomu, ekyo kyakuleetera okwekuluntaza. Kale ni ba ewuwo weesaake n'ekyo. Lwaki onaawuula ebizibu eby'okukuzikiriza iwe ni Buyudaaya yoonayoona?”

¹¹ Aye Amazia yaaloba okuwulirisa. Kale Yehoashi kyabazinga wa Isiraeli kyeyava ni yeesowolayo okulumba Amazia kyabazinga wa Buyudaaya, baalinzagania obweni mu lutalo olwali e Bathi Shemeshi ekya Buyudaaya.

¹² Isiraeli yaaghangula Buyudaaya, kiisi mwisirukale wa Buyudaaya yaalumuka okwirayo ewuwe.

¹³ Agho kyabazinga Yehoashi owa Isiraeli, yaagema kyabazinga Amazia owa Buyudaaya mutabane wa Yoashi era mwidhukulu wa Ahazia, ng'amugemera e Bethi Shemeshi. Yaamuleeta e Yerusalemu era Yehoashi oyo yaamenha ekisenge ekyezungulwire ekibuga Yerusalemu ekyo, okuva ku Mulyango gwa Efuraimu okutuuka ku Mulyango Ogwokunsonda obwo nga n'obuleeyi bwa mita ng'oti ebikumi bibiri (200).

¹⁴ Yaanhaga zaabu ni feeza yeenayeena, n'ebintu ebikozesebwa byonabyona bye yayagaana mu isinzizo lya Musengwa Katonda, n'eby'obukombe eby'omu kisaagaati kya kyabazinga, era yaatwala n'abantu ng'omusingo. Agho yairayo e Samaria.

¹⁵ Ebindi byonabyona Yehoashi bye yakola, omuli n'eby'amaani bye yakola, ni bwe yalwanisa Amazia kyabazinga wa Buyudaaya, byaghandiikibwa mu Kitabo ky'Ebyomubyanda bya Bakyabazinga ba Isiraeli.

¹⁶ Agho Yehoashi yaafa, yeeyimba ku badhaadha be abaafa, era yaaziikibwa mu lwambiidhi lwa bakyabazinga ba Isiraeli e Samaria. Mutabane we Yeroboamu yaamusikira ku bwakyabazinga.

Kyabazinga Amazia owa Buyudaaya afa

¹⁷ Kyabazinga Amazia owa Buyudaaya, mutabane wa Yoashi, yasigala ng'akaaligho okumala entangama ya myaka ikumi n'etaanu, nga kyabazinga Yehoashi mutabane wa Yehoahazi amaze okufa.

¹⁸ Ebindi byonabyona Amazia bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

¹⁹ Ghaaligho abaakola olukwe mu Yerusalemu okwita Amazia oyo. Kale yaalumukira mu kibuga ky'e Lakishi, aye era baatumayo abantu okumunooniayo, baamwitirayo.

²⁰ Omulambo gwe baaguleetera ku mbalaasi, baamuziika mu Yerusalemu mu lwambiidhi lwa badhaadha be, mu kyetebwa Ekibuga kya Daudi.

²¹ Abantu boonaboona ab'omu Buyudaaya, baalonda Azaria eyali ng'agheza emyaka eikumi n'omukaaga egy'obukulu, baamufuula kyabazinga okusikira lata we Amazia.

²² Azaria yaiza ekibuga Elathi ku Buyudaaya era yaakizimba buyaaka, nga lata we amaze okufa ni yeeyimba ku badhaadha be abaafa.

Kyabazinga Yeroboamu Owokubiri owa Isiraeli

²³ Mu mwaka ogweikumi n'etaanu (15) nga kyabazinga Amazia mutabane wa Yoashi n'afuga Buyudaaya, Yeroboamu mutabane wa Yehoashi yaafuuka kyabazinga wa Isiraeli, era yaafugira mu Samaria okumala entangama ya myaka amakumi ana na mulala (41).

²⁴ Yaakola ebibi eri Musengwa Katonda nga Yeroboamu mutabane wa Nebati bye yakola, ebyaleetera Isiraeli okwonoona.

²⁵ Yaghangula yaizaayo ensalosalo ya Isiraeli okuva aghaingirirwa e Hamathi okutuukira irala ku Nhandha Eyomuunhu, nga Musengwa Katonda, Katonda wa Isiraeli bwe yakoba ng'abita mu mugheereza we, omulanzi Yona mutabane wa Amittai ow'e Gathi Heferi.

²⁶ Musengwa Katonda yabona okudaazibwadaazibwa okw'Abaisiraeli okutaloodheka, era nga ghaziragho muntu yeenayeena aghanga kubayamba, k'abe omusibe oba ow'eidembe.

²⁷ Aye Musengwa Katonda tiyayenda kusaaniagho Baisiraeli kubamalagho ku nsi. Kyeyava n'abawonia ng'abita mu Yeroboamu owokubiri mutabane wa Yehoashi.

²⁸ Ebindi byonabyona Yeroboamu owokubiri bye yakola, omuli n'eby'amaani bye yakola, n'entalo dhe yalwana, era n'ensambo ye yaizaamu ku Isiraeli ebibuga Damasiko ni Hamathi ebyali mu Buyudaaya, byaghandiikibwa mu Kitabo ky'Ebyomubyanda bya Bakyabazinga ba Isiraeli.

²⁹ Agho Yeroboamu Owokubiri yaafa, yeeyimba ku badhaadha be abaafa bakyabazinga ba Isiraeli. Mutabane we Zekaria yaamusikira ku bwakyabazinga.