2 Bakyabazinga 13 - Baibuli Ekibono kya Katonda 2014

Kyabazinga Yehoahazi owa Isiraeli

¹ Mu mwaka ogwamakumi abiri n'esatu (23) nga kyabazinga Yoashi mutabane wa Ahazia n'afuga Buyudaaya, Yehoahazi mutabane wa Yehu yaafuuka kyabazinga wa Isiraeli, era yaafugira mu Samaria okumala entangama ya myaka ikumi na musanvu.

² Yaakola ebibi eri Musengwa Katonda, nga kyabazinga Yeroboamu mutabane wa Nebati bye yakola, ebyaleetera Isiraeli okwonoona. Era Yehoahazi oyo yaaloba kuva mu bibi ebyo.

³ Obusungu bwa Musengwa Katonda bwatumbukira ku Isiraeli ng'oti muliro, yaaleetera Hazaeli kyabazinga wa Siria ni mutabane we Benihadadi okubaghangulanga emikuzi egighera.

⁴ Agho Yehoahazi yeeghemba Musengwa Katonda ng'amusaba, era Musengwa Katonda yaawulira okusaba kwe, kuba yabona kyabazinga wa Siria bweyali abisa obubi Abaisiraeli.

⁵ Musengwa Katonda yaagha Abaisiraeli omuntu yaabanunula, yaabawonia okufugibwa Abasiria. Abaisiraeli baaba mu miraala nga bwe baabanga eira.

⁶ Aye ate baaloba kuva mu bibi ab'endhu ya Yeroboamu bye baabaleetera okukola, beeyongera bweyongere okubikola. N'ekifaananie ky'omusambwa omukazi Ashera, kyasigala mu Samaria.

⁷ Yehoahazi tiyasigazaagho igye lirimu balwani baswika mu makumi ataanu (50) ab'oku mbalaasi, oba ebigaali eby'omu lutalo ebiswika mu ikumi (10), waire abaisirukale abaswika mu mutwalo omulala (10,000) ab'oku bigere kuba kyabazinga wa Siria yazikiriza abandi boonaboona, yaabatyankirira ng'oti nkungu ey'omu kifo ghe bakubira engaano.

⁸ Ebindi byonabyona Yehoahazi bye yakola, omuli n'eby'amaani bye yakola, byaghandiikibwa mu Kitabo ky'Ebyomubyanda bya bakyabazinga ba Isiraeli.

⁹ Agho Yehoahazi yaafa, yeeyimba ku badhaadha be abaafa, era yaaziikibwa mu Samaria. Mutabane we Yehoashi yaamusikira ku bwakyabazinga.

Kyabazinga Yehoashi owa Isiraeli

¹⁰ Mu mwaka ogwamakumi asatu n'omusanvu (37) nga kyabazinga Yoashi n'afuga Buyudaaya, Yehoashi mutabane wa Yehoahazi yaafuuka kyabazinga wa Isiraeli, era yaafugira mu Samaria okumala entangama ya myaka ikumi na mukaaga.

¹¹ Yeena yaakola ebibi eri Musengwa Katonda, ng'oti n'ebya kyabazinga Yeroboamu ebyaleetera Isiraeli okwonoona. Era Yehoashi oyo yaaloba kuleka bibi ebyo, aye yaaja bwa mu maiso na kubikola.

¹² Ebindi byonabyona Yehoashi bye yakola, omuli n'eby'amaani bye yakola ng'ali kulwanisa Amazia kyabazinga wa Buyudaaya, byaghandiikibwa mu Kitabo ky'Ebyomubyanda bya Bakyabazinga ba Isiraeli.

¹³ Agho Yehoashi yaafa, yeeyimba ku badhaadha be abaafa, era yaaziikibwa e Samaria mu lwambiidhi lwa bakyabazinga ba Isiraeli. Mutabane we Yeroboamu yaamusikira ku bwakyabazinga.

Elisha afa

¹⁴ Agho Elisha yaalwala obulwaire obwamuviiraku okufa. Yehoashi kyabazinga wa Isiraeli yaaja y'ali okumubona. Yaalira amaziga ng'akoba ati: “Lata wange, lata wange! Iwe ow'amaani ng'oti bigaali bya mu lutalo n'embalaasi, ebirwanirira Isiraeli!”

¹⁵ Elisha yaamukoba ati: “Gema akalaso n'obusaale.” Yehoashi yaagema akalaso n'obusaale.

¹⁶ Elisha yaakoba Yehoashi kyabazinga wa Isiraeli ati: “Dhuumuula akalaso.” Kyabazinga yaakadhuumuula. Elisha yaata emikono gye ku mikono gya kyabazinga.

¹⁷ Yaakoba ati: “Igulagho eidinisa eriringiriire e buvandhuba.” Yaaliigulagho. Agho Elisha yaakoba ati: “Lasa akalaso.” Kyabazinga yaalasa. Elisha yaakoba ati: “Ako n'akalaso ka Musengwa Katonda ak'obughanguzi, akalaso akalighangula Siria. Olirwanisa Abasiria mu Afeki okutuusa lw'olibamalagho.”

¹⁸ Agho Elisha yaakoba kyabazinga ati: “Gema obusaale.” Kyabazinga wa Isiraeli yaabugema. Elisha yaamukoba ati: “Bulase bukube ku itaka.” Kyabazinga yaabulasa emikuzi esatu bwakuba ku itaka, yaalekera agho.

¹⁹ Omuntu wa Katonda oyo Elisha yaasungughalira kyabazinga, yaamukoba ati: “Wandibaire okubye emikuzi etaanu oba mukaaga. Olwo wandibaire okubye Abasiria okutuusa lwe wandibazikiriiza. Aye mpegaano oja kubaghangula bwa mikuzi esatu gyonka.”

²⁰ Agho Elisha yaafa, baamuziika. Ghaabaagho ebikunsu eby'Abamoabu ebyaidhanga okulumba ensi Isiraeli agho ng'omwaka gwakainhama.

²¹ Lwali lulala, ghaabaagho Abaisiraeli abaali baja okuziika omuntu, baabona ekindi ku bikunsu ebyo nga kiri kwidha. Agho baasuula omulambo bwa mu magombe ga Elisha, baalumuka. Omulambo ogwo olwasiinha ku magumba ga Elisha guti, ng'omusaadha oyo alamuka, era ng'ayemerera.

Olutalo ghagati gha Isiraeli ni Siria

²² Kyabazinga Hazaeli owa Siria yatuntuzanga Abaisiraeli ekiseera kyonakyona kyabazinga Yehoahazi kye yafugiramu Isiraeli.

²³ Aye Musengwa Katonda yaabagemerwa ekivunika, yaabasaasira. Yaira ku luuyi lwaibwe yaababeera olw'endagaano ye yakola ni Aburahamu ni Isaaka ni Yakobo, era yaaloba kubazikiriza waire okubabinga mu maiso ge ni ye buli eno.

²⁴ Hazaeli kyabazinga wa Siria bwe yafa, mutabane we Benihadadi yaamusikira ku bwakyabazinga.

²⁵ Agho kyabazinga Yehoashi owa Isiraeli, mutabane wa Yehoahazi, yaaghangula Benihadadi emikuzi esatu, yaamutoolaku ebibuga bya Isiraeli, Benihadadi oyo bye yali anhaze ng'alwanisa Yehoahazi lata wa Yehoashi oyo.