2 Bakyabazinga 12 - Baibuli Ekibono kya Katonda 2014

Kyabazinga Yoashi owa Buyudaaya

¹ Mu mwaka ogwomusanvu nga kyabazinga Yehu n'afuga Isiraeli, Yoashi yaafuuka kyabazinga wa Buyudaaya, era yaafuga okumala entangama ya myaka amakumi ana (40) mu Yerusalemu. Eriina lya inhina nga ni Zibia ow'e Beerisheba.

² Yoashi yaakolanga ebituufu Musengwa Katonda by'asiima ekiseera kyonakyona, kuba Yehoiada kabona ng'atyo bw'amwegeresa.

³ Aye era ebifo ebigulumivu eby'okusinzizaamu tiyabitoolagho, kale abantu baasigala nga bakaagheera emisengo n'okuniokeza obubbaani mu bifo ebyo.

⁴ Agho Yoashi yaakoba bakabona ati: “Empiiya dhoonadhoona edhiva mu bintu ebigheebwayo ye Musengwa Katonda edhireetebwa mu isinzizo, edho nga n'empiiya kiisi muntu dh'agerekerwa okugha, era oteeku n'edho omuntu dh'aba nga yeeyamye mwene okugha,

⁵ dhigemesebwenga bakabona, nga buli kabona agema edh'abantu b'akolamu. Olwo empiiya edho dhiidha kukozesebwanga okulongoosa eisinzizo buli lwe kinaabanga nga kyetaagisa.”

⁶ Aye omwaka ogwamakumi abiri n'esatu (23) nga kyabazinga Yoashi n'afuga gwatuuka, aye nga bazira ghe balongoosiisaaku naire.

⁷ Kyabazinga Yoashi kyeyava n'ayeta Yehoiada kabona ni bakabona abandi, yaabakoba ati: “Lwaki timuli kulongoosa isinzizo? Kale ni mulekere agho okutoolanga empiiya ku bantu be mukolamu ni mu dhisigaza. Aye mudhighengayo dhikozesebwe okulongoosa eisinzizo.”

⁸ Bakabona baikiriza obutayongera kutoola ku bantu mpiiya, era baikiriza obutalongoosa isinzizo eryo beene.

⁹ Agho Yehoiada kabona yaatoola esanduuku, yaagitunamu ekituli ku kisandikiza kyayo, yaagita kumpi ni alutaari ku luuyi olw'omukono omusaadha, omuntu ng'ali kwingira mu isinzizo. Bakabona abaakuumanga omulyango ogwingira, n'abaatanga mu sanduuku eyo empiiya dhoonadhoona abantu dhe baaleetanga mu isinzizo lya Musengwa Katonda.

¹⁰ Bwe baabonanga nga mu sanduuku mughezeemu empiiya kamaala, omughandiisi wa kyabazinga n'Omukulu wa Bakabona baidhanga, baabala empiiya edho dhe baagaine mu isinzizo, baadhisiba mu bisawo.

¹¹ Empiiya edho dhe babaze, baadhigemya abo abalabirira omulimo ogw'okulongoosa eisinzizo, ate abo baadhisasula ababaadhi, n'abazimbi abakola mu isinzizo,

¹² n'abazimbisa amabaale, era n'abagatema. Era baagula emiti n'amabaale amateme, babikozese mu kulongoosa eisinzizo. Era baasasulira n'ebindi byonabyona ebyetaagisa ku mulimo ogwo.

¹³ Aye empiiya edho dhe baasolozanga mu isinzizo, tibaadhikozesaaku kusasulira benseni edha feeza, ni makansu edhisala ebisiriiza ku ntambi dh'entaala, n'ebibya, n'amagwala, n'ebintu ebindi byonabyona ebikozesebwa mu isinzizo, ka bibe bya zaabu oba bya feeza.

¹⁴ Dhoonadhoona baadhikozesa kusasula bakozi na kugula byonabyona bye baakozesa mu kulongoosa eisinzizo.

¹⁵ Era abantu be baagemyanga empiiya okusasula abakozi, tibaabasabanga kwinhonhola nsambo ye badhikozeisaamu, kuba abantu abo baadhikozesanga na bwesigwa.

¹⁶ Empiiya edhaagheebwangayo ng'omutango era n'edho edhaagheebwangayo olw'ebibi, tibaadhireetanga mu isinzizo dhaabanga dha bakabona.

¹⁷ Mu kiseera ekyo Hazaeli kyabazinga wa Siria yaalumba ekibuga Gathi yaakighangula. Agho yaakyuka okuja okulwanisa ekibuga Yerusalemu.

¹⁸ Aye Yoashi kyabazinga wa Buyudaaya yaatoola ebintu byonabyona badhaadha be Yehoshafati ni Yehoramu ni Ahazia, abaaliku bakyabazinga ba Buyudaaya bye baaghaayo ye Musengwa Katonda, era n'ebyo mwene bye yali aghaireyo, ni zaabu yeenayeena eyali mu iterekero ly'eisinzizo ni mu ly'ekisaagaati kya kyabazinga, yaabigheereza Hazaeli kyabazinga wa Siria. Olwo Hazaeli yaava mu Yerusalemu, yaaja.

¹⁹ Ebindi byonabyona Yoashi bye yakola byaghandiikibwa mu Kitabo eky'Ebyomubyanda bya Bakyabazinga ba Buyudaaya.

²⁰ Abakungu be baakola olukwe baamwitira mu ndhu ey'omu kifo ekyaidhuzibwamu eitaka ekyetebwa Millo, ku ngira eja e Silla.

²¹ Abakungu be, Yozakari mutabane wa Shimeathi ni Yehozabadi mutabane wa Shomeri, n'abaamufumita, n'afa. Era baamuziika mu badhaadha be abaafa, mu kyetebwa Ekibuga kya Daudi. Mutabane we Amazia yaamusikira ku bwakyabazinga.