2 Bakyabazinga 11 - Baibuli Ekibono kya Katonda 2014

Athalia kyabazinga omukazi owa Buyudaaya

¹ Agho Athalia inhina wa kyabazinga Ahazia bwe yabona nga mutabane we oyo bamwise, yaasituka, yaazikiriza ab'oku lulyo olulangira boonaboona.

² Aye Yehosheba mughala wa kyabazinga Yoramu era nga mwanhina Ahazia, yaawoniagho Yoashi omulala ku batabane ba Ahazia oyo. Yamutoola mu balangira abaali baja okwitibwa ng'amwibagho bwibe, yaaja yaamugisa ghalala n'omulezi we mu kisenge ekisulwamu, mu nsambo eyo yaamuwonia Athalia okumwita.

³ Era Yehosheba oyo yaamulabiriranga ng'amugisiisa mu isinzizo, okumala entangama ya myaka mukaaga, nga Athalia n'afuga nga inhebantu.

⁴ Aye mu mwaka ogwomusanvu, Yehoiada kabona yaayetesa abaduumizi b'abakuumi ekikumi ekikumi aba kyabazinga, era yaayetesa n'abakulira abakuumi b'ekisaagaati kya kyabazinga. Baidha y'ali mu isinzizo, yaakola nabo endagaano ng'abalayiza okutuukiriza kye yali ategeike okukola. Agho yaabooleka Yoashi mutabane wa kyabazinga,

⁵ era yaabalagira ati: “Kino kye mwidha okukola: bwe munaidha okukuuma mu mpalo dhaimwe ku Sabbato, mwidha kwegabaniamu ebikunsu bisatu nga byagayaga. Ekikunsu ekindi ku ebyo ebisatu eby'abakuumi, baidha kukuuma ekisaagaati kya kyabazinga.

⁶ Ekikunsu ekindi era ku bisatu ebyo baidha kuba ku mulyango ogwetebwa Suri. Ate ekikunsu ekinaasigalagho baidha kuba ku mulyango einhuma w'abakuumi bale abandi.

⁷ Ab'omu bikunsu ebibiri abamaze empalo dhaibwe ku Sabbato, baidha kukuuma eisinzizo nga beezungulwire kyabazinga Yoashi.

⁸ Mwidha kwemerera nga mwezungulwire kyabazinga ku ndhuyi dhoonadhoona, buli muntu ng'agemye eby'okulwanisa bye. Omuntu yeenayeena anaaseetaku okumpi n'enhiriri dhaimwe nga mumwita. Mwidha kuba ghalala ni kyabazinga buli gh'anaajanga.”

⁹ Abaduumizi baakola byonabyona Yehoiada kabona bye yalagira: buli muduumizi yaaleeta eri Yehoiada oyo abasaadha be abaali baja okukuuma ku Sabbato, ghalala n'abo abaali bamaze okukuuma.

¹⁰ Agho Yehoiada kabona yaagha abaduumizi amafumo n'engabo ebya kyabazinga Daudi, ebyali mu isinzizo.

¹¹ Abakuumi baayemerera nga buli muntu agemye eby'okulwanisa bye okuva ku luuyi olw'omukono omusaadha olw'e buvandhuba w'eisinzizo, okutuuka ku luuyi lwalyo olw'omukono omugooda olw'e buvandhuba, n'okwezunguluza alutaari n'eisinzizo.

¹² Agho Yehoiada yaafulumya Yoashi, yaamuvaaza engule ey'obwakyabazinga, yaamugemya n'ekighandiiko ekirimu Amateeka. Agho baasiiga Yoashi omuzigo, baamufuula kyabazinga, era baakuba mu ngalo nga bwe bakoba bati: “Kyabazinga ghangaala!”

¹³ Athalia bwe yawulira okuleekaana kw'abakuumi n'okw'abantu abandi, yaaja mu isinzizo abantu ye baali beesololeiza.

¹⁴ Okuja okulinga ati, ng'abona kyabazinga ayemereire gha mpango, agheemerera kyabazinga ng'empisa bweyali, ng'abafuuyi b'amagwala bamuli kumpi. Era ng'abantu boonaboona bali kusagamba nga bwe bafuuwa amagwala. Agho Athalia yaakanulamu ebivaalo bye olw'okunakughala, nga bw'akoba ati: “Mundiiremu olukwe! Mundiiremu olukwe!”

¹⁵ Yehoiada tiyayenda Athalia bamwitire mu isinzizo lya Musengwa Katonda. Kale yaalagira abaduumizi b'eigye, ati: “Mumufulumye nga mumubikiza mu nhiriri dh'abaisirukale, era omuntu yeenayeena agezaaku okumutoola mu nhiriri, mumwite bwite.”

¹⁶ Agho baagema Athalia, baamutwala ku mulyango embalaasi ghe dhingirira mu kisaagaati kya kyabazinga, baamwitira eyo.

Yehoiada aiza ebintu obuyaaka

¹⁷ Yehoiada kabona yaaleetera kyabazinga n'abantu, okukola endagaano ni Musengwa Katonda ekakasa nga bwe baidha okubanga abantu aba Musengwa Katonda. Era yaakola endagaano ghagati gha kyabazinga n'abantu.

¹⁸ Agho abantu boonaboona baaja baingira mu isabo lya Baali, baalimenhagho. Era baamenhamenha alutaari n'ebifaananie bye. Ni kabona we eyayetebwanga Mattani, baamwitira emberi w'alutaari. Yehoiada kabona yaataagho abakuumi okukuumanga eisinzizo lya Musengwa Katonda.

¹⁹ Agho Yehoiada oyo, n'abaduumizi b'abakuumi ekikumi ekikumi aba kyabazinga, n'abakulira abakuumi b'ekisaagaati kya kyabazinga, era n'abantu boonaboona, baatoola kyabazinga mu isinzizo baamutwala mu kisaagaati kya kyabazinga, nga babitira mu Mulyango ogw'Abakuumi. Kyabazinga yaaja yaatyama ku kityamo eky'obwakyabazinga.

²⁰ Agho abantu boonaboona baasagamba, ekibuga kyatereera, nga bamaze okwitira Athalia mu kisaagaati kya kyabazinga.

²¹ Yoashi yaafuuka kyabazinga wa Buyudaaya ng'agheza emyaka musanvu egy'obukulu.