2 Bakyabazinga 10 - Baibuli Ekibono kya Katonda 2014

Ab'endhu ya Ahabu baitibwa

¹ Ahabu yaliku abaana nsanvu mu kibuga Samaria. Kale Yehu yaaghandiika embaluwa, yaadhigheereza mu Samaria, eri abafuzi b'ekibuga, n'abakulembeze, n'abakuza ab'abaana n'abaidhukulu ba Ahabu, ng'akoba ati:

² “Mpegaano muli n'abaana aba musengwa waimwe, era mwaba n'ebigaali eby'omu lutalo, n'embalaasi, n'eby'okulwanisa, n'ebibuga ebyezungulwirwa ebimante ebigumu. Kale ni embaluwa eno olunaabatuukaku eti,

³ mulonde omwisuka mulala ku baana ba musengwa waimwe abo, asinga baine boonaboona era agwaniire, mumufuule kyabazinga, mulwanirire ab'endhu ya musengwa waimwe.”

⁴ Aye bale bwe baasoma embaluwa eyo, baatya ekibitiriire, baakoba bati: “Oba nga bakyabazinga ababiri, Yoramu ni Ahazia, tibaaghanga kumulwanisa, memale ife tunaaghanga tutya?”

⁵ Agho akulira ab'omu kisaagaati kya kyabazinga, n'abafuzi b'ekibuga, n'abakulembeze, n'abakuza ab'abaana, baagheereza obukwenda eri Yehu nga bakoba bati: “Ife tuli bagheereza bo, era twidha kukola byonabyona by'onaatulagira. Titwidha kutaagho muntu waire omulala ati okuba kyabazinga. Iwe kola kyonakyona ky'obona nga n'ekirungi.”

⁶ Yehu yaabaghandiikira embaluwa eyindi ng'akoba ati: “Oba nga muli ku luuyi lwange, era nga muli beetegefu okukola bye mbalagira, kale ni muteme emitwe ku baana ba musengwa waimwe, mugindeetere olwaidho e Yezireeli mu kiseera ng'oti ni kino.” Abaana abo ensanvu aba kyabazinga Ahabu, baali mu mikono gy'abantu abakologho ab'omu kibuga abaabalabiriranga.

⁷ Kale embaluwa ya Yehu bwe yabatuukaku, baatwala abaana abo boonaboona ensanvu baabaita, baata emitwe gyaibwe mu biibo, baagigheereza Yehu e Yezireeli.

⁸ Agho omukwenda yaidha, yaakobera Yehu ati: “Baleese emitwe egy'abaana ba kyabazinga Ahabu.” Yehu yaalagira ati: “Mugibunge mu mmungo ibiri ku mulyango ogwingira ekibuga, gibe agho okutuusa enkyo.”

⁹ Enkyo ku nkyo, yaafuluma yaakoba abantu boonaboona agho ku mulyango gw'ekibuga, ati: “Imwe muziraku musango. Ninze nakola olukwe ni ndhita musengwa wange. Aye naani eyaise bano boonaboona?

¹⁰ Kale ni mukimanhe nga buli kintu Musengwa Katonda kye yakoba ku b'endhu ya Ahabu, tikiriroba kutuukirira. Musengwa Katonda akoze ekyo kye yayogera ng'abita mu mugheereza we Eliya.”

¹¹ Agho Yehu yaita abaali nga bakaasigairegho ku b'endhu ya Ahabu abaali mu Yezireeli, n'abakungu ba Ahabu oyo, ni bakagwa be einho, ni bakabona be. Yehu tiyalekagho muntu waire omulala ati owa Ahabu nga mulamu.

Yehu aita ab'endhu ya Ahazia kyabazinga wa Buyudaaya

¹² Agho Yehu yaava e Yezireeli okuja e Samaria. Bwe yali ali mu ngira mu kifo ekyetebwa Endhu ey'Abaayi b'Entaama,

¹³ yaayagaanana n'ab'endhu ya Ahazia eyali kyabazinga wa Buyudaaya. Yaababuuza ati: “Niimwe baani?” Baamwiramu bati: “Ife tuli ba ndhu ya Ahazia. Tuli kuja Yezireeli okulamusa ku baana ba Yezebeli inhebantu, era n'abalangira n'abambeedha abandi.”

¹⁴ Yehu yaalagira ati: “Mubageme nga balamu.” Baabagema, baabaitira kumpi n'ekiina ekyali agho. Baali abantu amakumi ana na babiri (42), era ghazira waire omulala ku abo Yehu ye yalekagho nga mulamu.

Yehu aita ab'endhu ya Ahabu abaali basigairegho

¹⁵ Yehu bwe yava agho, yaayagaana Yehonadabu mutabane wa Rekabu ng'ali kwidha okumubona. Yehu yaamulamusa, yaamubuuza ati: “Iwe ninze tufaanania endowooza?” Yehonadabu yairamu ati: “N'ekyo kyene, isebo.” Yehu yaakoba ati: “Oba nga kityo bwekiri, kale mpe eno omukono gwo.” Yehonadabu yaamugha omukono gwe. Yehu yaamuniinisa mu kigaali kye eky'omu lutalo,

¹⁶ yaamukoba ati: “Idha tuje twembi, obone nga bwe neeghaireyo okutuukiriza ebya Musengwa Katonda.” Agho baajiira bombi mu kigaali kye eky'omu lutalo.

¹⁷ Bwe baatuuka e Samaria, Yehu yaita ab'endhu ya Ahabu boonaboona abaali bakaasigairegho mu Samaria, nga Musengwa Katonda bwe yakoba Eliya.

Yehu aita abasinza Baali

¹⁸ Agho Yehu yaayeta abantu boonaboona beesoloza, yaabakoba ati: “Ahabu yasinzanga omusambwa Baali katono, aye nze ndidha kugusinza okusingagho.

¹⁹ Kale ni mundhetere abalanzi aba Baali boonaboona, n'abamusinza boonaboona, ni bakabona be boonaboona. Ghatabulagho waire omulala ati, kuba ndi n'omusengo omukologho gwe nja okughaayo eri Baali. Kiisi anaabulagho ku abo aidha kwitibwa.” Aye Yehu yali ali kusala bwa magezi aghange okuzikiriza boonaboona abaali basinza Baali.

²⁰ Agho Yehu yaalagira ati: “Mulangirire olunaku abantu lwe baneesolokezaaku okusinza Baali.” Era baalulangirira.

²¹ Yehu yaayetesa mu Isiraeli mwonamwona abantu abasinza Baali. Baidha boonaboona, ghaaloba kubaayo waire omulala asigalayo. Agho baingira mu isabo lya Baali, lyonalyona lyaidhula.

²² Yehu yaakoba oyo akulira eiterekero ery'ebivaalo, ati: “Toolerayo abasinza Baali boonaboona ebivaalo, obibaghe.” Yaabibatoolerayo, yaabibagha.

²³ Agho Yehu ni Yehonadabu mutabane wa Rekabu, baingira mu isabo lya Baali. Yehu yaakoba abasinza Baali ati: “Mwagaaze mubone nga ghano mu imwe ghaziragho muntu yeenayeena asinza Musengwa Katonda, okutoolaku abasinza Baali bonka.”

²⁴ Agho baingira okughaayo omusengo n'ebigheebwayo ebyokebwa. Yehu yali ng'amaze okutaagho abasaadha kinaana kuliya kw'eisabo, ng'abakobye ati: “Oyo anaaleka omuntu yeenayeena okulumuka n'awona, mwene n'aidha okwitibwa mu kifo kye.”

²⁵ Yehu bwe yamala okughaayo ekigheebwayo ekyokebwa, yaakoba abakuumi n'abaduumizi ati: “Mwingire mubaite, ghalobe kubaagho alumuka kuwona waire omulala.” Kale baasowolayo empiima baabaita, emirambo baagisuula kuliya. Olwo abakuumi n'abaduumizi baingira mu kifo eky'omunda eky'eisabo lya Baali,

²⁶ baatoolamu empango ya Baali, baagyokya.

²⁷ Kale baamenhagho empango ya Baali eyo, era baamenhagho n'eisabo lye. Eisabo eryo ghe lyali, baafuulagho ekifo eky'okujangamu okweyamba, era kityo bwe kikaali ni ye buli eno.

²⁸ Atyo Yehu bwe yazikiriza okusinza Baali, n'akumaliragho irala mu Isiraeli.

²⁹ Aye ate yeena yakola ebibi ng'oti ni Yeroboamu mutabane wa Nebati bwe yakola, ebyaleetera Abaisiraeli okwonoona nga basinza ebifaananie eby'ente ento ebyakolebwa mu zaabu, ebyali e Betheli n'e Dani.

³⁰ Musengwa Katonda yaakoba Yehu ati: “Nga bw'okoze obukalamu ebyo bye nsiima, n'otuukiriza byonabyona bye nayenda okukola ab'endhu ya Ahabu, nkusuubiza nti ab'eizaire lyo okutuuka ku luse olwokuna, balityama ku kityamo eky'obwakyabazinga bwa Isiraeli.”

³¹ Aye Yehu yaaloba kufaayo kujiiranga ku mateeka ga Musengwa Katonda, Katonda wa Isiraeli n'omwoyo gwe gwonagwona, yaasigala ng'akaakola ebibi ng'oti ni Yeroboamu bye yakola, ebyaleetera Isiraeli okwonoona.

Yehu afa

³² Mu kiseera ekyo, Musengwa Katonda yaatoolera okukendeeza ku nsi Isiraeli. Hazaeli kyabazinga wa Siria yaaghangula ekiketezo kya Isiraeli kyonakyona:

³³ okuva ku mwiga Yorudani okuja mu bugwandhuba, ekiketezo eky'e Gileadi, n'eky'Abagadi, n'eky'Abareubeni, n'eky'Abamanasse, okuva ku kibuga Aroeri okumpi n'ekiiko ekirimu omwiga Arunoni ekyo nga n'ekiketezo kyonakyona eky'e Gileadi n'e Bashani.

³⁴ Ebindi byonabyona Yehu bye yakola, omuli n'ebyo bye yakola eby'amaani, byaghandiikibwa mu Kitabo ky'Ebyomubyanda bya Bakyabazinga ba Isiraeli.

³⁵ Agho Yehu yaafa, yeeyimba ku badhaadha be abaafa, era yaaziikibwa mu Samaria. Mutabane we Yehoahazi yaamusikira ku bwakyabazinga.

³⁶ Yehu yali ng'afugiire Isiraeli mu Samaria, okumala entangama ya myaka amakumi abiri na munaana.