1 Yoanne 5 - Baibuli Ekibono kya Katonda 2014

Okwikiriza n'okughangula ensi

¹ Kiisi aikiriza ati Yesu ni Kurisito aba ng'azaalibwa Katonda, era kiisi agonza omuzaire agonza ni y'azaala.

² Kino kye tumanhiraku nga tugonza abaana ba Katonda, bwe tugonza Katonda, ni tugema ebiragiro bye

³ kuba okugonza Katonda n'okuwulira ebiragiro bye, ate ebiragiro bye ti bikalangafu.

⁴ Oyo yeenayeena azaalibwa Katonda aghangula ensi, ate okwikiriza kwaife n'obughanguzi obughangula ensi.

⁵ Naani aghanga okughangula ensi okutoolaku oyo aikiriza nga Yesu Mwana wa Katonda?

Obudhulizi obugema ku Mwana

⁶ Yesu Kurisito ono n'eyaidhira mu maadhi era ni mu musaayi. Tiyaidhira mu maadhi gonka aye mu maadhi era ni mu musaayi. Mwoyo amughaaku obudhulizi, kuba Mwoyo n'amazima.

⁷ Abadhulizi bali basatu:

⁸ Mwoyo, amaadhi n'omusaayi, era boonaboona bagha obudhulizi n'obulala.

⁹ Oba twikiriza obudhulizi obw'abantu, obudhulizi obwa Katonda businga obwo. Kuba Katonda agha obudhulizi ku Mwana we.

¹⁰ Kale kiisi aikiriza Omwana wa Katonda aba n'obudhulizi buno mu mwoyo gwe era kiisi ataikiriza, Katonda amufuula muguya; kuba aba taikiriza budhulizi Katonda bwe yagha ku mwana we.

¹¹ Obudhulizi ni buno: Katonda yatugha obulamu obutawaagho era obulamu obwo buli mu Mwana we.

¹² Oyo ali ni Mwana, ali n'obulamu oyo azira Mwana wa Katonda, azira bulamu.

Okumanha obulamu obutawaagho

¹³ Mbaghandiikira ebintu bino, imwe abaikiriza mu liina ly'Omwana wa Katonda, mumanhe nga muli n'obulamu obutawaagho.

¹⁴ Ekitugumya nga tuli mu maiso ge ni kino nti kiisi kye tumusaba kasita kiba mu kwenda kwe, atuwulira.

¹⁵ Oba nga twidhi ng'atuwulira mu kiisi kye tuba tumusabye, era tuba twidhi nga tufuna bye tumusaba.

¹⁶ Omuntu yeenayeena bw'abona nga muganda we ali kukola ekibi ekitamutwala mu kuzikirira, asabenga Katonda aghe omuntu oyo obulamu. Nkoba abo abakola ebibi ebitatwala mu kuzikirira. Aye eriyo ebibi ebitwala mu kuzikirira. Ebyo ti ni bye nkoba okusabiranga.

¹⁷ Okukola ekitali kituufu kyonakyona kiba kibi aye eriyo ekibi ekitatwala mu kuzikirira.

¹⁸ Twidhi ng'oyo yeenayeena azaalibwa Katonda takola kibi, kuba oyo Omwana wa Katonda amukuuma, omubi yaaloba kumutuukaku.

¹⁹ Twidhi nga tuli ba Katonda era ng'ensi yoonayoona eri mu mikono gy'Omubi.

²⁰ Twidhi nga Omwana wa Katonda yaidha, era yaatugha okutegeera, tumanhe Katonda oyo ow'amazima. Era tuli mu oyo ow'amazima, mu Mwana we Yesu Kurisito. Ono ni Katonda mwene era n'obulamu obutawaagho.

²¹ Baana bange, mwekuume ebyo ebisinzibwa ebitali Katonda.