1 Yoanne 4 - Baibuli Ekibono kya Katonda 2014

Mwoyo owa Katonda ni mwoyo ow'omuzigu

¹ Bakagwa, mutaikirizanga buli mwoyo, aye mulebenga buli mwoyo mubone oba nga wa Katonda; kuba abalanzi kamaala abaguya basansaaniire mu nsi.

² Kuno kwe tumanhira Mwoyo owa Katonda: Mwoyo akoba ati Yesu Kurisito yaidha ng'omuntu, oyo aba wa Katonda.

³ Aye mwoyo yeenayeena akoba ati ekyo ti kituufu ku Yesu, taba wa Katonda era oyo mwoyo wa Muzigu wa Kurisito ye mwawulira muti aidha era nga na buti ali mu nsi.

⁴ Baana bange muli ba Katonda, abo abalanzi abaguya mwabaghangula, kuba ali mu imwe asinga ali mu nsi.

⁵ Abo ba mu nsi era boogera bya nsi, era ensi ebawulirisa.

⁶ Ife tuli ba Katonda, aidhi Katonda atuwulirisa era atali wa Katonda tatuwulirisa. Ekyo kye tumanhiraku Mwoyo ow'amazima ni mwoyo omuguya.

Katonda aba kugonza

⁷ Bakagwa, tugonzanienga, kuba okugonza kuva mu Katonda era agonza azaalibwa Katonda era aidhi Katonda.

⁸ Atagonza, aba taidhi Katonda kuba Katonda aba kugonza.

⁹ Katonda ati bwe yatwoleka okugonza kwe. Yatutumira Omwana we omulala bedengedenge mu nsi memale olwo tube abalamu ku lulwe.

¹⁰ Kuno ni n'okugonza, ti lwa kuba nga ife twagonza Katonda aye Katonda yatugonza era yaatuma Omwana we abe omutango olw'ebibi byaife.

¹¹ Bakagwa, oba nga Katonda yatugonza obwaga agho, ife twena tuteekwa okugonzania.

¹² Ghazira muntu yaali aboine ku Katonda, aye bwe tugonzania Katonda aba mu ife era okugonza kwe kutuukirira mu ife.

¹³ Kuno kwe tumanhira nga tuli mu oyo era nga yeena ali mu ife, kuba yatughaaku ku Mwoyo we.

¹⁴ Era twakibona, twakighaaku n'obudhulizi tuti Lata yatuma Omwana we okuba Omulokozi ow'ensi.

¹⁵ Kiisi akoba ati Yesu Mwana wa Katonda, Katonda amubaamu era yeena yaaba mu Katonda.

¹⁶ Twidhi era twikiriza okugonza kwa Katonda okuli mu ife. Katonda aba kugonza, era yeenayeena aba mu kugonza aba mu Katonda era ni Katonda yaamubaamu.

¹⁷ Mu nsambo eno okugonza okuli mu ife kwidhuulirizibwa, memale olwo twaba bagumu ku lunaku olw'okusalirwaku omusango kuba ng'oyo bw'ali, twena bwe tuli mu nsi muno.

¹⁸ Mu kugonza timuba kutya. Okugonza okwidhuvu kutoolagho okutya kwonakwona, kuba okutya kugemagana na kibonerezo, era oyo atya taba na kugonza kwidhuvu.

¹⁹ Tugonza kuba mwene n'eyasooka okutugonza.

²⁰ Omuntu yeenayeena bw'akoba ati agonza Katonda ate ng'akyagha muganda we, aba muguya kuba atagonza muganda we y'abonaku taghanga kugonza Katonda y'atabonangaku.

²¹ Era Kurisito yatugha ekiragiro kino ati: Kiisi agonza Katonda ateekwa okugonzanga ni muganda we yeena.