1 Timotheo 4 - Baibuli Ekibono kya Katonda 2014

Abeegeresa ab'obuguya

¹ Mwoyo akoba busimbalaala ati mu biseera ebija okwiririra abantu abandi baliva ku ndhikiriza ey'Ekikurisito, baajiira ku by'emizimu egiguya n'ebyo emizimu emibi bye gyegeresa.

² Bino bisansaanizibwa abantu abaguya, abaafa emyoyo ng'oti n'egyasiriizibwa ekyuma ekyengereire.

³ Abo n'abalobera abantu okubayiza oba okubayira, era ni babalobera eby'okulya ebindi Katonda bye yagha abaikiriza era abaidhi amazima, okubiryanga nga bamweyanza.

⁴ Kiisi kitonde ekya Katonda kikalamu era ghazira kya muziro, kasita kiriibwa n'okweyanza;

⁵ kuba olwo kitukuzibwa ekibono kya Katonda n'okusaba.

Omugheereza wa Kurisito omukalamu

⁶ Ebibono ebyo bw'onaabituusa ku boluganda, onaaba mugheereza wa Kurisito Yesu mukalamu, aliisibwa ebibono eby'amazima eby'endhikiriza n'endhegeresa enungi y'ojiiraku.

⁷ Weesambenga enfumo edhiziramu kutya Katonda, edhitagwanira na kughayaku. Wemanhirize okutyanga Katonda.

⁸ Kuba okumanhiriza omubiri eby'okukola kuganhula katono, aye okutya Katonda kuganhula mu buli nsambo. Kuba kuleeta eisuubi ery'omu bulamu buno, n'ery'obwo obuliidha.

⁹ Ekibono kino kituufu kyene, era kigwaine okwikiriza.

¹⁰ Kye tuva ni tufaabiikana era ni tufuba einho, lwa kuba eisuubi lyaife liri mu Katonda omulamu Omulokozi w'abantu boonaboona, aye okusingira irala ow'abo abaikiriza.

¹¹ Ebyo by'obe okubirizenga, era oyegeresenga abantu.

¹² Ole atakufuginkirizanga lwa buto bwo, aye oba nga kya kuboneraku eri abaikiriza, mu ndhogera, mu kwebisa, mu kugonza, mu kwikiriza, ni mu bwamufu.

¹³ Weemalire ku kusomeranga abantu Ebyaghandiikibwa, n'okubalambanga, n'okubeegeresa, okutuusa lwe ndiidha.

¹⁴ Otagayaalira kitone ky'oli nakyo, ekyakugheebwa bwe waisibwaku emikono abakulembeze b'abaikiriza ng'abalanzi bwe baalanga.

¹⁵ Ebyo bikolenga era obiisengaku omwoyo, olwo boonaboona babone nga bwe weeyongera okukola obukalamu.

¹⁶ Weekuume mu nsambo ye weebisaamu, era ni mu by'oyegeresa, era weekalangulire ku ebyo, kuba bw'okola otyo, olyerokola iwe mwene, era n'abo abakuwulira.