1 Timotheo 3 - Baibuli Ekibono kya Katonda 2014

Abalabirira Ekikunsu eky'Abaikiriza mu Kurisito

¹ Ekibono kino kituufu kyene ekikoba kiti: Kiisi eyeegomba okuba alabirira Ekikunsu eky'Abaikiriza mu Kurisito, aba yeegombye omulimo ogw'ekitiisa,

² Omulabirizi tateekwa kubaaku ni kye bamwogeraku. Ateekwa okuba n'omukazi mulala, ateekwa okuba nga yeefuga, ataamu amagezi mu by'akola, yeebisa bukalamu, asangaalira abageni, ate aidhi okwegeresa.

³ Ateekwa okuba nga ti mutamiivu, ti mukambwe, aye nga muwombeefu atakanamuka, era azira mairu ga kufuna.

⁴ Ateekwa okuba ng'aghanga bukalamu amaka ge, ng'akuuma abaana be nga bawulize era nga ba mpisa.

⁵ Kuba omuntu ataghanga kufuga maka ge, asobola atya okulabirira Ekikunsu eky'Abaikiriza mu Kurisito ekya Katonda?

⁶ Omulabirizi ateekwa okuba omuntu akakaite mu kwikiriza, alobe kweghanika nakusalirwa musango nga bwe gwasalirwa Sitaani ni gumusinga.

⁷ Era ateekwa okuba omuntu ateebwamu ekinhagansi, n'abo abatali mu Kikunsu ky'Abaikiriza mu Kurisito, alobe kubaaku ky'anenezebwa, na kugwa mu mutego gwa Sitaani.

Abagheereza mu Kikunsu eky'Abaikiriza mu Kurisito

⁸ Abagheereza mu Kikunsu eky'Abaikiriza mu Kurisito boona bateekwa okuba abantu abakalamu, ti baguya, ti batamiivu, era abatagwidhubanira bya kufuna.

⁹ Bateekwa okukalangula eby'endhikiriza ey'Ekikurisito n'omwoyo omunaabuufu.

¹⁰ Era basookenga kwekebeedhebwa, kikakasibwe nga baziraku kibanenezebwa, memale bakolenga ng'abagheereza.

¹¹ N'abakazi boona batyo bateekwa okuba abantu abakalamu, abatasalagania bibono, abasobola okwefuga, era abeesigwa mu buli kintu.

¹² Omugheereza ateekwa okuba n'omukazi mulala yenka, era ateekwa okuba ng'aghanga okufuga abaana be n'amaka ge bukalamu.

¹³ Kuba abakola obukalamu ng'abagheereza, bafuna ekifo kya ghaigulu, era baba bagumu mu kwikiriza kwaibwe mu Kurisito Yesu.

Ekyama eky'endhikiriza ey'Ekikurisito

¹⁴ Ndi kukughandiikira bino nga nsuubira okwidha amangu y'oli.

¹⁵ Aye bwenaaba nga ndwire, bino binaakumanhisa bwetugwaine okwebisa nga bwe tuli abantu ba Katonda, ekyo nga n'Ekikunsu eky'Abaikiriza mu Kurisito ekya Katonda omulamu, era ng'ekyo n'empango n'omusingi ogw'amazima.

¹⁶ Bwenebwene ekyama eky'endhikiriza yaife kikologho: “Yaboneka nga muntu mwene, yaakakasibwa Mwoyo, yabonebwa bamalaika. Yaalangirirwa mu maghanga, yaikirizibwa mu nsi yoonayoona, era yaatwalibwa mu igulu mu kitiisa.”