1 Timotheo 2 - Baibuli Ekibono kya Katonda 2014

Okusaba mu Kikunsu eky'Abaikiriza mu Kurisito

¹ Ekisookera irala kye mbakubiriza ni kino: Mweghembenga Katonda mumusabenga, mwewolerezenga era mweyanzenga ku lw'abantu boonaboona.

² Era musabirenga abafuzi ni boonaboona abali mu buyinza, olwo tube bukalamu nga tuli miraala, nga tutya Katonda era nga twebisa bukalamu.

³ Ekyo kikalamu, ni Katonda Omulokozi waife akisiima

⁴ era ayenda abantu boonaboona balokolebwe bamanhe amazima;

⁵ kuba ghaligho Katonda mulala ati, era oyo agemagania abantu ni Katonda ali mulala, n'oyo Omuntu Kurisito Yesu.

⁶ Oyo yeeghaayo olw'okununula abantu boonaboona. Ekyo kyakakasibwa mu kiseera kyakyo ekituufu.

⁷ Era ekyo n'ekyanteesaagho mbe omutume era omwegeresa ow'abamaghanga agandi, mbakobere eby'okwikiriza n'eby'amazima. Ndi kwogera mazima, tiri kuguya.

⁸ Kale, nhenda abasaadha, buli ghantu woonawoona beeghembenga Katonda, nga baghanika emikono gyaibwe emitukuvu, nga bazira busungu oba ntaka.

⁹ Era nhenda abakazi bavaalenga ebivaalo ebigwaniire, balobe kwemalira ku misono gya nviiri, na ku kwewoomya nga bavaala ebya zaabu oba amabaale ag'omughendo, oba ebivaalo eby'omughendo einho.

¹⁰ Mu kifo ky'ebyo, bakole ebikolwa ebikalamu, nga bwe kigwanira abakazi abaisa mu Katonda ekitiisa.

¹¹ Mu kwegeresebwa, omukazi ayegenga kasirise nga yewombeese.

¹² Tiganha mukazi yeenayeena kwegeresa, oba okulagira omusaadha, okutoolaku okuba agho ng'asiriike busirike.

¹³ Kuba Adamu n'eyasooka okutondebwa, memale kwairaku Eva.

¹⁴ Era Adamu ti n'eyasendebwasendebwa, aye omukazi n'eyasendebwasendebwa, n'agwa mu kibi.

¹⁵ Aye omukazi alilokolerwa mu kuzaala, kasita akalangukira mu kwikiriza, ni mu kugonza, ni mu butuukirivu, ni mu kwebisa obukalamu.