1 Samueli 9 - Baibuli Ekibono kya Katonda 2014

Saulo ayagaanana ni Samueli

¹ Ghaaligho omusaadha omukombe era nga mumanhifu, ow'omu kiketezo kya Benjamini, eriina lye nga ni Kishi. Kishi oyo yali mutabane wa Abieli, Abieli yaaba mutabane wa Zerori, Zerori yaaba mutabane wa Bekorathi, Bekorathi yaaba mutabane wa Afia eyali Omubenjamini.

² Kishi yali ni mutabane we eyayetebwanga Saulo, nga mulungi inho mu mboneka ye era nga mwisuka. Mu mboneka, nga ghazira amusinga bulungi mu Baisiraeli boonaboona. Okuva ku mabega ge okuja ghaigulu, yali asinga abantu boonaboona obuleeyi.

³ Agho edhindi ku ndogoyi dha Kishi lata wa Saulo, dhaali dhibuze. Kishi yaakoba mutabane we Saulo ati: “Twalaku owundi ku bagheereza, muje mwagale endogoyi edho.”

⁴ Baabita mu kiketezo ky'ensozi ekya Efuraimu ni mu kiketezo eky'e Shalisha, aye baaloba kudhibona. Baabita mu kiketezo eky'e Shalimu, aye nga dhizirayo. Era baabita mu kiketezo ekya Benjamini, aye baaloba kudhaagaana yo.

⁵ Bwe baatuuka mu kiketezo ky'e Zufu, yaakoba omugheereza we eyali naye ati: “Kola twireyo eka, kuba tughanga okuleetera lata wange okuva ku kulowooza ku ndogoyi, yaira ku kweraliikirira ife.”

⁶ Aye omugheereza yaamwiramu ati: “Bona eno, mu kibuga kino mulimu omuntu wa Katonda abantu ye baisaamu ekitiisa, era kiisi ky'ayogera kituukirira. Ka tuje y'ali, oba katyo anaatukobera eby'olugendo lwaife lwe tuli kutambula.”

⁷ Saulo yaabuuza omugheereza we ati: “Bwe tunaaja y'ali tunaamutwalira kirabo ki? Ensawo dhaife dhiwoiremu emere, ate tuzira kintu kyonakyona kya kumugha. Kiki kye tuli nakyo ghano?”

⁸ Omugheereza yairamu ati: “Ndi ghano n'akapiiya aka feeza. Ndidha kukagha omuntu wa Katonda oyo, atukobere ye tughanga okwagaana endogoyi edho.”

⁹ (Eira mu Isiraeli, omuntu bwe yajanga okwebuuza ye Katonda, ng'akoba ati: “Kola tuje y'omuboni.” Mu biseera ebyo omulanzi baamwetanga muboni.)

¹⁰ Saulo yairamu omugheereza ati: “Okobye bukalamu, kale tuje.” Agho baaja mu kibuga aghaabanga omuntu wa Katonda oyo.

¹¹ Bwe baali bali kuniinaniina akasozi batuuke mu kibuga, baayagaanana n'abaghala abaali bali kuva mu kibuga nga bali kuja kusena maadhi. Baababuuza bati: “Omuboni aliyo?”

¹² Abaghala baabairamu bati: “Aliyo, era wuuyo abakulembeiremu. Mwangugheku mumwagaane, yaakatuuka mu kibuga, kuba olwaleero abantu baja kughaayo omusengo mu kifo ekigulumivu eky'okusinzizaamu.

¹³ Bwe munaaba nga mwakaingira ekibuga, mwidha kumwagaana ng'akaali kuja kulya mu kifo ekigulumivu eky'okusinzizaamu. Abantu tibaidha kulya ng'akaali kutuuka, kuba n'ali n'okusabira omusengo enkabi, memale olwo abantu abeeteibwa baghange okulya. Kale ni muniineniine, mwidha kumubona mangu.”

¹⁴ Agho Saulo n'omugheereza we baaja mu kibuga. Bwe baali nga baakakingiramu, baabona Samueli ng'ali kufuluma ng'aidhira ye bali, olwo ng'ali kuja mu kifo ekigulumivu eky'okusinzizaamu.

¹⁵ Ng'ekaabulayo olunaku lulala memale Saulo aidhe, Musengwa Katonda yali ayoleike Samueli ekyama ng'akoba ati:

¹⁶ “Enkyo mu kiseera ng'oti ni kino, ndidha kugheereza y'oli omusaadha okuva mu kiketezo kya Benjamini. Oidha kumusiiga omuzigo, abe omukulembeze ow'abantu bange Abaisiraeli. Oyo n'alitoola abantu bange abo mu mikono gy'Abafilisiti, kuba mboine okudaazibwadaazibwa kwaibwe n'okulira kwaibwe kwatuuka ye ndi.”

¹⁷ Samueli bwe yabona Saulo, Musengwa Katonda yaamukoba ati: “Oyo n'omusaadha ye nakukobeireku. Oyo n'aidha okufuga abantu bange.”

¹⁸ Agho Saulo yaaseeta ye Samueli mu mulyango, yaamukoba ati: “Nkweghembye nkobera: endhu ey'omuboni eba gha?”

¹⁹ Samueli yaakoba Saulo ati: “Ninze omuboni. Buti nkulemberaamu tuje mu kifo ekigulumivu eky'okusinzizaamu, kuba oidha kulya ninze olwaleero. Enkyo ku nkyo ndidha kukukobera byonabyona ebikuli ku mwoyo, memale mbasiibule muje.

²⁰ N'endogoyi dhire edhimaze enaku eisatu nga dhibuze, otadheeraliikirira, kuba dhimaze okuboneka. Aye Abaisiraeli boonaboona naani ye bayayaanira einho? Ti niiwe, n'ab'omu ndhu ya lata wo yoonayoona?”

²¹ Saulo yairamu ati: “Nze ndi wa mu kika kya Benjamini, ekika ekisemberayo irala mu Isiraeli. Era endhu yaife n'esemberayo irala okumanhika mu kika kya Benjamini. Kale kiki ky'oviireku okunkoba otyo?”

²² Agho Samueli yaatwala Saulo n'omugheereza we, yaabaingiza mu kisenge ekinene, yaabatyamya mu kifo eky'emberi aghalala n'abageni abeete, abaali baghera ng'oti makumi asatu.

²³ Samueli yaakoba omufumbi ati: “Leeta emamba ye nakughaire, era ye nakukobye nti gitereke.”

²⁴ Agho omufumbi yaaleeta ekisambi n'ebyakiriku, yaakita mu maiso ga Saulo. Samueli yaakoba Saulo ati: “Eno n'emamba ye nakugisiire. Girye, kuba nagitoireku naagikugisira, oghange okugirya mu kaseera kano ghalala n'abageni be nayese.”

²⁵ Mu nsambo eyo Saulo yaaliira ghalala ni Samueli ku lunaku olwo. Bwe baava agho mu kifo ekigulumivu eky'okusinzizaamu, baaja mu kibuga. Baayalira Saulo obuliri ku ngulu kw'endhu, yaalambaala okwo.

Samueli asiiga Saulo omuzigo okumufuula kyabazinga

²⁶ Agho obwire nga buli kukya, Samueli yaayeta Saulo ghaigulu ku ndhu, ng'amukoba ati: “Situkagho nkusiibule oje.” Agho Saulo yaasitukagho, baafuluma bombi ni Samueli.

²⁷ Bwe baatuuka ekibuga ghe kikanga, Samueli yaakoba Saulo ati: “Koba omugheereza wo abitegho, ajenga emberi. Iwe oyemerereku ghano katono, nkumanhise Katonda ky'akobye.”