1 Samueli 8 - Baibuli Ekibono kya Katonda 2014

Abaisiraeli basaba okuba ni kyabazinga owaibwe

¹ Samueli bwe yakairigha, yaafuula batabane be abakulembeze ba Isiraeli.

² Eriina lya mutabane omuberi nga ni Yoeli ate owokubiri nga ni Abiya, era nga balamuzi mu Beerisheba.

³ Aye batabane ba Samueli abo tibeebisanga mu nsambo iseibwe ye yeebisangamu. Baajiiranga inho ku by'okufuna, n'okulya enguzi, era n'okusaliriza emisango.

⁴ Agho abakulu b'ebikunsu mu Isiraeli beesoloza baaja ye Samueli e Rama.

⁵ Baamukoba bati: “Bona eno, buti okairiighe, ate batabane bo tibeebisa mu nsambo iwe ye weebisaamu. Mperaano ni, tulondere kyabazinga atukulemberenga, tube ng'oti n'amaghanga agandi goonagoona bwe gali.”

⁶ Aye eky'okukoba bati: “Tughe kyabazinga atukulemberenga,” kyanakughaza Samueli. Kale Samueli oyo yaasaba Musengwa Katonda.

⁷ Musengwa Katonda yaamwiramu ati: “Wulirisa ebintu byonabyona abantu bye bali kukukoba, kuba ti niiwe ye balobye, aye ninze ye balobye okuba kyabazinga waibwe.

⁸ Nga bwe babairenga beebisa eri nze, okuviira irala lwe nabatoola mu Misiri okutuusa n'olwaleero, nga banvaaku baagheereza emisambwa, n'iwe weena bwe bali kukwebikizaaku.

⁹ Kale ni wulirisa kye bali kukukoba. Aye balabule bukalamu ku nsambo kyabazinga y'aja okubabisangamu.”

¹⁰ Kale Samueli yaakobera abo abaamusaba okubafunira kyabazinga, ebyo byonabyona Musengwa Katonda bye yamukoba.

¹¹ Yaabakoba ati: “Eno n'ensambo kyabazinga waimwe y'aja okubabisangamu: aidha kutwalanga batabane baimwe mu magye, abandi bakolenga ku bigaali bye eby'omu lutalo, abandi bavugenga embalaasi dhe, n'abandi balumukirenga ku bigere nga bakulembeiremu ebigaali bye eby'omu lutalo.

¹² Abandi aidha kubatangagho okuba abaduumizi b'ebikunsu eby'abaisirukale olukumi olukumi, n'abandi okuduumira ebikunsu eby'abaisirukale amakumi ataanu ataanu. Abandi aidha kubalimyanga mu masamba ge, bamukungulirenga ebirime bye, ate abandi bamugheekezenga eby'okulwanisa n'ebikozesebwa ku bigaali bye eby'omu lutalo.

¹³ Aidha kutwalanga baghala baimwe bamukolerenga eby'obuwoowo, era bamufumbirenga emere n'emigaati.

¹⁴ Aidha kutoolanga amasamba gaimwe agasinga bulungi ag'emizabbibu n'ag'emiti emyoliva, agaghe abagheereza be.

¹⁵ Aidha kutoolanga ekitundu kirala kirala ku buli bitundu ikumi eby'emere yaimwe ey'empeke, era atoolenga n'ekitundu kirala ku buli bitundu ikumi eby'ebibala byaimwe eby'emizabbibu, abighe abakungu be n'abagheereza be.

¹⁶ Aidha kutwalanga abagheereza baimwe abasaadha n'abakazi abakozesenga emirimo gye, era n'ente n'endogoyi dhaimwe edhisinga bulungi.

¹⁷ Aidha kutwalanga ensolo ndala ku buli nsolo dhaimwe eikumi dhe munaayayanga, era mwidha kubanga bairu be.

¹⁸ Mu kiseera ekyo mulirira olwa kyabazinga waimwe, beene ye mwerondera, aye Musengwa Katonda talibairamu.”

¹⁹ Aye abantu baaloba kuwulirisa Samueli bye yabakoba, era baakoba bati: “Busa! Ife twidha kuba ni kyabazinga anaatufuganga,

²⁰ olwo twena tube ng'oti n'amaghanga agandi goonagoona. Kyabazinga oyo aidha kutufuganga era atukulemberenga atulwaniregho entalo dhaife.”

²¹ Samueli bwe yamala okuwulira byonabyona abantu bye baakoba, yaaja yaabikobera Musengwa Katonda.

²² Era Musengwa Katonda yaamwiramu ati: “Kola kye bali kwenda, obateeregho kyabazinga.” Agho Samueli yaakoba abantu ati: “Kale, buli muntu aireyo ewaibwe.”