1 Samueli 7 - Baibuli Ekibono kya Katonda 2014

¹ Agho abantu ab'e Kiriathi Yearimu baanona Esanduuku ya Musengwa Katonda, baagitwala mu ndhu ya Abinadabu ku lusozi. Era baayawula mutabane we Eleazari okugirabiriranga.

Samueli akulembera Isiraeli

² Esanduuku ey'Endagaano ya Musengwa Katonda yamala ekiseera kinene ng'eri mu Kiriathi Yearimu emyaka ng'oti makumi abiri. Abaisiraeli baamala ekiseera ekyo nga balirira Musengwa Katonda abayambe.

³ Agho Samueli yaakoba Abaisiraeli boonaboona ati: “Oba nga mwenda okukyuka okwira ku Musengwa Katonda n'omwoyo gwaimwe gwonagwona, mutoolegho emisambwa egy'amaghanga agandi gyonagyona era mutoolegho n'ebifaananie eby'omusambwa omukazi Ashitarothi. Mwegheereyo irala eri Musengwa Katonda, yenka ye mube mugheereze. Aidha kubawonia Abafilisiti.”

⁴ Kale Abaisiraeli baatoolagho ebifaananie by'emisambwa Baali ni Ashitarothi, baagheereza Musengwa Katonda yenka.

⁵ Agho Samueli yaakoba ati: “Musoloze Abaisiraeli boonaboona, baje e Mizipa. Nze ndidha kubasabira ye Musengwa Katonda.”

⁶ Kale beesololeza e Mizipa, baasena amaadhi baagafuka agho mu maiso ga Musengwa Katonda, ng'ekigheebwayo. Baasiiba ku lunaku olwo, era baakoba bati: “Twakola ekibi ye Musengwa Katonda.” Eyo e Mizipa, Samueli ye yalamuliranga Abaisiraeli.

⁷ Abafilisiti bwe baawulira bati Abaisiraeli beesoloiza e Mizipa, abafuzi ab'Abafilisiti abo baaja baalumba Abaisiraeli. Era Abaisiraeli bwe baakiwulira, baatya inho Abafilisiti abo.

⁸ Abaisiraeli baakoba Samueli bati: “Otalekera kweghemba Musengwa Katonda waife, atuwonie Abafilisiti.”

⁹ Kale Samueli yaatoola entaama ekaayonka yaagiita, yaagighaayo eri Musengwa Katonda ng'ekigheebwayo ekyokebwa kyonakyona ni kiwaagho. Samueli oyo yaalirira Musengwa Katonda ku lwa Isiraeli, era Musengwa Katonda yaamwiramu.

¹⁰ Samueli bweyali ali kughaayo ekigheebwayo ekyokebwa, Abafilisiti baaseeta nga benda okulumba Abaisiraeli. Aye ku lunaku olwo, Musengwa Katonda yaakaabukira Abafilisiti n'amamiro ag'amaani ng'oti kutyabuka kwa lukuba. Abafilisiti baatabulwatabulwa olw'okutya, era baalumuka Abaisiraeli.

¹¹ Abaisiraeli baava e Mizipa, baabingirira Abafilisiti nga baja bwe babaita, okubatuukiza irala e Bethikari.

¹² Agho Samueli yatoola eibaale yaalisimba ghagati wa Mizipa ni Sheni, yaalituuma eriina Ebenezeri ng'akoba ati: “Musengwa Katonda atuyambye okutuusa mperaano.”

¹³ Kale Abafilisiti baaghangulwa batyo, baaweeramu irala amaani. Era Musengwa Katonda yaabalemesa okulumba ensi y'Abaisiraeli ekiseera kyonakyona Samueli kye yamala nga mulamu.

¹⁴ N'ebibuga byonabyona Abafilisiti bye baali banhaze ku Baisiraeli, ebiri ghagati gha Ekuroni ni Gathi, byairira Abaisiraeli. Kale Isiraeli yeiriza ebiketezo byayo byonabyona, era ghaabaagho emiraala ghagati gh'Abaisiraeli n'Abamori.

¹⁵ Samueli yaakulembera Isiraeli ekiseera kyonakyona kye yamala nga mulamu.

¹⁶ Buli mwaka yaajanga mu ngobo e Betheli, e Giligali, n'e Mizipa, yaalamuliranga Abaisiraeli mu bifo ebyo.

¹⁷ Bwe yamalanga, yairayo e Rama, n'eyabanga amaka ge. Era eyo yoona yaalamulirangayo Abaisiraeli, era yaazimbirayo Musengwa Katonda alutaari.