1 Samueli 6 - Baibuli Ekibono kya Katonda 2014

Esanduuku ey'Endagaano bagiiza

¹ Esanduuku ya Musengwa Katonda yamala emyezi musanvu ng'eri mu nsi ey'Abafilisiti.

² Agho Abafilisiti baayeta bakabona n'abalaguzi, baababuuza bati: “Esanduuku y'Endagaano ya Musengwa Katonda tugikolere ki? Mutukobere kye tunaagiizaayo nakyo, eireyo mu kifo kyayo?”

³ Baabairamu bati: “Bwe munaaba nga mwizaayo Esanduuku ey'Endagaano ya Katonda wa Isiraeli, timwidha kugiizaayo ndhereere. Mu buli ngeri muli n'okugiizaayo ye Katonda oyo ghalala n'ekigheebwayo ng'omutango. Olwo mwidha kuwona era mumanhe lwaki abaire ababonerezanga nga tasalaku.”

⁴ Abafilisiti baababuuza bati: “Kigheebwayo ki kye tunaamugheereza ng'omutango?” Baabairamu bati: “Ebiwumbe ebya zaabu bitaanu ebifaanana ng'oti bizimba, n'ebiwumbe ebindi ebya zaabu bitaanu ebifaanana ng'oti mpube, nga mujiira ku bungi obw'abafuzi Abafilisiti kuba ekibamba Katonda kye yasindika ku imwe mwenamwena, n'ekirala ekyo kye yasindika ni ku bafuzi baimwe.

⁵ Kale ni mukole ebiwumbe ebifaanana ng'oti n'ebizimba byaimwe n'ebindi ebifaanana ng'oti n'empube dhaimwe edhiri kwitaitana ensi. Olwo mwise ekitiisa mu Katonda wa Isiraeli, memale katyo oba anaalekera agho okubabonereza imwe, n'emisambwa gyaimwe, era n'ensi yaimwe.

⁶ Lwaki mwenda okukalangusa emyoyo gyaimwe ng'Abamisiri ni kyabazinga waibwe bwe baakola? Katonda bwe yababonereza n'abamalamu, tibaalwa eira ni baleka Baisiraeli kuva mu Misiri ni baja?

⁷ Kale mpegaano mutegekeyo ekigaali eky'okutambuliraku ekiyaaka, mukisibeku ente ibiri edhikamwa, dhe batasibangaku kikoligo. Enhana dhaadho mudhidhitooleku, mudhiizeeyo eka.

⁸ Memale mute Esanduuku ey'Endagaano ya Musengwa Katonda ku kigaali ekyo. N'ebiwumbe bire ebya zaabu, bye muli kugheereza Musengwa Katonda bibe ekigheebwayo ng'omutango, mubite mu sanduuku eyindi, mugiriinaanie Esanduuku ya Musengwa Katonda. Olwo musame ente dhighaluze ekigaali, mudhireke Esanduuku ya Musengwa Katonda eje y'eyenda.

⁹ Agho mugiringirire: Bw'enaasimbira e Bethi Shemeshi mu nsi yaayo, kiidha kumanhika nga Katonda w'Abaisiraeli n'atukoze akabi akanene katyo. Aye bwe kitaba kityo, olwo twidha kumanha tuti ebibonerezo ebyatutuukaku, byatugwaku bugwe.”

¹⁰ Kale abantu baakola batyo. Baatoola ente ibiri edhikamwa baadhisiba n'ekikoligo ku kigaali eky'okutambuliramu, era baigaliza enhana dhaadho eka.

¹¹ Baata Esanduuku ey'Endagaano ya Musengwa Katonda ku kigaali ekyo, n'esanduuku ere ye baataamu ebiwumbe bya zaabu ebifaanana ng'oti mpube, ni bire ebifaanana ng'oti n'ebizimba byaibwe.

¹² Agho dhaatambula butereevu nga dhigemye luguudo lulala lwonka oluja e Bethi Shemeshi. Dhaaja nga dhimoola, aye dhaaloba kukyukiraku ku luuyi lwa mukono musaadha oba lwa mugooda. Abafuzi ab'Abafilisiti baaja nga badhinonereza okutuukira irala ku nsalosalo ey'e Bethi Shemeshi.

¹³ Abantu ab'e Bethi Shemeshi baali nga bali kukungula ngaano mu kiiko. Baaja okusitula amaiso bati, nga babona Esanduuku ey'Endagaano ya Musengwa Katonda. Agho baasagamba inho okugibona.

¹⁴ Ekigaali kyaidha kyatuuka mu musiri ogw'omuntu ayetebwa Yoshua ow'e Bethi Shemeshi, kyayemerera agho kumpi n'eibaale eikologho. Abantu baayasaaga emiti egy'ekigaali, baaghaayo ente edho ng'ekigheebwayo ekyokebwa eri Musengwa Katonda.

¹⁵ Abalevi baabbeeda Esanduuku ey'Endagaano ya Musengwa Katonda, n'esanduuku ere eyali nayo omwali ebiwumbe ebya zaabu, baadhita ku ibaale eryo eikologho. Abantu ab'e Bethi Shemeshi baidha baaghaayo eri Musengwa Katonda ebigheebwayo ebyokebwa n'emisengo, ku lunaku olwo.

¹⁶ Abafuzi ab'Abafilisiti bwe baamala okubona ebyo, bairayo mu Ekuroni ku lunaku olwo.

¹⁷ Bino n'ebiwumbe ebyakolebwa nga bifaanana ng'oti bizimba, Abafilisiti bye baagheereza Musengwa Katonda bibe ekigheebwayo ng'omutango: ekirala olw'ekibuga Ashidodi, ekindi olw'ekibuga Gaza, n'ekindi olw'ekibuga Ashikeloni, n'ekindi olw'ekibuga Gathi, era n'ekindi olw'ekibuga Ekuroni.

¹⁸ Era baagheereza n'ebiwumbe ebya zaabu ebyakolebwa nga bifaanana ng'oti mpube, nga byagayaga n'obungi bw'ebibuga byonabyona ebyafugibwanga abafuzi b'Abafilisiti abataanu ebyali nga byezungulwirwa ebimante ebigumu, era n'ebyalo ebiziraku bimante. Eibaale eikologho kwe baata Esanduuku ya Musengwa Katonda mu musiri gwa Yoshua ow'e Bethi Shemeshi, likaaligho ni ye buli eno, okukakasa ebyo ebyaligho.

¹⁹ Agho Musengwa Katonda yaita abantu ab'e Bethi Shemeshi nsanvu, olw'okuba baalinga mu Sanduuku ey'endagaano ye. Abantu baalira inho olwa Musengwa Katonda okwita abantu abangi batyo.

Esanduuku ey'Endagaano ng'eri mu Kiriathi Yearimu

²⁰ Agho abantu ab'e Bethi Shemeshi baakoba bati: “Naani aghanga okuba mu maiso ga Musengwa Katonda ono omutukuvu? Era anaaja w'ani atuveeku?”

²¹ Kale baatuma abakwenda y'abantu ab'e Kiriathi Yearimu, okubakoba bati: “Abafilisiti baiziiza Esanduuku ya Musengwa Katonda. Mwidhe muginone.”