1 Samueli 5 - Baibuli Ekibono kya Katonda 2014

Esanduuku ey'Endagaano ng'eri mu Bafilisiti

¹ Abafilisiti bwe baamala okunhaga Esanduuku ey'Endagaano ya Katonda baagitoola mu Ebenezeri, baagitwala mu Ashidodi.

² Baagitwala baagita mu isabo lya omusambwa gwaibwe Dagoni, era baagita kumpi n'omusambwa ogwo.

³ Abantu ab'omu Ashidodi bwe baasitukagho ku nkyo ku lunaku olwairirira, baaja okubona ng'ekiwumbe eky'omusambwa Dagoni kigwire n'obweni bwakyo bwatuuka ku itaka, emberi w'Esanduuku ey'Endagaano ya Musengwa Katonda. Agho baakibbeeda baakiiza mu kifo kyakyo.

⁴ Aye bwe baasitukagho ku nkyo ku lunaku olundi olwairirira, baaja okubona ng'ekiwumbe eky'omusambwa Dagoni kabiri kigwire n'obweni bwakyo bwatuuka ku itaka, emberi w'Esanduuku ey'Endagaano ya Musengwa Katonda ng'omutwe n'emikono bikutwikeku, nga bigwire gha mulyango. Ekiwumbe eky'omusambwa Dagoni ogwo, kyasigala kiwuduwudu kyereere.

⁵ Eyo n'ensonga lwaki bakabona b'omusambwa Dagoni era n'abantu boonaboona, batuuma gha mulyango agho mu Ashidodi, baaloba kuniinagho ni ye buli eno.

⁶ Agho Musengwa Katonda yaabonereza inho abantu ab'omu Ashidodi, yaabaleetera okutya einho era yaabasindikira okulwala ebizimba.

⁷ Abantu ab'omu Ashidodi bwe baabona nga biri bityo, baakoba bati: “Esanduuku ey'Endagaano ya Katonda wa Isiraeli eteekwa kutuvaamu, kuba ali kutubonereza inho ife era n'omusambwa gwaife Dagoni.”

⁸ Kale baatuma abakwenda, baayeta abafuzi ab'Abafilisiti boonaboona. Agho baababuuza bati: “Esanduuku ey'Endagaano ya Katonda wa Isiraeli tugikolere ki?” Bale bairamu bati: “Etwalibwe e Gathi.” Kale baatwala Esanduuku ey'Endagaano ya Katonda e Gathi.

⁹ Aye olwagituusa e Gathi bati, Musengwa Katonda yaatoolera okubonereza ekibuga ekyo. Yaabaleetera okutya einho, era yaabasindikira okulwala ebizimba byabafukumukaku boonaboona, abakulu n'abato.

¹⁰ Kale Esanduuku ey'Endagaano ya Katonda baagigheereza mu Ekuroni. Aye olwagituusaayo bati, abantu baayo baaleekaana bati: “Batuleeteire Esanduuku ey'Endagaano ya Katonda wa Isiraeli okutwita ife n'abantu baife!”

¹¹ Agho baatuma, baayeta abafuzi ab'Abafilisiti boonaboona, baabakoba bati: “Mwizeeyo Esanduuku ey'Endagaano ya Katonda wa Isiraeli mu kifo kyayo y'eba, erobe kutwita ife n'abantu baife.” Ghaaligho okutya einho ekibitiriire mu kibuga kyonakyona, kuba Katonda yali ali kubabonereza inho.

¹² Abo abataafa Katonda yabasindikira okulwala ebizimba. Agho abantu ab'omu kibuga baalira, era okulira kwaibwe kwatuuka mu igulu.