1 Samueli 4 - Baibuli Ekibono kya Katonda 2014

Esanduuku ey'Endagaano baginhaga

¹ Agho Abaisiraeli baaja okulwana n'Abafilisiti. Baasimba weema dhaibwe mu kifo ekyetebwa Ebenezeri, ate Abafilisiti baasimba edhaibwe mu Afeki.

² Abafilisiti beetegeka mu nhiriri okulwanisa Abaisiraeli, era olutalo bwe lweyongera okutaama Abafilisiti baaghangula Abaisiraeli, era baabaitamu abantu ng'enkumi ina mu irwaniro.

³ Abalwani Abaisiraeli abaawonagho bwe baira ghe baasimba weema dhaibwe, abakulu baibwe beebuuzagania bati: “Olwaleero lwaki Musengwa Katonda atughaireyo Abafilisiti ni batughangula obwaga agho? Ka tuje tuleete Esanduuku ey'Endagaano ya Musengwa Katonda okuva e Shilo, Musengwa Katonda aidhe abe ghalala n'ife, atuwonie abazigu baife.”

⁴ Kale baatuma abakwenda e Shilo, baatoolayo Esanduuku ey'Endagaano ya Musengwa Katonda, oyo Afuga Amagye era atyama ku bitonde ebiri n'amaghagha ebyetebwa kerubi. Batabane ba Eli bombi, Hofuni ni Finehasi, boona baidhira ghalala n'Esanduuku y'Endagaano ya Katonda.

⁵ Esanduuku y'Endagaano ya Musengwa Katonda bwe yatuuka mu kifo Abaisiraeli ghe baasimba weema dhaibwe, Abaisiraeli boonaboona bakuba emizira egy'amaani, n'ensi yaatengeeta.

⁶ Abafilisiti bwe baawulira okukuba emizira okw'amaani kutyo, beebuuzagania bati: “Okukuba emizira okw'amaani okwo okuli mu Baisiraeli kutegeeza ki?” Era bwe baakitegeera bati Sanduuku ey'Endagaano ya Musengwa Katonda n'eyali etuuse mu kifo Abaisiraeli ghe baasimba weema dhaibwe,

⁷ Abafilisiti abo baatya, nga bakoba bati: “Omusambwa gwidhie mu Baisiraeli. Tukagwireku, kuba ekintu ng'oti n'ekyo tikibangaghooku.

⁸ Tukagwireku! Naani anaatuwonia emisambwa egyo egy'amaani gityo? Egyo n'emisambwa egyaita Abamisiri nga gibasindikira ebibamba ebya buli nsambo mu irungu.

⁹ Imwe Abafilisiti, mugume, mulwane kisaadha, mulobe kufuuka bairu ba Baisiraeli, nga beene bwe baali abairu baimwe. Mugume, mulwane kisaadha!”

¹⁰ Kale Abafilisiti baalwana era baaghangula Abaisiraeli. Abaisiraeli baalumuka, buli muntu yairayo mu maka ge. Era abantu abaitibwa baali kamaala inho, kuba abalwani b'Abaisiraeli ab'oku bigere baafaamu emitwalo esatu (30,000).

¹¹ Esanduuku ey'Endagaano baaginhaga, ni batabane ba Eli bombi, Hofuni ni Finehasi, baabaita.

Eli afa

¹² Agho omuntu ow'omu kika kya Benjamini, yaalumuka ng'ava mu lutalo, yaaja yaatuuka e Shilo ku lunaku lwene olwo, ng'akanwiremu ebivaalo bye, era ng'asiize eitaka mu mutwe gwe, olw'enaku.

¹³ Bwe yatuuka, yaayagaana Eli ng'atyaime ku kityamo kye agho ku mbali ku luguudo ng'alingiriire oluguudo kuba omwoyo gwali guli kumutengera olw'Esanduuku y'Endagaano ya Katonda. Omusaadha oyo bwe yatuuka mu kibuga n'akobera abantu amawulire ago, abantu boonaboona baakuba enduulu baalira.

¹⁴ Eli bwe yawulira okulira okwo, yaabuuza ati: “Okwasiikana okwo kwaki?” Agho omuntu ole yaayangughaku, yaidha okumukobera.

¹⁵ Eli yali agheziiza emyaka kyenda na munaana (98) egy'obukulu, era ng'ekifu kyamugema ku maiso, takaabona bukalamu.

¹⁶ Agho omuntu ole yaamukoba ati: “Ninze ndeese amawulire okuva mu lutalo. Nnumwikeyo lwaleero lwene luno.” Eli yaamubuuza ati: “Mwana wange, bijiire bitya?”

¹⁷ Ole eyaleeta amawulire yaamwiramu ati: “Abaisiraeli balumwike Abafilisiti, era Abaisiraeli kamaala inho babaise. Batabane bo bombi, Hofuni ni Finehasi, babaise, n'Esanduuku y'Endagaano ya Katonda baginhaze.”

¹⁸ Ole bwe yayogera ku ky'Esanduuku ey'Endagaano ya Katonda, Eli yaaghanuka ku kityamo kye, yaagwa kya mugongo kumpi n'omulyango. Olw'okuba yali mukaire era nga munene, bwe yagwa yaamenheka enkoto era yaafa. Yali amaze entangama ya myaka amakumi ana ng'akulembera Isiraeli.

Namwandu wa Finehasi afa

¹⁹ Agho mukaamwana wa Eli, muka Finehasi, yali ng'alinda era ng'ali kumpi kuzaala. Bwe yawulira ati Esanduuku ya Katonda baginhaze, era ati nhazaala we n'iba bafiire, ebisa byaidha, yaafukamira yaazaala.

²⁰ Bwe yali ali kumpi okufa, abakazi abaali bali kumulabirira baamukoba bati: “Guma, kuba ozaire omwana mulenzi.” Aye tiyabairamu waire okubafaaku.

²¹ Yaatuuma omwana eriina Ikabodi, ng'akoba ati: “Ekitiibwa kiviire ku Isiraeli”, olw'okuba Esanduuku ya Katonda baaginhaga, n'olw'okuba nhazaala we yafa, era n'iba baamwita.

²² Yaakoba ati: “Ekitiibwa kiviire ku Isiraeli, kuba Esanduuku ya Katonda baginhaze.”