1 Samueli 30 - Baibuli Ekibono kya Katonda 2014

Olutalo ghagati gha Daudi n'Abamaleki

¹ Agho Daudi n'abasaadha be baatuuka e Zikulaga ku lunaku olwokusatu. Baayagaana nga Abamaleki balumbye ekiketezo kya Buyudaaya ekikalukalu ku luuyi olw'omukono omusaadha olw'e buvandhuba, era nga balumbye n'ekibuga Zikulaga baakighangula, baakyokya omuliro.

² Era baanhaga abakazi ni boonaboona abaakirimu, abato n'abakulu. Tibaita muntu yeenayeena, aye baabanhaga bunhage baaja nabo.

³ Daudi n'abasaadha be bwe baatuuka mu kibuga, baayagaana nga bakyokiikya omuliro era nga bakazi baibwe, ni batabane baibwe, ni baghala baibwe, babatwaire nga banhage.

⁴ Agho Daudi n'abantu be yali nabo baatimbuka baalira amaziga mangi, okutuusa amaani agalira bwe gaabawaamu.

⁵ Ni baka Daudi bombi, Ahinoamu ow'e Yezireeli ni Abigaili namwandu wa Nabali ow'e Karumeli, boona baali babatwaire nga banhage.

⁶ Daudi yaaba mu buzibu obutaloodheka, kuba abantu baakoba okumukuba amabaale. Abantu boonaboona baali banakughavu, nga balumirwa batabane baibwe ni baghala baibwe. Aye Daudi yaafuna amaani mu kwesiga Musengwa Katonda we.

⁷ Daudi oyo yaakoba Abiathari kabona mutabane wa Ahimeleki ati: “Ndeetera ekivaalo eky'obwakabona.” Abiathari yaaleeta ekivaalo eky'obwakabona eri Daudi.

⁸ Daudi yeebuuzaaku ku Musengwa Katonda ati: “Mingirire abanhazi abo? Nnaabagema?” Musengwa Katonda yaamwiramu ati: “Babingirire, kuba bwenebwene oidha kubagema era onunule abanhage.”

⁹ Kale Daudi n'abasaadha olukaaga (600) abaali naye, baaja. Bwe baatuuka ku kaiga Besori, abandi baasigala agho.

¹⁰ Aye Daudi yeeyongerayo n'abasaadha ebikumi bina, kuba abasaadha ebikumi ebibiri baali bakooye inho, nga tibaghanga kusomoka kaiga Besori, kale n'okusigala agho.

¹¹ Abasaadha abaaja ni Daudi baayagaana Omumisiri mu irungu, baamuleeta ye Daudi. Baamugha emere yaalya, era baamugha n'amaadhi yaanhwa.

¹² Baamugha n'ekitole ky'ebibala ebikaziibwa eby'emitiini, era n'obufaaganda obw'emizabbibu obukaziibwa bubiri. Bwe yamala okulya yairamu amaani, kuba yali amaze enaku isatu, omusana n'obwire, nga talya ku mere waire okunhwa ku maadhi.

¹³ Daudi yaamubuuza ati: “Musengwa wo naani? Era ova gha?” Omumisiri yairamu ati: “Nze ndi mwisuka Mumisiri, omugheereza w'Omuamaleki. Musengwa wange yandekulira ghano kuba nalwala, buti ghabiseegho enaku isatu.

¹⁴ Twalumba ekiketezo ekikalukalu eky'Abakerethi, n'ekya Buyudaaya ku luuyi olw'omukono omusaadha olw'e buvandhuba, n'ekya Kalebu, era twayokya ekibuga Zikulaga omuliro.”

¹⁵ Daudi yaamubuuza ati: “Oghanga okuntwala eri abanhazi abo?” Omwisuka yairamu ati: “Ndayirira mu liina lya Katonda nga toidha kundhita oba okumpaayo mu ngalo dha musengwa wange, olwo ndidha kukutwala eri abanhazi abo.”

¹⁶ Omwisuka Omumisiri oyo yaatwala Daudi eri abanhazi abo. Baabaagaana nga basansaaniire agho woonawoona, nga bali kulya, bali kunhwa, era nga bali kukina. Baali mu kusagamba olw'omunhago omungi gwe baatoola mu nsi Bufilisiti ni Buyudaaya.

¹⁷ Agho nga buli kuziba, Daudi yaabalumba yaabalwanisa okutuusa eigulo ery'olunaku olwairirira. Ghazira yawonagho okutoolaku abaisuka ebikumi ebina (400) abaaniina engamiya ni balumukagho.

¹⁸ Daudi yaiza abantu boonaboona, n'ebintu byonabyona Abamaleki bye baali banhaze. Era yaiza ni bakazi be bombi.

¹⁹ Ghazira kintu kyonakyona kyabula, ka kibe ekinene oba ekitono, ka babe abaana abalenzi oba abaghala, ka gube omunhago oba ekintu kyonakyona Abamaleki kye baali batwaire byonabyona Daudi yabiiza.

²⁰ Daudi era yaanhaga entaama, n'embuzi, n'ente ebyo byonabyona baabikulembezaamu, nga mwene ali kubivaaku einhuma. Era baakoba bati: “Guno munhago gwa Daudi.”

²¹ Agho Daudi yaaja eri abasaadha bale abaasigala ku kaiga Besori, abataaghanga kuja naye olw'okuba abakoowu einho. Baavaayo okumweisuusaayo ni be yali nabo. Daudi bwe yabatuukaku, yaabalamusa.

²² Agho abasaadha ababi era abazira kye bagasa, abaali mu abo abaaja ni Daudi, baakoba bati: “Abo abataajiire n'ife ghazira kye twidha kubagha ku munhago gwe tuleese, okutoolaku okubaganha batwale bakazi baibwe n'abaana baibwe, memale bagolole.”

²³ Aye Daudi yaabakoba ati: “Baganda bange, mutakola mutyo ku ebyo Musengwa Katonda by'atughaire. Yatukuumye nga tuli balamu, yaata mu ngalo dhaife abanhazi abo abaatulumba.

²⁴ Ghazira muntu aidha kuwulirisa kye muli kukoba. Ole eyasigala einhuma okukuuma ebintu, n'ole eyaja mu lutalo, bateekwa okufuna omugabo n'omulala. Boonaboona baidha kwagayaza nga bagabana.”

²⁵ Era okuva n'olwo, eryo lyafuuka iteeka era kiragiro mu Isiraeli, okutuusa ni ye buli eno.

²⁶ Daudi bwe yatuuka e Zikulaga yaatoola ku munhago, yaagheereza ku bakagwa be abakulembeze mu Buyudaaya, ng'akoba ati: “Ekirabo kino kye mbagheereiza, kiva ku munhago gwe twatoola ku bazigu ba Musengwa Katonda.”

²⁷ Era yaagheerezaaku ab'e Betheli, n'ab'e Ramothi mu kiketezo kya Buyudaaya ekikalukalu ku luuyi olw'omukono omusaadha olw'e buvandhuba, n'ab'e Yattiri,

²⁸ n'ab'e Aroeri, n'ab'e Sifumothi, n'ab'e Eshitemoa,

²⁹ n'ab'e Rakali, n'ab'omu bibuga eby'Abeyerahameeli, n'ab'omu bibuga eby'Abakeni,

³⁰ n'ab'e Horuma, n'ab'e Borashani, n'ab'omu Athaki,

³¹ n'ab'e Heburoni, n'ab'omu bifo Daudi oyo n'abasaadha be mwe baatambuliratambuliranga.