1 Samueli 28 - Baibuli Ekibono kya Katonda 2014

¹ Mu biseera ebyo Abafilisiti baasoloza amagye gaibwe okulwanisa Abaisiraeli. Akishi yaakoba Daudi ati: “Okiidhi bukalamu nga iwe n'abasaadha bo mwidha kuja ninze mu lutalo.”

² Daudi yaamwiramu ati: “N'ekyo kyene, era oidha kutegeera nze omugheereza wo kye nsobola okukola.” Akishi yaakoba Daudi ati: “Kale ndidha kukufuula ankuuma ow'olubeerera.”

Saulo yeebuuza ku mulaguzi

³ Mu kiseera ekyo Samueli yali amaze okufa, nga n'Abaisiraeli boonaboona bamaze okumulira n'okumuziika e Rama mu kibuga kye. Era Saulo yali amaze okubinga abalaguzi n'abasamize mu Isiraeli.

⁴ Agho Abafilisiti beesoloza, baaja baasimba weema dhaibwe e Shunemu. Saulo yaasoloza Abaisiraeli boonaboona, baaja baasimba weema dhaibwe e Giliboa.

⁵ Saulo bwe yabona eigye erya Abafilisiti, yaatya yaadhugumira inho.

⁶ Era yeebuuza ku Musengwa Katonda, aye Musengwa Katonda yaaloba kumwiramu, ka mube mu birooto, oba mu kukozesa Urimu, oba waire ng'abita mu balanzi.

⁷ Agho Saulo yaakoba abagheereza be ati: “Muje mundhagalire omukazi omusamize, nje mmwebuuzeeku.” Abagheereza be bamwiramu bati: “Ghaligho omukazi omusamize ali mu Endori.”

⁸ Kale Saulo yeefuusafuusa, yaavaala ebivaalo ebindi. Yaaja n'abasaadha be babiri eri omukazi oyo ng'obwire buzibye, yaamukoba ati: “Ndagula eri emizimu era ondhetere omuzimu ogw'omuntu ye nnaakoba eriina.”

⁹ Omukazi yaamukoba ati: “Bwenebwene oidhi bukalamu Saulo kye yakola, nga bwe yamalagho abalaguzi n'abasamize mu Isiraeli. Kale mperaano lwaki oli kwenda okunsuula ku mutego okundhisa?”

¹⁰ Aye Saulo yaamulayirira mu Musengwa Katonda, ng'akoba ati: “Nga Musengwa Katonda bw'ali omulamu ezira kibonerezo kija kukutuukaku olw'okukola kye ndi kukukoba.”

¹¹ Agho omukazi yaamubuuza ati: “Naani ye mbe nkwetere?” Saulo yaamwiramu ati: “Ndhetera Samueli.”

¹² Omukazi bwe yabona Samueli, yaayasiikanira ghaigulu ng'akoba Saulo ati: “Lwaki onsubaighe? Niiwe Saulo kyabazinga!”

¹³ Aye kyabazinga yaamukoba ati: “Otatya! Kiki ky'oli kubona?” Omukazi yaamwiramu ati: “Ndi kubona omuzimu nga guva mu itaka.”

¹⁴ Saulo yaamubuuza ati: “Gufaanana gutya?” Yaamwiramu ati: “Omusaadha omukaire n'ali kuva mu itaka, ng'avaire ekanzu.” Agho Saulo yaamanha nga ni Samueli, yaakuba amakiryaivu era yaakutama n'ekyeni kyatuuka ku itaka.

¹⁵ Samueli yaabuuza Saulo ati: “Lwaki ontabwiretabwire n'ontoola e magombe?” Saulo yaamwiramu ati: “Ndi mu buzibu obutaloodheka! Abafilisiti bantanwireku olutalo, ate Katonda andekuliire agho, yaaloba okundhiramu, ni bwe kuba okubita mu balanzi oba mu birooto. Kyenviire ni nkweta onkobere kye mbe nkole.”

¹⁶ Agho Samueli yaamukoba ati: “Memale lwaki obuuza nze, oba nga Musengwa Katonda akulekuliire agho era ng'afuuse muzigu wo?

¹⁷ Musengwa Katonda oyo akoze kye yakukoba ng'abita mu nze. Akutoireku obwakyabazinga yaabugha mwino Daudi,

¹⁸ kuba wadheemera ekiragiro kye, waaloba kuzikiriza Bamaleki nga bwe yayenda. Musengwa Katonda ekyo ky'aviireku okukubisa atyo olwaleero.

¹⁹ Era Musengwa Katonda aidha kukughaayo iwe ni Isiraeli yoonayoona, mu ngalo dh'Abafilisiti.”

²⁰ Amangu ago, Saulo yaagwa ghansi yeegolomola, ng'aidhwire okutya olw'ebyo Samueli bye yakoba. Yaaweeramu irala amaani, kuba yali nga taliire omusana gwonagwona n'obwire.

²¹ Omukazi yaaseeta aghali Saulo, yaabona ng'atiire inho. Yaamukoba ati: “Bona eno, nze omugheereza wo omukazi ngondeire ky'onkobye, naawaayo obulamu bwange naakola nga bw'okobye.

²² Kale mperaano, nze omugheereza wo omukazi, nkweghemba weena okole kye ndi kukusaba. Ganha nkuleetere ku kamere olyeku, ofune amaani ag'okutambula nga mwirayo.”

²³ Saulo yaaloba ati: “Tiidha kulya.” Aye abagheereza be ghalala n'omukazi oyo, baamwikirizisa yaagondera bye baamukoba. Kale yaasituka yaava ku itaka ghansi ghe yali, yaatyama ku buliri.

²⁴ Omukazi yaligho agho n'ente entototo ye baapiita ensavu mu ndhu. Agho yaayangughaku okugiita, yaatoola engaano yaagikanda, yagifumbamu emigaati egitazimbulukusiibwa.

²⁵ Yaabireetera Saulo n'abagheereza be, baalya. Bwe baamala baasituka baagolola obwire obwo.