1 Samueli 27 - Baibuli Ekibono kya Katonda 2014

Daudi ng'ali mu Bafilisiti

¹ Agho Daudi yaakoba mule ati: “Luliba lulala Saulo yandhita. Ekisingaku obulungi, n'okulumukira mu nsi y'Abafilisiti. Olwo Saulo aidha kulekera agho okuunoonia mu Isiraeli, mbe n'emiraala.”

² Kale Daudi n'abasaadha be olukaaga (600) abaali naye, baaja ewa Akishi mutabane wa Maoki, kyabazinga w'e Gathi.

³ Daudi n'abasaadha be baasenga ewa kyabazinga Akishi oyo ow'e Gathi, buli mulala ng'ali n'ab'omu maka ge. Daudi yali ni bakazi be bombi: Ahinoamu ow'e Yezireeli, ni Abigaili namwandu wa Nabali ow'e Karumeli.

⁴ Bwe baakobera Saulo bati Daudi alumukiire e Gathi, yaalekera agho okumunoonia.

⁵ Agho Daudi yaakoba Akishi ati: “Bw'oba ng'onsiimye, ganha ompe ekifo mwe nnaabanga, mu kirala ku bibuga ebitonotono. Nze omugheereza wo tigwaine kuba mu kibuga kino ekikulu iwe mw'oba.”

⁶ Kale ku lunaku olwo, Akishi yaagha Daudi ekibuga Zikulaga. Era ekibuga ekyo kyasigala nga kya bakyabazinga ba Buyudaaya ni ye buli eno.

⁷ Daudi yaaba mu nsi y'Abafilisiti okumala omwaka mulala n'emyezi ena.

⁸ Mu kiseera ekyo Daudi n'Abasaadha be, baajanga baalumba Abageshuri, n'Abagirizi, n'Abamaleki, kuba okuva eira n'eira, abo n'abaali abatyamye ab'ekiketezo ekyo okutuukira irala e Shuri ku nsalosalo ni Misiri.

⁹ Daudi yaalumbanga ekiketezo ekyo, yaalobanga kulekagho musaadha waire omukazi nga mulamu. Era yaanhaganga entaama, n'ente, n'endogoyi, n'engamiya, n'ebivaalo, memale yairangayo ye Akishi.

¹⁰ Akishi bwe yamubuuzanga ati: “Gha gh'ojiire okulumba olwaleero?” Nga Daudi amwiramu ati: “Tulumbye ebiketezo ebikalukalu ebya Buyudaaya ku luuyi olw'omukono omusaadha olw'e buvandhuba.” Oba ati: “Tulumbye ebiketezo ebikalukalu ebya Abayerahameeli.” Oba ati: “Tulumbye ebiketezo ebikalukalu eby'Abakeni.”

¹¹ Daudi yaaloba kulekangagho musaadha waire omukazi nga mulamu. Olwo ghalobe kubaagho aleeta mawulire e Gathi, kuba Daudi yakobanga mule ati: “Tomanha bwe baja ni batuseegha, nga bakoba bati: ‘Daudi akola ati n'ati.’ ” Atyo Daudi bwe yakolanga ekiseera kyonakyona kye yamala mu nsi y'Abafilisiti.

¹² Agho Akishi yeesiga Daudi, ng'akoba mule ati: “Bwenebwene Daudi yeereeteire abantu be Abaisiraeli okumukyayira irala, n'olw'ekyo aidha kubanga mugheereza wange buliidho.”