1 Samueli 26 - Baibuli Ekibono kya Katonda 2014

Daudi asaasira Saulo omukuzi ogwokubiri yaaloba kumwita

¹ Abantu ab'e Zifu baidha baakobera Saulo e Gibea bati: “Daudi yeegisiisa ku lusozi Hakila, oluli e buvandhuba wa Yeshimoni.”

² Kale Saulo yaasitukiramu, yaaja mu irungu ery'e Zifu okuyiiga Daudi, ng'ali n'abalwani enkumi isatu (3,000) abaalondebwamu mu Isiraeli yoonayoona.

³ Saulo yaasimba weema dhe ku lusozi Hakila olwali ku luguudo e buvandhuba wa Yeshimoni. Mu kiseera ekyo Daudi yali ng'akaali mu irungu. Aye Daudi oyo yaamala yaamanha nga Saulo aidhie mu irungu okumuyiiga.

⁴ Kale yaatuma abakeesi baakakalisa irala bati Saulo atuuse.

⁵ Agho Daudi yaasituka, yaaja mu kifo Saulo mwe yasimba weema dhe. Yaabona ekifo Saulo ghe yalambaala, era yaabona ni Abuneri mutabane wa Neri ghe yalambaala, eyali omuduumizi w'eigye lya Saulo. Saulo oyo yali alambaire munda mu kifo ghe baasimba weema, ng'eigye lisimbye weema okumwezunguluza.

⁶ Daudi yaakoba Ahimeleki Omuhitti, ni Abishai muganda wa Yoabu era Mutabane Zeruia, ati: “Naani anaaja ninze ye Saulo, mu kifo ghe baasimba weema?” Abishai yaakoba ati: “Nze ndidha kuja n'iwe.”

⁷ Kale Daudi ni Abishai baaja mu igye lya Saulo, baayagaana nga Saulo atendwike munda mu kifo ghe baasimba weema, ng'asimbye eifumo lye mu itaka gha mutwe gwe. Abuneri n'abalwani baali balambaire okwezunguluza Saulo.

⁸ Abishai yaakoba Daudi ati: “Katonda akughaire omuzigu wo mu ngalo olwaleero. Kale ni leka mmubiseemu eifumo irala liti, lingire ni mu itaka. Tiidha kumufumita lyakubiri.”

⁹ Aye Daudi yaakoba Abishai ati: “Busa, otamuzikiriza, kuba naani akola akabi ku oyo Musengwa Katonda ye yasiiga omuzigo, n'atabaaku musango?”

¹⁰ Daudi era yaakoba ati: “Nga Musengwa Katonda bw'ali omulamu, era mwene oyo n'alimwita entuuko dhe dhirituuka yaafa, oba alija mu lutalo yaafiira eyo.

¹¹ Tikiribaagho nze okukola akabi ku muntu Musengwa Katonda ye yasiiga omuzigo! Aye toola eifumo eryo gha mutwe gwe, n'ekidoome eky'amaadhi, ife tuje.”

¹² Kale Daudi yaatoola eifumo n'ekidoome eky'amaadhi ebyali gha mutwe gwa Saulo, baaja. Ghazira muntu waire omulala eyabona, oba eyamanha, waire okubaagho eyairaku engulu, kuba boonaboona Musengwa Katonda yabatendusa endoolo enhingi einho.

¹³ Agho Daudi yaaja ku luuyi olundi, yaayemerera ghalaku ku ngulu ku lusozi, nga ghaligho eibanga inene ghagati ghe n'eigye lya Saulo.

¹⁴ Yaaba eyo, yaalagiriza ng'akoba eigye ni Abuneri mutabane wa Neri, ati: “Iwe Abuneri, tovugira?” Abuneri yaabuuza ati: “Niiwe ani, ali kweta kyabazinga?”

¹⁵ Daudi yaakoba Abuneri ati: “Toli musaadha? Naani ayagayaga n'iwe mu Isiraeli? Memale lwaki tokuumye kyabazinga, musengwa wo? Ghaligho omuntu aidhie eyo okuzikiriza kyabazinga musengwa wo.

¹⁶ Ekyo ky'okoze ti kirungi. Nga Musengwa Katonda bw'ali omulamu ogwaniire kufa, kuba tokuumye musengwa wo, Musengwa Katonda ye yasiiga omuzigo. Mpegaano eifumo lya kyabazinga n'ekidoome eky'amaadhi ebibaire gha mutwe gwe biri gha?”

¹⁷ Agho Saulo yaamanha ng'ago n'amamiro ga Daudi, yaabuuza ati: “Mwana wange Daudi, ago n'amamiro go?” Daudi yairamu ati: “Isebantu kyabazinga, ago n'amamiro gange.”

¹⁸ Daudi era yaakoba ati: “Bwenebwene musengwa wange, lwaki oli kundhiigania nze omugheereza wo? Kiki kye nakukola? Musango ki gwe naiza?

¹⁹ Isebantu kyabazinga, mperaano ni nkweghemba owulire bye nja okukoba, nze omugheereza wo: Bw'aba nga Musengwa Katonda n'akuleeteire okundhiigania, ka mmusabe aganhe okumugha ekigheebwayo. Aye bwe baba nga bantu, abo Musengwa Katonda abakolimire kuba mperaano baaminze mu nsi ya Musengwa Katonda ey'ensikirano, bansindika mu nsi ey'endha okugheereza emisambwa!

²⁰ Nsaba omusaayi gwange gulobe kuyuyibwa mu nsi Musengwa Katonda mw'atali, kuba kyabazinga wa Isiraeli adhie okuyiiga nze enkukuni obukukuni, ng'oti n'omuntu bw'ayiiga akakologo mu nsozi.”

²¹ Agho Saulo yairamu ati: “Nkoze bubi. Ira, mwana wange Daudi, tikairayo kabiri kukukolaku kabi, kuba owoniiza obulamu bwange olwaleero. Bwenebwene mbaire musiru, era nkoze kibi inho.”

²² Daudi yaamwiramu ati: “Isebantu kyabazinga, eifumo liirino. Omulala ku baisuka k'aidhe alinone

²³ Musengwa Katonda asasula buli muntu olw'obutuufu bwe n'obwesigwa bwe. Olwaleero Musengwa Katonda oyo akumpaire mu ngalo dhange, aye nze naaloba kugalula mukono gwange kukola kabi ku oyo Musengwa Katonda ye yasiiga omuzigo.

²⁴ Bona eno, nga nze bwe mponiiza obulamu bwo olwaleero, ni Musengwa Katonda k'awonie obwange era ambisenga mu bizibu byonabyona.”

²⁵ Saulo yaakoba Daudi ati: “Mwana wange Daudi, Musengwa Katonda akughenga enkabi. Oidha kubanga mughanguzi mu byonabyona by'onaakolanga.” Agho Daudi yaagema engira yaaja, ate Saulo yairayo ewuwe.