1 Samueli 25 - Baibuli Ekibono kya Katonda 2014

Samueli afa

¹ Agho Samueli yaafa. Abaisiraeli boonaboona beesoloza okumulira, baamuziika mu maka ge e Rama. Ebyo olwawa, Daudi yaasitula, yaaja mu irungu ery'e Parani.

Daudi ni Abigaili

² Yaabaayo omusaadha e Maoni, eyakoleranga emirimo gye mu Karumeli. Yali mukombe inho, ng'ali n'entaama enkumi isatu (3,000) n'embuzi lukumi (1,000). Mu kiseera ekyo yaliyo e Karumeli, ng'ali kusala ku ntaama dhe obuviiri.

³ Omusaadha oyo yali wa ku lulyo lwa Kalebu era nga eriina lye ni Nabali, ate eriina lya mukazi we nga ni Abigaili. Omukazi oyo yali nga mutegeevu era nga mulungi mu mboneka ye. Aye iba oyo, yali wa ikabyo era nga wa mpisa mbi.

⁴ Agho Daudi ng'ali eyo mu irungu, yaawulira ati Nabali yali ali kusala ku ntaama dhe obuviiri.

⁵ Kale yaatuma abaisuka ikumi, yaabakoba ati: “Muje e Karumeli ye Nabali, mumuunamukize.

⁶ Mwidha kumulamusa muti, ‘Emiraala gibe ku iwe, ni ku b'omu ndhu yo, ni ku byonabyona by'oli nabyo.

⁷ Nawuliire nti oli n'abasala ku ntaama obuviiri. Abaayi bo baali n'ife, twaloba kubakolaku kabi koonakoona. Era ekiseera kyonakyona kye baamala e Karumeli, ghazira kintu kyaibwe waire ekirala ekyababulaku.

⁸ Iwe babuuze, baidha kukukobera. Kale ni sangaaza abaisuka bange n'ekisa, kuba twidhiire ku lunaku lwa kibinuko. Nkweghembye ganha oghe abagheereza bo abo, kyonakyona ky'onaaba nakyo era ompeerezeeku zeena, nze mutabane wo Daudi.’ ”

⁹ Abaisuka ba Daudi bwe baatuuka ye Nabali, baamukoba ebyo byonabyona nga Daudi bwe yabibakoba. Bwe baamala baateega ky'anaabairamu.

¹⁰ Agho Nabali yairamu abagheereza ba Daudi abo, ng'akoba ati: “Daudi naani? Mutabane wa Yesse naani? Enaku dhino ghaligho abagheereza kamaala abeiba ku basengwa baibwe ni babalumukaku.

¹¹ Olwo nze ntoole emere yange, n'amaadhi gange, n'emamba yange ye ndhitiire abantu abali kunsalira ku ntaama obuviiri, mpe abantu be ntaidhi ye bava?”

¹² Kale abavubuka ba Daudi abo baakyuka, bairayo ye Daudi, baamukobera ebyo byonabyona.

¹³ Daudi yaakoba abasaadha be ati: “Buli muntu yeesibe empiima ye.” Agho buli muntu yeesiba empiima ye. Daudi yeena yeesiba eyiye. Abantu ng'oti ebikumi bina baanonereza Daudi oyo, ate ebikumi ebibiri baasigala okukuuma ebintu ebikozesebwa.

¹⁴ Omwisuka mulala ku bagheereza ba Nabali, yaakobera Abigaili muka Nabali oyo, ati: “Bona eno, Daudi atumye abakwenda okuva eyo mu irungu, baidha okulamusa musengwa waife. Aye musengwa waife abavumye buvume.

¹⁵ Ate nga abasaadha abo baatubisa bukalamu inho. Ghazira kabi koonakoona akaatutuukaku waire ekintu kyonakyona okutubulaku, ekiseera kyonakyona kye twamala nabo eyo mu nsiko.

¹⁶ Baatukuumanga omusana n'obwire ekiseera kyonakyona kye twamala nabo nga twaya entaama.

¹⁷ Kale ni ekyo kirowoozeeku era osalegho ky'onaakola, kuba kiidha kuleetera musengwa waife akabi okumwidhira aghalala n'ab'endhu ye. Ate musengwa waife oyo muntu wa ikabyo inho, ghazira aghanga kwogeraku naye.”

¹⁸ Agho Abigaili yaayangugha, yaatoola emigaati ebikumi bibiri, n'ensawo ibiri edh'amawu edhirimu omwenge ogw'emizabbibu, n'entaama itaanu enfumbire irala, n'ebiibo bitaanu eby'emere ey'empeke enkalange, n'obufaaganda kikumi obw'emizabbibu emikaze, n'ebitole ebikumi bibiri eby'ebibala eby'emiti emitiini ebikaziibwa. Ebyo byonabyona yaabitwika ku ndogoyi.

¹⁹ Yaakoba abagheereza be ati: “Muje muneesookengayo, zeena ndidha kubavaaku einhuma.” Aye yaaloba kukoberaku Nabali iba.

²⁰ Abigaili bweyali ng'ali kuvuga endogoyi, ng'ali kwikirira okuva mu ikoona ly'olusozi, yaja okulinga ati, ng'abona Daudi n'abasaadha be nga bali kwidha y'ali. Agho yaayagaanana nabo.

²¹ Nga bakaali kwagaanana, Daudi yali amaze okukoba mule ati: “Obwo bwenebwene lwaki nakuuma ebintu by'omusaadha oyo byonabyona ebyali mu irungu, ni kutabulaku waire ekirala kiti? Ebirungi bye namukolera buti ali kubinsasulamu bibi?

²² Katonda agwananga yambonereza n'obukambwe, bwe bunaakya enkyo nga nkaaleseegho omuntu omulamu ayetebwa omusaadha, ku bantu be boonaboona b'ali nabo.”

²³ Abigaili bwe yabona Daudi yaayangugha, yaava ku ndogoyi, yaakuba amakiryaivu era yaakutama n'ekyeni kyatuuka ku itaka.

²⁴ Yaagwa agho gha bigere bya Daudi, ng'amukoba ati: “Musengwa Katonda wange, omusango ogwo gute ku nze zenka. Era nkweghembye wulirisa nze omugheereza wo omukazi bye nja okukoba.

²⁵ Nkusaba, musengwa wange, olobe kufa ku Nabali, kuba omuntu oyo mubi. Era eriina lye kye likoba, yeena ky'ali ayetebwa Nabali, era nga bwenebwene musiru. Aye nze omugheereza wo omukazi tyabona baisuka iwe musengwa wange be watuma.

²⁶ Agho ni, musengwa wange, Musengwa Katonda n'akulobeire okwiza omusango ogw'okwita n'ogw'okwesasuuliza ku bazigu bo. Kale ni nga Musengwa Katonda bw'ali omulamu era nga weena bw'oli omulamu, abazigu bo n'abo abenda okukukolaku akabi, ka babonerezebwe ng'oti ni Nabali.

²⁷ Era mperaano, musengwa wange, ekirabo kino nze omugheereza wo omukazi kye nkuleeteire, kighe abasaadha bo.

²⁸ Nkweghembye nsonigha nze omugheereza wo omukazi bye nsobiiza. Bwenebwene Musengwa Katonda aidha kukugha obwakyabazinga obutaja kuvaagho, kuba, iwe musengwa wange, niiwe olwana entalo dha Musengwa Katonda oyo. Era tibalikwagaanamu kibi, obulamu bwo bwonabwona.

²⁹ Bwe ghanaabangagho asituka okukuyiigania ng'ayenda okukwita, Musengwa Katonda wo aidha kukukuumanga ng'oti n'omuntu bw'akuuma eky'obukombe eky'omughendo. Aye abazigu bo, Musengwa Katonda aidha kubakonhoogereranga ng'oti n'omuntu bw'akonhoogerera amabaale mu nsuumulo.

³⁰ Agho Musengwa Katonda bw'alimala okukukolera ebirungi byonabyona bye yakusuubiza iwe musengwa wange, n'akufuula kyabazinga wa Isiraeli,

³¹ olwo tolibaaku kikweraliikiriza waire kikulumya mwoyo, olw'okwiza ogw'okwita abaziraku musango n'olw'okwesasuuliza ku bazigu bo. Era Musengwa Katonda bw'aliba ng'amaze okukugha enkabi, ondidhukiranga nze omugheereza wo omukazi.”

³² Daudi yaakoba Abigaili ati: “Musengwa Katonda, Katonda wa Isiraeli asaakibwe, oyo akutumye olwaleero okwidha ye ndi.

³³ Weena Katonda oyo akughenga enkabi olw'amagezi go n'olw'okumponia omusango ogw'okwita era n'okwesasuuliza ku bazigu bange.

³⁴ Nga Musengwa Katonda wa Isiraeli bw'ali omulamu, oyo andobeire okukukolaku akabi, bwenebwene ngoli toyangwighe n'oidha ye ndi, bwandijiire okukya nga ku bantu ba Nabali, tighakaaligho waire omulala ati ayetebwa omusaadha, akaali omulamu.”

³⁵ Agho Daudi yaikiriza okutoola ebyo Abigaili bye yamutwalira, era yaamukoba ati: “Irayo ewuwo n'emiraala. Mpuliire by'okobye, era ndhikiriiza okukola nga bw'okobye.”

³⁶ Abigaili yairayo ye Nabali, yaamwagaana ng'afumbye embaga ey'amaani mu ndhu ye embaga eyo ng'eri ng'oti ya kyabazinga. Yali atamiire inho era nga musangaavu inho. Kale Abigaili yaaloba kumukobera kintu kyonakyona okutuusa bwe bwakya enkyo.

³⁷ Nabali, omwenge bwe gwamuwa ku mutwe enkyo, mukazi we Abigaili yaamukobera byonabyona. Nabali bwe yabiwulira, omwoyo gwamugwa mu bigere, era yaasigala agho ng'ali ng'oti ibaale.

³⁸ Bwe ghaabitagho enaku ng'oti ikumi, Musengwa Katonda yaakuba Nabali, yaafa.

³⁹ Daudi bwe yawulira nga Nabali afiire, yaakoba ati: “Musengwa Katonda asaakibwe, oyo eyeesasuliiza ku Nabali eyanvuma, era asaakibwe olw'okunkuuma nze omugheereza we ni ndoba okugwa mu kibi. Buti Musengwa Katonda oyo abonereiza Nabali olw'ekibi kye.” Agho Daudi yaayetesa Abigaili, ng'amukobya abe mukazi we.

⁴⁰ Abagheereza ba Daudi baaja ye Abigaili e Karumeli, baamukoba bati: “Daudi atutumye y'oli tukutwale y'ali obe mukazi we.”

⁴¹ Abigaili yaakuba amakiryaivu, yaakutama n'ekyeni kyatuuka ku itaka, yaakoba ati: “Nze ndi mugheereza mukazi agwaine obw'okunaaza ebigere eby'abagheereza ba musengwa wange oyo!”

⁴² Agho Abigaili yaayangugha okusituka, yaatyama ku ndogoyi. Yaaja n'abagheereza ba Daudi, ng'agherekeirwaku abagheereza be abakazi bataanu. Abigaili oyo yaafuuka muka Daudi.

⁴³ Daudi yaabayiza ni Ahinoamu ow'e Yezireeli, bombi ni Abigaili baaba bakazi be.

⁴⁴ Mu kiseera ekyo, Saulo yali amaze okutoola mughala we Mikali, eyali muka Daudi, yaamugabira Palati mutabane wa Laishi ow'e Gallimu.