1 Samueli 24 - Baibuli Ekibono kya Katonda 2014

Daudi asaasira Saulo yaaloba kumwita

¹ Saulo bwe yaira ng'ava okubingirira Abafilisiti, baamukobera bati: “Bona, Daudi ali mu irungu ery'omu kiketezo ekyetebwa Engedi.”

² Kale Saulo yaaja n'abalwani enkumi isatu (3,000), abaalondebwamu mu Isiraeli yoonayoona, yaaja okwagala Daudi n'abasaadha be, mu kifo ekyayetebwanga Amabaale ag'Embuzi edh'Omunsiko.

³ Agho Saulo yatuuka ku mpuku eyali okumpi n'ebisibo by'entaama ku ngira, yaingira omwo okweyamba. Mu kiseera ekyo, Daudi n'abasaadha be, baali batyaime mu bitundu eby'omunda einho eby'empuku eyo.

⁴ Abasaadha ba Daudi baakoba Daudi bati: “Luno n'olunaku Musengwa Katonda lwe yakukoba ati, ‘Bona eno, nja kukuta omuzigu wo mu ngalo. Olimukola kyonakyona ky'olyenda.’ ” Agho Daudi yaasituka, yeibirira, yaaja yaasala akatundu k'eigemo ku kanzu ya Saulo.

⁵ Aye Daudi bwe yamala okukola ekyo, omwoyo gwamuluma olw'okusala akatundu k'eigemo ku kanzu ya Saulo.

⁶ Yaakoba abasaadha be ati: “Musengwa Katonda anhambe ndobe kubaaku kabi ke nkola musengwa wange kyabazinga, Musengwa Katonda oyo ye yasiiga omuzigo. Tighanga naire kugalula mukono ni ndhita oyo Musengwa Katonda ye yasiiga omuzigo.”

⁷ Kale Daudi yaikirizisa abasaadha be n'ebibono ebyo, yaaloba kubaganha kukola kabi ku Saulo. Saulo yaasituka, yaava mu mpuku, yaaja.

⁸ Nga ghabiseeghooku akaseera, Daudi yeena yaafuluma mu mpuku, yaayeta Saulo ati: “Isebantu kyabazinga!” Saulo yaalinga einhuma. Daudi yaakuba amakiryaivu era yaakutama n'ekyeni kyatuuka ku itaka.

⁹ Agho Daudi yaakoba Saulo ati: “Lwaki ojiira ku bibono by'abo abakoba bati nze nhenda okukukola akabi?

¹⁰ Olwaleero weeboneireku n'amaiso go geene, nga Musengwa Katonda abaire okutaire mu ngalo dhange ng'oli mu mpuku. Abandi bankobye nkwite, aye nze naaloba, nga nkoba nti, ‘Tiidha kugalula mukono kwita musengwa wange kyabazinga, kuba n'oyo Musengwa Katonda ye yasiiga omuzigo.’

¹¹ Era lata wange kyabazinga, bwenebwene bona, akatundu k'eigemo ery'ekanzu yo ndi nako mu ngalo dhange. Kale ni, nze okusobola okusala akatundu ku igemo ly'ekanzu yo, aye ni ntakwita, okwo kw'obe omanhire nga nzira kabi ke nkwendeza oba okwenda okukudheemera. Ghazira kibi kyonakyona kye naali nkukozeeku, waire nga iwe oyiigania obulamu bwange obumalegho.

¹² Musengwa Katonda n'abe asale omusango ghagati ghange n'iwe, era n'abe akwesasuulizeeku olw'ebyo by'onkola, aye nze ku lwange nzira kibi kye ndidha kukukola.

¹³ Ng'ensambo ey'abeira bw'ekoba eti, ‘Omubi n'akola ebibi’, nze tiidha kukukolaku kabi koonakoona.

¹⁴ Iwe kyabazinga omulamba owa Isiraeli, naani y'oidhie okulumba? Naani y'oidhie okubingirira? Oli kubingirira embwa enfu, era enkukuni obukukuni?

¹⁵ Nsaba Musengwa Katonda asale omusango ghagati ghange n'iwe, anoonereze ensonga, ampolereze era antoole mu ngalo dho.”

¹⁶ Daudi bwe yamala okukoba Saulo ebibono ebyo, Saulo yaakoba ati: “Mwana wange Daudi, bwenebwene niiwe oli kwogera?” Agho Saulo oyo yaatimbuka yaalira amaziga.

¹⁷ Yaakoba Daudi ati: “Niiwe omutuufu, kuba onkoleire ebirungi, aye nze naakusasulamu bibi.

¹⁸ Era olwaleero oyoleike nga bw'ombisiisa obukalamu n'otandhita, ate nga Musengwa Katonda antaire mu ngalo dho.

¹⁹ Bwenebwene muntu ki atuuka ku muzigu we, n'amuleka n'aja emiraala? Kale ni nsaba Musengwa Katonda akusasulemu ebirungi olw'ekyo ky'onkoleire olwaleero.

²⁰ Era bona eno, buti ndidhi nga bwenebwene oidha kuba kyabazinga, era ng'obwakyabazinga bwa Isiraeli bwidha kukakata nga niiwe oli kufuga.

²¹ Aye ndayirira mu liina lya Musengwa Katonda nga tolizikiriza izaire lyange nga nviiregho, era tolisaaniagho liina lyange mu ba ndhu ya lata wange.”

²² Daudi yaikiriza yaalayirira Saulo atyo. Agho Saulo yairayo ewuwe, aye Daudi n'abasaadha be bairayo mu kifo kyaibwe eky'okwewogomamu.