1 Samueli 23 - Baibuli Ekibono kya Katonda 2014

Daudi awonia ekibuga Keila

¹ Agho abantu baakobera Daudi bati: “Abafilisiti bali kulwanisa ekibuga Keila, era bali kunhaga emere eyaakakungulwa.”

² Kale Daudi yeebuuza ku Musengwa Katonda ati: “Nje numbe Abafilisiti abo?” Musengwa Katonda yaamwiramu ati: “Ja obalwanise, owonie ab'omu kibuga Keila.”

³ Aye abasaadha ba Daudi baamukoba bati: “Ate oba nga ghano mu Buyudaaya tuli mu kutya, memale leero bwe tunaaja e Keila okulwanisa amagye ag'Abafilisiti, tituubitirire okutya?”

⁴ Agho Daudi yeebuuza ku Musengwa Katonda kabiri. Musengwa Katonda yaamwiramu ati: “Situkiramu oje e Keila, kuba ndidha kukugha Abafilisiti abo obaghangule.”

⁵ Kale Daudi n'abasaadha be baaja e Keila, baalwana n'Abafilisiti baabaita inho, era baabatoolaku ente dhaibwe. Kale atyo Daudi bwe yawonia abatyamye ab'e Keila.

⁶ Abiathari mutabane wa Ahimeleki bwe yalumuka ni yeeyimba ku Daudi e Keila, yaja n'ekivaalo eky'obwakabona.

⁷ Agho baakobera Saulo bati: “Daudi aidhie mu kibuga Keila.” Saulo yaakoba mule ati: “Katonda amungabwire, kuba yeigaliiza mwene bw'aingiire mu kibuga ekiriku endhigi edhiriku ebisiba.”

⁸ Agho Saulo yaayeta abalwani be boonaboona mu lutalo, baje bazingize Daudi n'abasaadha be okubeezunguluza.

⁹ Daudi yaakitegeera nga Saulo ali kutegeka okumukola akabi. Kale yaakoba Abiathari kabona ati: “Leeta ghano ekivaalo eky'obwakabona.”

¹⁰ Daudi oyo yaakoba ati: “Wo Musengwa Katonda wa Isiraeli, nze omugheereza wo mpuliire nga Saulo ali kutegeka okwidha e Keila okuzikiriza ekibuga ku lwange.

¹¹ Obwo abantu ab'e Keila banampaayo mu ngalo dhe? Obwo bwenebwene Saulo anaidha nga nze omugheereza wo bwe mpuliire? Wo Musengwa Katonda wa Isiraeli, nkweghembye nkobera nze omugheereza wo.” Musengwa Katonda yaamwiramu ati: “Aidha kwidha.”

¹² Daudi yaabuuza ati: “Abantu ab'e Keila banampaayo nze n'abasaadha bange mu ngalo dha Saulo?” Musengwa Katonda yairamu ati: “Baidha kukughaayo.”

¹³ Agho Daudi n'abasaadha be abaali baghera ng'oti lukaaga, baasitukiramu baava e Keila, baaja kiisi ye baasobolanga okuja. Saulo bwe baamukobera bati Daudi alumwike e Keila, yaaleka kye yali ategeike okukola.

Daudi ng'ali mu biketezo eby'oku nsozi

¹⁴ Daudi yaabanga eyo nga yeegisiisa mu kiketezo eky'oku nsozi, mu irungu ery'e Zifu. Era Saulo yaamuyiiganga buli lunaku, aye Katonda yaaloba kumughaayo mu ngalo dhe.

¹⁵ Daudi yaatya inho, kuba yabona nga Saulo yali ali kumuyiiga amwite. Daudi oyo yali e Horeshi mu irungu ery'e Zifu.

¹⁶ Agho Yonathani mutabane wa Saulo yeesitula, yaaja ye Daudi eyo e Horeshi, yaamugumya ayongere okwesiga Katonda.

¹⁷ Yaamukoba ati: “Otatya, kuba lata wange Saulo taaghange kukukolaku kabi naire. Iwe oidha kuba kyabazinga wa Isiraeli, nze nkwiririre mu kitiibwa. Era ekyo ni lata wange Saulo akiidhi.”

¹⁸ Agho bombi baakola endagaano mu maiso ga Musengwa Katonda. Bwe baamala, Yonathani yairayo eka ate Daudi yaasigala e Horeshi.

¹⁹ Agho abantu baava e Zifu baaja ye Saulo, baamukoba bati: “Daudi yeegisiisa ewaife e Horeshi ku lusozi Hakila, oluli ku luuyi olw'omukono omusaadha olw'e buvandhuba olwa Yeshimoni.

²⁰ Buti ni, Isebantu kyabazinga, nga bw'oyenda einho okumugema, ife twidha kumughaayo mu ngalo dho.”

²¹ Saulo yaakoba ati: “Musengwa Katonda abaghe enkabi, olw'okungemerwa ekivunika.

²² Muje mwongere okukakasa, mubonere irala ekifo mw'aba era n'abantu abaamuboineku, kuba mpulira mbu mugezigezi inho.

²³ Kale ni muje mubonere irala ebifo mw'abwama ni yeegisa, memale mwire nga muli n'amawulire amakakafu. Olwo ndidha kuja n'imwe, era bw'anaaba ng'ali mu kiketezo ekyo, ndidha kumwagaaza mu nkumi n'enkumi edh'Abayudaaya.”

²⁴ Kale baasitula bairayo e Zifu, beesookangayo Saulo. Mu kiseera ekyo, Daudi n'abasaadha be baali mu irungu ly'e Maoni mu kiiko ekirimu omwiga Yorudani, ku luuyi olw'omukono omusaadha olw'e buvandhuba wa Yeshimoni.

²⁵ Agho Saulo n'abasaadha be baaja okwagala Daudi. Aye ghaabaagho eyakobera Daudi. Kale Daudi yaaja aghali olubaale mu irungu ly'e Maoni.

²⁶ Saulo yaaja ku luuyi olundi olw'olusozi, ate Daudi n'abasaadha be baaba ku luuyi olundi, nga bali kwangugha okuvaagho kuba Saulo n'abasaadha be baali bazingiiza Daudi n'abasaadha be ku ndhuyi dhoonadhoona.

²⁷ Mu kaseera ako omukwenda yaatuuka, yaakoba Saulo ati: “Yangughaku okwidha, kuba Abafilisiti balumbye ensi yo.”

²⁸ Kale Saulo yaalekera agho okubingirira Daudi, yairayo okulwanisa Abafilisiti. Ekifo ekyo baakyeta Olubaale Olwokuwoneraku.

²⁹ Daudi yaava agho, yaaja mu kiketezo ekyayetebwanga Engedi, yeegisa eyo.