1 Samueli 22 - Baibuli Ekibono kya Katonda 2014

Bakabona baitibwa

¹ Agho Daudi yaava mu kibuga ky'e Gathi, yaalumukira mu mpuku y'e Adullamu. Baganda be n'ab'endhu ya ise bwe baakiwulira, baaja eyo ye yali.

² Abantu abaali batuntuzibwa, n'abaali babandhibwa, era n'abo abataali basiimu, boonaboona beesololeza aghaali Daudi. Daudi yaafuuka mukulembeze waibwe, nga boonaboona baghera ng'oti ebikumi bina.

³ Eyo Daudi yaavaayo, yaaja e Mizipa eky'e Moabu, yaakoba kyabazinga w'e Moabu ati: “Nkweghembye ganha lata wange ni maama baidhe babe ghano n'iwe, okutuusa nga mmaze okumanha Katonda ky'aja okunkolera.”

⁴ Agho Daudi yaaleka abazaire be abo ewa kyabazinga w'e Moabu, era baasigala eyo entangama yoonayoona Daudi ye yamala ng'ali mu mpuku.

⁵ Agho Gadi omulanzi yaakoba Daudi ati: “Lekera okuba mu mpuku, ja obenga mu kiketezo ky'e Buyudaaya.” Kale Daudi yaavaayo, yaaja mu kibira eky'e Herethi.

⁶ Lwali lulala, abantu baakobera Saulo bati bazwire Daudi gh'ali n'abantu be yali nabo. Saulo oyo yali ali ku lusozi, ng'atyaime ghansi gh'omuti omutamarisiki, ng'agemye eifumo lye mu ngalo. Abagheereza be boonaboona baali beemereire agho okumwezunguluza.

⁷ Agho Saulo yaakoba abagheereza be abo ati: “Imwe Ababenjamini, muwulire bino: Mulowooza muti mutabane wa Yesse aidha kugha buli muntu ku imwe ebibandha n'amasamba g'emizabbibu? Oba muti mwenamwena aidha kubafuula baduumizi, muduumirenga ebikunsu eby'abaisirukale olukumi olukumi, n'eby'abaisirukale ekikumi ekikumi?

⁸ Obwo ekyo kye muviireku okundyamu olukwe? Ghazira muntu waire omulala ku imwe eyankoberaku ati mutabane wange yeeyimbye ni mutabane wa Yesse. Ghazira ku imwe yansaasiraku waire okunkoberaku, ati mutabane wange yapikiriza Daudi, omulala ku bagheereza bange, yaategeka okuneeteega nga bw'akoze olwaleero.”

⁹ Agho Doegi Omuedomu, eyali nga yeena ayemereire agho ni bagheereza baine aba Saulo, yairamu ati: “Nabona mutabane wa Yesse oyo ng'aidhie e Nobu ye Ahimeleki mutabane wa Ahitubu.

¹⁰ Ahimeleki oyo yaamwebuulizaagho eri Musengwa Katonda, era yaamugha eby'okulya era n'empiima ya Goliathi Omufilisiti.”

¹¹ Kale kyabazinga yaatuma beete Ahimeleki kabona, n'ab'endhu yaise boonaboona abaali bakabona e Nobu, boonaboona baidha ye kyabazinga.

¹² Saulo yaakoba Ahimeleki ati: “Wulira iwe mutabane wa Ahitubu.” Ahimeleki yaamwiramu ati: “Ndi kuwulira, musengwa wange.”

¹³ Saulo yaamubuuza ati: “Lwaki iwe ni mutabane wa Yesse mwandyamu olukwe? Lwaki wamugha eby'okulya, n'empiima, era n'omwebuulizaagho ye Katonda, memale n'aneefuulaku okuneeteega nga bw'akoze olwaleero.”

¹⁴ Ahimeleki yairamu kyabazinga ati: “Mu bagheereza bo boonaboona naani omwesigwa ng'oti ni Daudi? Daudi oyo, mukoirume wo era n'akulira ekikunsu eky'abakukuuma, era wa kitiibwa mu ndhu yo.

¹⁵ Guno ti n'omukuzi gwe nsoose okumwebuulizaagho ye Katonda! Busa, ti n'ogusoose. Isebantu kyabazinga, otavunaana nze kintu kyonakyona waire okuvunaana ab'endhu ya lata wange, kuba nze omugheereza wo bino eby'okukulyamu olukwe, ghazira kye mbiidhiku naire akatono kati.”

¹⁶ Aye kyabazinga yaakoba ati: “Bwenebwene, iwe Ahimeleki n'ab'endhu ya lata wo boonaboona, muteekwa kufa.”

¹⁷ Agho kyabazinga oyo yaakoba abakuumi be abaali beemereire okumpi naye, ati: “Mukyuke mwite bakabona ba Musengwa Katonda, kuba beeyimba ku Daudi, baamanha ng'alumwike baaloba kunkobera.” Aye abagheereza ba kyabazinga abo, baaloba kusitula mikono gyaibwe kwita bakabona ba Musengwa Katonda.

¹⁸ Agho kyabazinga yaakoba Doegi ati: “Iwe kyuka oite bakabona abo.” Era Doegi Omuedomu yaagwa ku bakabona yaabaita. Ku lunaku olwo yaita bakabona kinaana na bataanu abaavalanga ebivaalo eby'obwakabona ebyakolebwa mu ngoye empegheevu.

¹⁹ Saulo bwe yamala, yaaja e Nobu mu kibuga kya bakabona, yaita abasaadha n'abakazi, abaana abato n'abayonka, ente, endogoyi, n'entaama byonabyona yaabiita.

²⁰ Aye ku batabane ba Ahimeleki, mutabane wa Ahitubu, kwaliku mulala eyalumuka n'awona nga bamweta Abiathari, yaaja yeeyimba ku Daudi.

²¹ Abiathari oyo yaakobera Daudi ati Saulo aise bakabona ba Musengwa Katonda.

²² Daudi yaakoba Abiathari ati: “Bwe nabona Doegi Omuedomu ng'ali mu kibuga Nobu, naamanha nga taidha kuloba kukobera Saulo. Ninze naitisa ab'endhu ya lata wo.

²³ Sigala ghano ninze, otatya, kuba ali kwenda okwita iwe, n'ali kwenda okwita ninze. Ba ghano ninze ndidha okukukuuma.”