1 Samueli 19 - Baibuli Ekibono kya Katonda 2014

Saulo akiriga Daudi

¹ Agho Saulo yaakoba mutabane we Yonathani n'abakungu be boonaboona, baite Daudi. Aye Yonathani mutabane wa Saulo oyo, yali agonza inho Daudi.

² Kale Yonathani oyo yaakobera Daudi ati: “Lata wange Saulo ayenda kukwita. Kale weekuume. Enkyo weegise mu kifo ekyekusifu.

³ Nze ndidha kuja nhemerere kumpi naye eyo mu nimiro y'onaaba weegisiisa, olwo ndhogere naye ku iwe. Bwe ghanaabaagho kye nnaamufunamu, ndidha kukikumanhisa.”

⁴ Agho Yonathani yaayogera bukalamu ku Daudi ng'ali n'ise Saulo. Yaakoba ati: “Lata wange kyabazinga, togwaine kukola kabi ku Daudi, kuba mwene takukolangaku kabi, era ebintu by'abairenga akukolera bibaire bikalamu byereere.

⁵ Yata obulamu bwe aghabi, yaaja yaita Omufilisiti ole, olwo Musengwa Katonda yaatuusa Isiraeli ku bughanguzi obw'amaani. Era ekyo bwe wakibona wasagamba. Kale lwaki oyenda okukola akabi ku muntu aziraku musango, ng'oita Daudi aghazira nsonga?”

⁶ Saulo yaikiriza ebyo Yonathani bye yamukoba, era yaalayira ng'akoba ati: “Bwenebwene mu Katonda omulamu, tiidha kwita Daudi.”

⁷ Kale Yonathani yaayeta Daudi, yaamukobera ebintu ebyo byonabyona, era yaatwala Daudi oyo ye Saulo, yaagheerezanga Saulo oyo nga bwe yakolanga mu kusooka.

⁸ Kabiri ghaabaagho olutalo n'Abafilisiti, era Daudi yaaja yaabalwanisa, yaabaitamu abantu kamaala, abaasigalagho baalumuka.

⁹ Lwali lulala, Saulo bweyali atyaime mu ndhu ng'agemye eifumo lye, era nga Daudi ali kumukubira endingidi, omuzimu omubi Musengwa Katonda gwe yasindika gwamwidhaku.

¹⁰ Saulo oyo yaayenda okufumita Daudi eifumo limutunge ni ku kimante, aye Daudi yaalyewoma lyafumita bwa kimante. Daudi yaalumuka yaabulagho.

¹¹ Obwire obwo, Saulo yaasindika abakwenda ku ndhu ya Daudi, bamweteege bamwite enkyo ku nkyo. Aye Mikali muka Daudi oyo yaamulabula ati: “Bw'otaalumuke bwire buno kuwonia bulamu bwo, enkyo baidha kukwita.”

¹² Kale Mikali yaikiza Daudi mu dinisa, Daudi oyo yaalumuka yaawona.

¹³ Agho Mikali yaagema ekifaananie ky'omusambwa gw'omu maka, yaakirambaaza ku buliri. Yaata emintwetwe waakyo omwito ogwakolebwa mu buviiri bw'embuzi, yaakighembaku engoye.

¹⁴ Saulo bwe yatuma abakwenda okunona Daudi, Mikali yaabakoba ati: “Daudi mulwaire.”

¹⁵ Agho Saulo yaatuma abakwenda baireyo bamuboneku beene. Yaabakoba ati: “Muje mumubbeedere ku buliri bwe, mumuleete ghano, mmwite.”

¹⁶ Abakwenda bwe baingira, baaja okulinga bati nga babona ekifaananie ky'omusambwa gw'omu maka, nga n'ekiri mu buliri, nga n'omwito ogwakolebwa mu buviiri bw'embuzi guli emintwetwe waakyo.

¹⁷ Saulo yaabuuza Mikali ati: “Lwaki onimbye otyo, n'oleka omuzigu wange okuja n'abulagho?” Mikali yaamwiramu ati: “Yankobye ati, ‘Ndeka nje, ntakwita!’ ”

¹⁸ Agho Daudi yaalumuka yaabulagho, yaaja yaatuuka ye Samueli e Rama, yaamukobera byonabyona Saulo bye yamukola. Daudi oyo ni Samueli baaja e Naiothi baaba eyo.

¹⁹ Ghaabaagho eyakobera Saulo ati: “Daudi ali e Naiothi mu Rama.”

²⁰ Kale Saulo yaatuma abakwenda okugema Daudi. Aye abakwenda abo bwe baabona ekikunsu eky'abalanzi nga bali kulanga, nga Samueli ali nabo era nga n'omukulembeze waibwe, omwoyo gwa Katonda gwabaidhaku, boona baatoolera okulanga.

²¹ Agho abantu baakobera Saulo, yaatumayo abakwenda abandi, aye boona baatoolera okulanga. Era Saulo yaatumayo abakwenda abandi omukuzi ogwokusatu. Aye era boona baatoolera okulanga.

²² Kale mwene yaaja e Rama, yaatuuka ku nsulo enkologho eri e Seku, yaabuuza ati: “Samueli ni Daudi bali luuyi gha?” Agho ghaabaagho eyamukobera ati: “Bona eno, bali e Naiothi mu Rama.”

²³ Kale yaava agho, yaaja e Naiothi mu Rama. Bwe yali ali kuja, omwoyo gwa Katonda yeena gwamwidhaku. Yaaja ng'ali kulanga okutuusa bwe yatuuka e Naiothi mu Rama.

²⁴ Yeena yaatoolamu ebivaalo bye, yaalanga ng'ali mu maiso ga Samueli. Yaalambaala agho ng'ali madu obwire obwo bwonabwona. Okwo n'okwava endhogera ekoba eti: “Obwo Saulo yeena yafuuka mulanzi?”