1 Samueli 18 - Baibuli Ekibono kya Katonda 2014

¹ Daudi bwe yamala okwogera ni Saulo, Yonathani mutabane wa Saulo oyo, yaatoolera mule okugonza einho Daudi, era yaamugonzanga nga bwe yeegonzanga mwene.

² Okuva ku olwo, Saulo yaatwala ewuwe Daudi oyo, yaabanga eyo nga tamuganha kwirayo wa ise.

³ Agho Yonathani yaita omukago ni Daudi, kuba yagonzanga inho Daudi oyo nga bwe yeegonzanga mwene.

⁴ Yonathani yaatoolamu ekanzu ye yali avaire, yaagigha Daudi, yaamugha n'ekivaalo kye eky'omu lutalo, n'empiima ye, n'akalaso ke, era n'olusibiro lwe.

⁵ Daudi yaajanga, yaakolanga bukalamu buli kintu Saulo kye yamutumanga okukola. Kale Saulo yaamufuula omukulu w'abaisirukale. Ekyo kyasangaaza inho abagheereza ba Saulo n'abantu boonaboona.

Saulo agemerwa Daudi ensaalwa

⁶ Agho bwe baali nga bali kwira eka, nga Daudi yeena ali kwira ng'amaze okwita Omufilisiti, abakazi baava mu bibuga byonabyona ebya Isiraeli, baaja okweisuusaayo kyabazinga Saulo. Baaja nga bemba enhembo edh'eisanhu nga bwe bakina. Era baakuba obugoma n'ebivuga ebindi bye bakubiraku enhembo.

⁷ Abakazi abo baayemba nga basagamba bati: “Saulo aise nkumi na nkumi, Daudi yaita mitwalo na mitwalo.”

⁸ Agho Saulo yaasungughala inho olw'ebyo bye baakoba. Yaakoba ati: “Daudi bamubaliire mitwalo na mitwalo, aye nze bambalira bwa nkumi dhonka? Agho aba akaasigaiza kufuna ki, okutoolaku obwakyabazinga?”

⁹ Okuva ku lunaku olwo, yaalingiriranga Daudi ng'amwekengeera.

¹⁰ Ku lunaku olwairirira, omuzimu omubi Katonda gwe yasindika, gwaidha ku Saulo yaatawukira mu ndhu ye. Daudi yali ali kumukubira endingidi nga bwe yakolanga buli lunaku. Saulo yali agemye eifumo.

¹¹ Agho Saulo oyo yaakonhoogerera Daudi eifumo emikuzi ebiri ng'akoba mule ati: “Ka mmufumite eifumo limutunge ni ku kimante.” Aye Daudi yaalyewoma ku mikuzi egyo gyombi.

¹² Saulo yaatya Daudi, kuba Musengwa Katonda yali ng'ali ni Daudi oyo, aye ng'aviire ku Saulo.

¹³ Kale Saulo yaalekeza Daudi okubanga agho mu maiso ge, yaamufuula muduumizi wa baisirukale lukumi (1,000) Daudi yaabakulemberanga okuja mu ntalo.

¹⁴ Byonabyona Daudi bye yakolanga nga bimujiira bukalamu, kuba Musengwa Katonda yalinga ghalala naye.

¹⁵ Saulo bwe yabona nga byonabyona Daudi by'akola bimujiira bukalamu inho, yeeyongera okumutya.

¹⁶ Aye abantu boonaboona mu Isiraeli ni mu Buyudaaya, baayenda inho Daudi, kuba yabakulemberanga bukalamu.

Daudi afumbirwa mughala wa Saulo

¹⁷ Agho Saulo yaakoba Daudi ati: “Ndidha kukugha mughala wange omukulu Merabu, akufumbirwe. Aye oli n'okubanga omuntu aziramu ntete, olwanenga entalo dha Musengwa Katonda.” Saulo yakola ekyo ng'ali kukoba mule ati: “Nze ka ndeke okumwita, aye Abafilisiti n'ababe bamwite.”

¹⁸ Daudi yaakoba Saulo ati: “Katyo nze ninze ani? Era ab'endhu ya lata wange ni baani mu Isiraeli, nze okuba mukoirume wa kyabazinga?”

¹⁹ Aye ekiseera bwe kyatuuka eky'okugha Daudi Merabu amufumbirwe, ate Merabu oyo baamugha Adirieli ow'e Mehola, n'abe amufumbirwe.

²⁰ Aye ate mughala wa Saulo owundi ye baayetanga Mikali, yaayenda Daudi. Ekyo baakikobera Saulo era yaakisiima.

²¹ Saulo yaakoba mule ati: “Ka mmumughe, mmweyambise ng'omutego, era neeyambise n'Abafilisiti balwanise Daudi oyo.” Kale Saulo yaakoba Daudi omukuzi ogwokubiri ati: “Oidha kuba mukoirume wange.”

²² Era Saulo yaalagira abagheereza be ati: “Mwogere ni Daudi eyo nga muli mu kyama, mumukobe muti, ‘Bona eno, kyabazinga akusiima, n'abagheereza be boonaboona bakugonza. Kale ni kola obe mukoirume wa kyabazinga.’ ”

²³ Agho abagheereza ba Saulo, baakoba Daudi batyo. Daudi yaabakoba ati: “Mukyeta kintu kitono omuntu ng'oti ninze okuba mukoirume wa kyabazinga, ate nga ndi mwavu era atamanhiibwa naire?”

²⁴ Abagheereza abo baaja baakobera Saulo, ebyo Daudi bye yakoba.

²⁵ Agho Saulo yaabakoba ati: “Muje mukobe Daudi muti, ‘Kyabazinga taidha kusala mwandu ku mugole, okutoolaku obuwutu kikumi obukeketeibwa ku Bafilisiti. Olwo kyabazinga abe nga yeesasuuliiza ku bazigu be abo.’ ” Saulo yalowooza ati Abafilisiti baidha kwita Daudi.

²⁶ Agho Abagheereza ba Saulo bwe baakobera Daudi ebibono ebyo, Daudi yaasangaalira inho eky'okuba mukoirume wa kyabazinga. Era enaku nga dhikaali kubita,

²⁷ Daudi yaasitukiramu yaaja n'abasaadha be, yaita Abafilisiti ebikumi bibiri. Yaatwala obuwutu bwe yabakeketaku, yaabughaayo bwonabwona ye kyabazinga era yaabumubalira, olwo aghange okufumbirwa mughala we. Kale Saulo yaagha Daudi mughala we Mikali, yaamufumbirwa.

²⁸ Aye era Saulo yaakibona era yaakitegeera nga Musengwa Katonda ali ni Daudi, era nga Abaisiraeli boonaboona bagonza Daudi oyo.

²⁹ Kale yeeyongera okutya Daudi, era yaaba muzigu we ekiseera kyonakyona kye yamala nga mulamu.

³⁰ Agho abafuzi ab'Abafilisiti baavangayo okulwana n'Abaisiraeli. Aye buli mukuzi gwe baidhanga, nga Daudi aba n'obughanguzi okusinga abagheereza ba Saulo abandi boonaboona. Kale Daudi yaamanhikana inho.