1 Samueli 15 - Baibuli Ekibono kya Katonda 2014

Olutalo n'Abamaleki

¹ Agho Samueli yaakoba Saulo ati: “Musengwa Katonda yantuma okwidha y'oli okukusiiga omuzigo, obe kyabazinga ow'abantu be Abaisiraeli. Buti ni wulira by'akoba.

² Musengwa Katonda oyo Afuga Amagye akoba ati, ‘Ndidha kubonereza Abamaleki olw'ekyo kye baakola, eky'okulobera Abaisiraeli okubitagho bwe baali nga bava e Misiri.

³ Mpegaano ja oite Abamaleki, era ozikirize ni bye bali nabyo byonabyona. Ghatabaagho y'osaasira, aye baite boonaboona: abasaadha n'abakazi, abaana abato n'abayonka, era oite n'ente, n'entaama, n'engamiya, n'endogoyi.’ ”

⁴ Kale Saulo yaayeta abantu e Telaimu, yaababala. Baali abalwani emitwalo abiri (200,000) abaava mu Isiraeli, n'abandi omutwalo mulala (10,000) abaava mu Buyudaaya.

⁵ Saulo n'abalwani be baaja baatuuka ku kibuga eky'Abamaleki, baaja mu kiiko baabeeteega.

⁶ Saulo yaakoba Abakeni ati: “Imwe muje muve mu Bamaleki, ndobe kubazikiriza ghalala nabo, kuba imwe mwagemerwa Abaisiraeli ekivunika bwe baali bava e Misiri.” Kale Abakeni baaja, baava mu Bamaleki.

⁷ Saulo yaaghangula Abamaleki okuviira irala e Havila okutuuka e Shuri, ekiri e buvandhuba wa Misiri.

⁸ Yaatwala Agagi, kyabazinga w'Abamaleki, nga mulamu, yaazikiriza abantu boonaboona okubamalagho.

⁹ Aye Saulo n'abalwani be baasaasira Agagi baaloba kumwita. Era baalekagho entaama n'ente empiite ensavu, n'entaama entototo, n'ebintu ebindi eby'omugaso, baaloba kubizikiriza. Ebintu ebindi bye bataabonamu kalungi oba omugaso baabizikiriza.

Musengwa Katonda atoola ku Saulo obwakyabazinga

¹⁰ Agho Musengwa Katonda yaakoba Samueli ati:

¹¹ “Neidhwisa okuba nga nafuula Saulo kyabazinga, kuba anviireku yaalekera agho okuwulira ebiragiro byange.” Agho Samueli yaasungughala, obwire bwonabwona yaasula nga yeegayirira Musengwa Katonda.

¹² Bwe bwakya, Samueli yaawuuna okuja okubona Saulo. Baamukobera bati: “Saulo yajiire Karumeli, mwene ye yeezimbira ekiidhukizo, era yamaze yeeyongerayo yaatuuka e Giligali.”

¹³ Samueli yaaja yatuuka ku Saulo. Saulo yaamulamusa ati: “Musengwa Katonda akughe enkabi. Ntuukiriiza ekiragiro kya Musengwa Katonda.”

¹⁴ Samueli yaamubuuza ati: “Ate lwaki ndi kuwulira entaama nga dhibbaalaaga n'ente nga dhimoola?”

¹⁵ Saulo yaamwiramu ati: “Abalwani bange baadhireeta nga badhitoola ku Bamaleki, kuba baalekaghooku ku ntaama ni ku nte edhisinga bulungi, okudhighaayo eri Musengwa Katonda wo ng'omusengo. Aye ebintu ebindi byonabyona twabizikiriza.”

¹⁶ Samueli yaakoba Saulo ati: “Sooka oleke, nkukobere Musengwa Katonda bye yankobye obwire.” Saulo yairamu ati: “Kale nkobera.”

¹⁷ Samueli yaamukoba ati: “Waire iwe mwene weebona nga toli wa ndhawulo ku bantu bandi, aye ti niiwe akulira ebika byonabyona mu Isiraeli? Musengwa Katonda yakusiiga omuzigo obe kyabazinga wa Isiraeli.

¹⁸ Yaakutuma okukola omulimo ng'akoba ati, ‘Ja ozikirize abakozi ab'ebibi abo, Abamaleki, ng'obalwanisa okutuusa lw'olibaita n'obamalagho.’

¹⁹ Kale, lwaki tiwagondera kiragiro kya Musengwa Katonda? Lwaki wagwidhubanira ku kutwala omunhago, n'okola ekibi ekisungughaza Musengwa Katonda?”

²⁰ Saulo yairamu ati: “Nagondera ekiragiro kya Musengwa Katonda, naaja naakola omulimo gwe yantuma. Naaleeta Agagi kyabazinga w'Abamaleki, era naazikiriza Abamaleki boonaboona.

²¹ Aye abalwani bange n'abaatoola ku munhago, entaama n'ente edhaali dhisingamu obulungi, mu ebyo byonabyona ebyali eby'okuzikiriza, baabireeta okubighaayo ng'omusengo eri Musengwa Katonda wo, ghano e Giligali.”

²² Samueli yaakoba Saulo ati: “Iwe odhuuba oti Musengwa Katonda asiima inho ebigheebwayo ebyokebwa n'emisengo, ng'oti ni bw'asiima okugondera ebiragiro bye? Bona eno, okumugondera kusinga okumugha emisengo, n'okumuwulira kwasinga okumugha amasavu ag'entaama enume.

²³ Obudheemu kuba kukola kibi ng'oti n'okweraguza bwe kuba, n'okwekuluntaza kuba kukola kibi ng'oti n'okusinza ebitali Katonda bwe kuba. Nga bwe waloba okukola Musengwa Katonda kye yakulagira, Musengwa Katonda yeena alobye okukuleka ku bwakyabazinga.”

²⁴ Saulo yairamu ati: “Nayonoona naadheemera ebiragiro bya Musengwa Katonda, era naaloba kujiira ku ebyo bye wansikirira, kuba natya abantu, naajiira ku bye bankoba.

²⁵ Aye nkusaba onsonighe ekibi ekyo era oireyo ninze, nsobole okusinza Musengwa Katonda.”

²⁶ Samueli yaamwiramu ati: “Tiidha kwirayo n'iwe, kuba waloba okukola Musengwa Katonda kye yakulagira, era Musengwa Katonda yeena alobye okukuleka ku bwakyabazinga bwa Isiraeli.”

²⁷ Agho Samueli yali akyuka ati okuja, Saulo yaamugema ekivaalo era kyakanuka.

²⁸ Samueli yaamukoba ati: “Musengwa Katonda akukanwireku obwakyabazinga bwa Isiraeli olwaleero, yaabugha muliraanwa wo akusinga obulungi.

²⁹ Ate ekindi, oyo Ekitiisa kya Isiraeli talimba oba okweidhusa, kuba ti muntu amala ni yeidhusa.”

³⁰ Agho Saulo yaakoba ati: “Nayonoona, mala gantaamuuku ku kanhagansi mperaano mu maiso g'abakulembeze ab'abantu bange n'ag'Abaisiraeli boonaboona, oireyo ninze nsobole okusinza Musengwa Katonda wo.”

³¹ Kale Samueli yairayo ni Saulo, era Saulo yaasinza Musengwa Katonda.

³² Agho Samueli yaakoba ati: “Mundeetere ghano Agagi kyabazinga w'Abamaleki.” Agagi yaidha ng'aliku akamwenhumwenhu ng'akoba mule ati: “Bwenebwene obulumi obw'okufa mbuwonie.”

³³ Samueli yaamukoba ati: “Ng'empiima yo bwe yalekanga abakazi nga baziraku baana, ni inhoko yeena atyo bw'aja okusigala ng'aziraku mwana mu bakazi baine.” Era agho Samueli yaatematema Agagi bukutukutu, agho mu maiso ga Musengwa Katonda e Giligali.

³⁴ Agho Samueli yaaja e Rama, ni Saulo yeena yaaja mu maka ge e Gibea ekya Saulo.

³⁵ Era Samueli tiyairayo kubona ku Saulo okutuusa bwe yafa. Aye yasigala ng'ali mu nnaku olwa Saulo oyo. Era Musengwa Katonda yeidhusa olw'okufuula Saulo okuba kyabazinga wa Isiraeli.