1 Samueli 13 - Baibuli Ekibono kya Katonda 2014

Olutalo ku Bafilisiti

¹ Saulo yali ng'agheza emyaka…egy'obukulu ghe yatoolerera okufuga, era yaafugira Isiraeli emyaka …n'ebiri.

² Saulo yalonda mu Baisiraeli abasaadha enkumi isatu (3,000). Ku abo yaatoolaku enkumi ibiri (2,000) baabanga ghalala naye e Mikamashi ni mu kiketezo eky'oku nsozi eky'e Betheli. Ate olukumi (1,000) baabanga ghalala ni Yonathani e Gibea mu kiketezo kya Benjamini. Abantu abandi boonaboona yaabasiibula, bairayo ewaibwe.

³ Yonathani yaaghangula enkambi y'abalwani Abafilisiti e Geba, era Abafilisiti baakiwulira. Agho Saulo yaafuuwa eigwala okubuna eighanga lyonalyona, ng'akoba ati: “Abaheburayi boonaboona ka bawulire!”

⁴ Abaisiraeli boonaboona baawulira bati Saulo aghangwire enkambi y'abalwani Abafilisiti. Era baawulira bati Abafilisiti beesiniirwa Abaisiraeli. Kale abantu baayetebwa okuja okweyimba ku Saulo e Giligali.

⁵ Agho Abafilisiti beesoloza okulwanisa Abaisiraeli. Baali n'ebigaali eby'omu lutalo emitwalo esatu (30,000), n'abalwani kakaaga (6,000) ab'oku mbalaasi, era n'abalwani abaali abangi ng'oti musenho oguba ku mbali kw'enhandha. Abalwani Abafilisiti abo, baaja baasimba weema dhaibwe e Mikamashi, ku luuyi olw'e bugwandhuba wa Bethaveni.

⁶ Abaisiraeli bwe baabona nga bali mu kabi, era ng'eigye lyaibwe balinhigiriiza, beegisa mu mpuku, mu biina, mu mabaale, mu magombe, ni mu nsulo edh'amaadhi.

⁷ Abandi ku Baisiraeli baabitira mu kifo omwiga Yorudani ghe gusomokerwa, baingira mu kiketezo kya Gadi n'ekya Gileadi. Saulo yali akaali e Giligali. Abantu boonaboona baamunonereza nga bali kudhugumira.

⁸ Yaamala enaku musanvu ng'ali kuteega Samueli, nga Samueli oyo bweyamulagira. Aye Samueli yaaba ng'akaali kwidha Giligali. Abantu baatoolera okusansaana nga bava ku Saulo.

⁹ Agho Saulo yaakoba ati: “Mundeetere ghano ekigheebwayo ekyokebwa n'ebigheebwayo olw'okutabagana.” Yaaghaayo ekigheebwayo ekyokebwa.

¹⁰ Yali yaakamala ati okughaayo ekyokebwa ekyo, Samueli yaatuuka. Agho Saulo yaaja okumusangaaza n'okumulamusa.

¹¹ Samueli yaakoba ati: “Okoze ki kino?” Saulo yairamu ati: “Naboine ng'abantu bali kusansaana nga banvaaku, ate nga iwe toidhiire mu nnaku dhe wakoba, n'Abafilisiti nga beesoloiza e Mikamashi.

¹² Kale naakoba nti Abafilisiti baidha kwidha baanumbe ghano e Giligali, ate nga nkaali kweghemba Musengwa Katonda kungemerwa kivunika. Kye naviire ni neeghaliriza okughaayo ekigheebwayo ekyokebwa.”

¹³ Samueli yaakoba Saulo ati: “Ekyo okoze kya busiru. Togemye kiragiro kya Musengwa Katonda wo kye yakugha. Ngoli okigemye, Musengwa Katonda yandibaire mpegaano nga yamala ira okuleetera obwakyabazinga bwo okukakata, bwabanga bwa nsikirano mu Isiraeli enaku dhoonadhoona.

¹⁴ Aye mpegaano obwakyabazinga bwo tibuubenga bwa nsikirano. Musengwa Katonda anooniizaayo omuntu mwene y'asiimye, yaamutaagho okukulemberanga abantu be, kuba iwe togemye kye yakulagira.”

¹⁵ Agho Samueli yaasitula yaava e Giligali, yaaja e Gibea ekya Benjamini. Saulo yaabala abantu abaali agho naye, nga baghera ng'oti lukaaga.

¹⁶ Saulo, ni mutabane we Yonathani, n'abantu abaali aghalala nabo, baasigala e Geba ekya Benjamini. Aye Abafilisiti baasimba weema dhaibwe e Mikamashi.

¹⁷ Agho Abafilisiti nga bali mu bikunsu bisatu, baaja okunhaga nga bava mu kifo ekyo ghe baasimba weema dhaibwe: Ekikunsu kirala kyagema engira eja mu Ofura mu kiketezo ky'e Suali.

¹⁸ Ekikunsu ekindi kyagema engira eja e Bethi Horoni. Ate ekikunsu ekindi kyagema engira eja ku nsalosalo eringiriire ekiiko ky'e Zeboimu, okwolekera eirungu.

¹⁹ Mu Isiraeli mwonamwona timwalimu mugheesi waire omulala ati, kuba Abafilisiti baali nga balekeiza Abaisiraeli okugheesa empiima n'amafumo.

²⁰ Abaisiraeli baalinga n'okuja eri Abafilisiti okughagala embago dhaibwe, n'emiwolo gyaibwe, n'empasa dhaibwe, n'ebifumo byaibwe.

²¹ Abafilisiti abo baabawoozangaku empiiya ibiri okughagala embago n'emiwolo, ate baabatoolangaku empiiya ndala okughagala empasa n'okusongola enti dhe baakozesanga okusindiikiriza ente okutambula.

²² Kale, ku lunaku olw'olutalo tighaali muntu waire omulala ati, ku abo abaali ni Saulo ni Yonathani, eyali n'empiima oba eifumo, okutoolaku Saulo ni mutabane we Yonathani bonka.

²³ Abafilisiti abalwani baava mu nkambi, baaja okukuuma aghaingirirwa e Mikamashi.