1 Samueli 12 - Baibuli Ekibono kya Katonda 2014

Samueli ayogera eri abantu

¹ Agho Samueli yaakoba Abaisiraeli boonaboona ati: “Mubone eno, nkoze byonabyona bye mwansaba, naabateeragho kyabazinga ow'okubafuga.

² Mperaano wuuyo aidha kubakulemberanga. Nze ndi mukaire ow'envu, era mubona batabane bange abali n'imwe. Nze mbakulembeire okuva nga ndi mwisuka okutuusa ni ye buli eno.

³ Ndi ghano, mpegaano muunumirize mu maiso ga Musengwa Katonda ni mu maiso ga kyabazinga ye yasiiga omuzigo. Naani ye nanhagaku ente ye? Oba naani ye nanhagaku endogoyi ye? Naani ye nakupankupaniaku oba waire okumutetenkereza mu kintu kyonakyona? Oba naani ye nalyakuuku enguzi? Bwe mba nga ghaligho ku ebyo kye nakola, muunumirize, ndidha kukibairizaagho.”

⁴ Baamukoba bati: “Busa. Totukupankupaniangaku waire okututetenkereza, oba okutwala ekintu eky'omuntu yeenayeena.”

⁵ Samueli yaabakoba ati: “Musengwa Katonda ghalala ni kyabazinga ye yasiiga omuzigo, n'abadhulizi ababalumiriza imwe, okukakasa nga nziraku kye nvunaanibwa.” Bairamu bati: “Yii, Musengwa Katonda n'omudhulizi.”

⁶ Samueli era yaakoba abantu ati: “Musengwa Katonda n'eyataagho Musa ni Aaroni, era n'eyatoola badhaadha baimwe mu nsi Misiri.

⁷ Kale ni, buti mwemerere bukalamu mbalumirize mu maiso ga Musengwa Katonda olw'ebirungi byonabyona bye yabakolera imwe ni badhaadha baimwe.

⁸ Yakobo bwe yaja e Misiri n'ab'endhu ye, memale Abamisiri ni babatuntuza, badhaadha baimwe abo baalirira Musengwa Katonda. Era Musengwa Katonda yaatuma Musa ni Aaroni, baatoola badhaadha baimwe abo e Misiri, baabaleeta okuba mu nsi eno.

⁹ Aye badhaadha baimwe beerabira Musengwa Katonda waibwe. Era Musengwa Katonda oyo yaabaghaayo mu mikono gya Sisera omuduumizi w'eigye lya kyabazinga Yabini ow'e Hazori, ni mu mikono gy'Abafilisiti, era ni mu mikono gya kyabazinga w'e Moabu abo boonaboona baalwanisa badhaadha baimwe abo.

¹⁰ Agho badhaadha baimwe baalirira Musengwa Katonda, nga bakoba bati: ‘Twakola ebibi, kuba twava ku Musengwa Katonda twagheereza emisambwa Baali ni Ashitarothi. Aye mperaano tukweghemba otuwonie abazigu baife, twidha kukugheerezanga.’

¹¹ Agho Musengwa Katonda yaatuma Yerubbaali, ni Baraki, ni Yefutha, ni Samueli, olwo yaajanga ng'awonia imwe abazigu baimwe ababeezungulwire, era mwaba mu miraala.

¹² Aye bwe mwabona nga kyabazinga Nahashi ow'Abammoni ali kwidha okubalumba, mwaloba Musengwa Katonda waimwe okuba kyabazinga waimwe. Mwankoba muti, ‘Twenda kyabazinga n'abe atufugenga.’

¹³ “Mperaano ni, mubone, kyabazinga ye mulonze wuuyo. Mwasaba kyabazinga, era wuuyo Musengwa Katonda amubaghaire okubafuga.

¹⁴ Ebintu byonabyona biidha kubajiiranga bukalamu, bwe munaisanga mu Musengwa Katonda ekitiisa, ni mumugheereza nga mumuwulira era nga mugema ebiragiro bye, era ni mujiiranga ku Musengwa Katonda waimwe oyo nga muli ghalala ni kyabazinga waimwe abafuga.

¹⁵ Aye bwe mutaawulirenga Musengwa Katonda, era ni mutagema biragiro bye, olwo aidha kubalwanisanga imwe era ni kyabazinga waimwe.

¹⁶ Kale ni, buti mwemerere bukalamu, mubone Musengwa Katonda ky'aja okukola.

¹⁷ Ekiseera kino kya makungula ga ngaano. Aye nja kweghemba Musengwa Katonda aleetegho okutyabuka kw'olukuba era agwise n'amaadhi, memale mumanhe ng'ekibi kyaimwe kye mwakola ye Musengwa Katonda kinene, eky'okumusaba kyabazinga.”

¹⁸ Kale Samueli yeeghemba Musengwa Katonda. Musengwa Katonda yaaleetagho okutyabuka kw'olukuba era yaagwisa amaadhi ku lunaku olwo. Abantu boonaboona baatya inho Musengwa Katonda ni Samueli.

¹⁹ Baakoba Samueli bati: “Tusabire eri Musengwa Katonda wo, ife abagheereza bo tulobe kufa, kuba ku bibi byaife byonabyona bye tuli nabyo, kabiri twongeireku ni kino eky'okwesabira kyabazinga.”

²⁰ Samueli yaakoba abantu ati: “Mutatya. Waire mukoze ekibi ekyaga agho mutavanga ku Musengwa Katonda, aye mumugheerezenga n'omwoyo gwaimwe gwonagwona.

²¹ Era mutadaaliimanga ni mujiira ku bintu ebiziramu muganhulo, ebitaghanga kugasa waire okuwonia omuntu, kuba biziramu muganhulo.

²² Musengwa Katonda, olw'eriina lye eikologho, taja kubalekulira agho imwe, kuba yasiima mwene okubafuula eighanga lye.

²³ Era ku lwange, neeghemba Musengwa Katonda ansaasire ndobe kukola kibi ni mmusungughaza, nga ndekayo okubasabira imwe. Era ndidha kubeegeresanga ekirungi era ekituufu kye mugwaine okukola.

²⁴ Kale ni mwisenga mu Musengwa Katonda ekitiisa, mumugheerezenga nga muli beesigwa n'omwoyo gwaimwe gwonagwona, nga mwidhukira ebintu ebikologho by'abakoleire.

²⁵ Aye bwe muneeyongera okukola ebibi, mwidha kuzikirira era ni kyabazinga waimwe.”