1 Samueli 10 - Baibuli Ekibono kya Katonda 2014

¹ Agho Samueli yaatoola akadoome k'omuzigo ogw'ebibala eby'emiti emyoliva, yaafuka omuzigo ku mutwe gwa Saulo, era yaamugwa mu kifuba ng'akoba ati: “Musengwa Katonda akufuseeku omuzigo ogwo obe omukulembeze ow'abantu be Abaisiraeli. Oidha kufuganga abantu ba Musengwa Katonda, era oidha kubawonianga abazigu baibwe ababeezungulwire. Era kano n'akamanhiso akakakasa nga Musengwa Katonda akusiize omuzigo obe omukulembeze w'abantu be.

² Olwaleero bw'onaava ghano ghe ndi, oidha kwagaana abantu babiri, nga bali kumpi n'amagombe ga Rakeli e Zeluza mu kiketezo kya Benjamini. Baidha kukukobera bati endogoyi dhe wajiire okwagala dhiboneike, era bati mpegaano lata wo aviire ku kulowooza ku ndogoyi, yaira ku kweraliikirira bwa iwe, ng'akoba ati, ‘Nnaakola ntya olw'omwana wange?’

³ Agho oidha kuvaagho, weeyongereyo otuuke ku muti omukologho oguli e Tabori, y'onaayagaana abantu basatu nga bali kuja e Betheli okusinza Katonda. Omulala ku abo aidha kuba ng'ali kutwala embuzi entototo isatu, owundi ng'ali kutwala emigaati esatu, n'owundi ng'ali kutwala ensawo ey'omwenge gw'emizabbibu ey'oluwu.

⁴ Abantu abo baidha kukulamusa, bakughe emigaati ebiri, era oganhe ogitwale.

⁵ Olwo oidha kuja ku lusozi lwa Katonda Abafilisiti ghe baata enkambi dhaibwe edh'abalwani. Bw'onaaba oli kutuuka ku kibuga, oidha kwagaana ekikunsu ky'abalanzi nga bali kwikirira okuva mu kifo ekigulumivu eky'okusinzizaamu, nga bali kulanga era nga bakulembeirwamu ab'entongooli, ab'obugoma, ab'endere, n'ab'endingidi.

⁶ Agho omwoyo gwa Musengwa Katonda gwidha kukwidhaku n'amaani mangi, ofuuke muntu wundi era olange ghalala nabo.

⁷ Obumanhiso obwo bwe bunaakutuukaku, iwe kola bukole kyonakyona ky'osobola okukola, kuba Musengwa Katonda ali ghalala n'iwe.

⁸ Oidha kuja e Giligali oneesookengayo. Eyo ye ndidha okukwagaana, mpeeyo ebigheebwayo ebyokebwa n'emisengo egigheebwayo olw'okutabagana. Oidha kunteegera eyo okumala enaku musanvu, memale ndidhe nkulage eky'okukola.”

⁹ Saulo bwe yakyuka n'akuba Samueli omugongo okuva gh'ali, Katonda yaakyusa Saulo oyo omwoyo. Era obumanhiso obwo bwonabwona bwatuukirira ku lunaku olwo.

¹⁰ Agho Saulo n'omugheereza we bwe baatuuka ku lusozi lwa Katonda, ekikunsu ky'abalanzi kyayagaanana nabo. Omwoyo gwa Katonda gwamwidhaku n'amaani mangi, era yaalanga ghalala nabo.

¹¹ Abantu boonaboona abaali bamwidhi okuva eira bwe baamubona ng'ali kulanga ghalala n'abalanzi, beebuuzagania beene na beene bati: “Kiki ekituuse ku Saulo mutabane wa Kishi? Obwo yeena abalirwa mu balanzi?”

¹² Agho omuntu ow'omu kiketezo ekyo yairamu ati: “Ate bano abalanzi abandi, iseibwe naani?” Okwo n'okwava endhogera ekoba eti: “Obwo Saulo yeena abalirwa mu balanzi?”

¹³ Saulo bwe yamala okulanga, yaaja mu kifo ekigulumivu eky'okusinzizaamu.

¹⁴ Muganda wa lata wa Saulo, yaabuuza Saulo n'omugheereza we ati: “Mwabaire mujiire gha?” Saulo yaamwiramu ati: “Twabaire tujiire kwagala ndogoyi. Aye bwe twaboine nga tidhiboneike, twaja eri Samueli.”

¹⁵ Muganda wa lata wa Saulo, yaakoba Saulo ati: “Nkweghembye nkobera Samueli bye yakukobye.”

¹⁶ Saulo yaakoba muganda wa lata we ati: “Yatukakaisa ati bwenebwene endogoyi dhaaboneike.” Aye tiyamukoberaku naire ku bigema ku bwakyabazinga, Samueli bye yayogera.

Saulo bamulangirira nga ni kyabazinga

¹⁷ Samueli yaayeta abantu, beesololeza e Mizipa okusinza Musengwa Katonda.

¹⁸ Yaakoba Abaisiraeli ati: “Musengwa Katonda, Katonda wa Isiraeli akoba ati, ‘Nabatoola e Misiri naabawonia Abamisiri okubatuntuza, era naabawonia n'amaghanga agandi goonagoona agaabanhigirizanga.

¹⁹ Aye olwaleero muviire ku Katonda waimwe abawonia ebibamba n'ebizibu ebibagwira. Era munkobye mbateeregho kyabazinga abafuge. Kale ni, buti mwesoloze nga muli munda dhaimwe ni mu bika byaimwe.’ ”

²⁰ Agho Samueli yaayeta buli kika kiri mu Isiraeli akalulu kaagwa ku kika kya Benjamini, kyalondebwamu.

²¹ Yaayeta buli nda eri mu kika kya Benjamini akalulu kaagwa ku nda ya Maturi, yaalondebwamu. Era yaayeta buli musaadha ali mu nda ya Maturi akalulu kaagwa ku Saulo mutabane wa Kishi, yaalondebwamu. Aye bwe baamunoonia, yaababula.

²² Beeyongera okwebuuza ku Musengwa Katonda bati: “Omusaadha oyo ali ghano, oba ekaaliyo owundi?” Musengwa Katonda yairamu ati: “Wuule yeegisiisa mu bintu.”

²³ Agho baalumuka, baaja baamutoolayo. Saulo bwe yayemerera mu bantu, yali abasinga boonaboona obuleeyi, okuva ku mabega ge okwira ghaigulu.

²⁴ Agho Samueli yaakoba abantu boonaboona ati: “Muboine oyo Musengwa Katonda y'alonze? Ezira ayaga naye mu bantu boonaboona.” Abantu boonaboona baakuba emizira bati: “Kyabazinga ghangaala!”

²⁵ Samueli yainhonhola abantu ebyo kyabazinga by'ali n'okukolera abantu, n'ebyo abantu beene bye bali n'okukolera kyabazinga oyo. Ebintu ebyo yaabighandiika mu kitabo, yaabita mu maiso ga Musengwa Katonda. Agho Samueli yaasiibula abantu boonaboona, buli muntu yairayo ewaibwe.

²⁶ Ni Saulo yeena yaaja ewuwe e Gibea. Yaaja n'abasaadha abaziramu ntete naire, Katonda be yagumya emyoyo.

²⁷ Aye ghaabaagho abantu abazira kye bagasa, abaakoba bati: “Omusaadha oyo alituwonia atya?” Kale baamunhooma, baaloba kumutwalira birabo. Aye mwene yaabaleka buleke.