1 Petero 5 - Baibuli Ekibono kya Katonda 2014

Okwaya ebyayo bya Katonda

¹ Nhenda okukubiriza abo abakulembeze b'abaikiriza abali mu imwe. Zeena nga bwendi mukulembeze munaibwe eyaboneraku irala okudaazibwadaazibwa kwa Kurisito, era aja okugabana ku kitiisa ekija okwolekebwa, mbakubiriza

² okwayanga obukalamu ebyayo bya Katonda bye yabagemya. Mutakolanga mutyo lwa kukakibwa, aye mukolenga n'omwoyo ogwenda, era nga ti lwa kugwidhubanira bya kufuna.

³ Mulobenga kwebisa oti bafuzi mu byayo omwo, aye mubenga kya kuboneraku.

⁴ Olwo omwayi omukulu mwene bw'aliboneka, mulifuna engule ey'ekitiisa etawaagho.

⁵ Mu nsambo n'endala imwe abato mubenga bawulize eri abakulu mu myaka. Mwenamwena mubenga bawombeefu, nga kiisi mulala agheereza mwine. Kuba ebyaghandiikibwa bikoba biti: “Katonda atakania abeekudumbaza, aye abeewooya abooleka ekisa.”

⁶ Kale ni mwewooye ghansi gh'omukono gwa Katonda ogw'amaani, olwo alibafuula okuba aba ghaigulu mu kiseera kye ekituufu.

⁷ Mumulekere ebibeeraliikiriza byonabyona, kuba abafaaku inho.

⁸ Mwefugenga era mubenga beetegefu kuba Sitaani omuzigu waimwe aja nga atambulatambula ng'oti mpologoma eja ng'ewologoma, ng'eyagala y'enaakaavuula.

⁹ Mutamuganha era mwekalangulire mu kwikiriza kwaimwe, nga mwidhi bukalamu nga baganda baimwe mu nsi yoonayoona bali kudaazibwadaazibwa mu nsambo n'endala eyo.

¹⁰ Aye olumaliira olw'okudaazibwadaazibwa akaseera akatono, Katonda ow'ekisa ekitakoma eyabeeta mube mu kitiisa kye ekitawaagho mu Kurisito, alibagoloza, yaabagha amaani era yaabagumya.

¹¹ Katonda oyo afugenga ebyanda n'ebyanda. Amiina.

Okusiibula

¹² Mbaghandiikiire embaluwa eno enhimpi nga nhambibwaku Siluvano, nze ye mbona nga Mukurisito munange omwesigwa. Ndi kubakubiriza era naabakakasa nti kino kye mpandiise n'ekisa kya Katonda kyenekyene, era mutakivangamu.

¹³ Bakuristo banaimwe ab'omu Kikunsu eky'Abaikiriza mu Kurisito eky'omu Babiloni, boona abaalondebwa Katonda babalamwisa. Era n'omwana wange Mariko yeena abalamwisa.

¹⁴ Mulamusaganienga nga munhwegeragana mu kugonzania. Emiraala gibe n'imwe mwenamwena mu Kurisito.