1 Petero 3 - Baibuli Ekibono kya Katonda 2014

Abakazi ni baibaibwe

¹ Mu nsambo n'endala, abakazi muwulirenga baibaimwe. Olwo, abandi ku abo waire mperaano tibaikiriza kibono, basobole okuleetebwa mu kwikiriza olw'empisa dhaimwe enkalamu nga ghazira ni kye mubakobyeku.

² Kuba baja kubona empisa dhaimwe enkalamu edhibagheesa ekitiisa.

³ Obulungi bwaimwe bulobe kubanga ku bya ku ngulu, nga mulanga enviiri, nga mwetimbatimba ebya zaabu, n'okuvaala ebivaalo ebyamadholobera.

⁴ Aye bubenga mu mwoyo munda, n'omube mube eky'omughendo ekitayonooneka eky'obuwombeefu n'emiraala. Bino bya mughendo inho mu maiso ga Katonda.

⁵ Batyo abakazi abatuukirivu ab'eira abaata eisuubi lyaibwe mu Katonda, bwe beewoomyanga era ni bawuliranga baibaibwe.

⁶ Nga Sara bwe yawuliranga Aburahamu n'amwetanga musengwa we, mwena buti muli baghala be bwe mukola obukalamu, era ni ghatabaagho kye mutya.

⁷ Mu nsambo n'endala eyo abasaadha mubenga ni bakazi baimwe nga mwidhi muti mu kikula kyaibwe banafu. Mubatengamu ekinhagansi kuba mulifuna nabo obulamu obutawaagho. Mukole mutyo ghabule ekitabulatabula okusaba kwaimwe.

Okudaazibwadaazibwa olw'okukola ekituufu

⁸ Ekisembayo mwisanienga mwenamwena era nga mulumirwagana. Mugonzenga aboluganda era mubenga ba kisa era abawombeefu.

⁹ Timwesasuuzanga nga mukoleibwa ekibi, oba okuvuma nga muvumiibwa, aye mubasabirenga bwa nkabi kuba kino Katonda kye yabeetera, olwo mufune enkabi.

¹⁰ Kuba ebyaghandiikibwa bikoba biti: “Kiisi ayenda okufuna obulamu, n'okuba obukalamu, akuume olulimi lwe lulobe kwogera bibi, n'omunwa gwe gulobe kwogera bya buguya.

¹¹ Ave mu kukola ebibi akole ebituufu, anoonie eidembe era alitambuliremu;

¹² kuba amaiso ga Musengwa tigava ku batuufu, era talekera kuwulirisa kusaba kwaibwe. Aye abo abakola obubi abakambughalira.”

¹³ Kale bwe munaafubanga okukola ekituufu naani anaabakolanga akabi?

¹⁴ Ni bwe munaadaazibwadaazibwanga olw'okukola ekituufu, muli ba nkabi. Mutatyanga muntu yeenayeena waire okweraliikirira,

¹⁵ aye mu myoyo gyaimwe mutyenga Kurisito nga ni Musengwa. Buli kaseera mubenga beetegefu okwiramu omuntu yeenayeena ababuuza ku kusuubira kwe muli nakwo mu imwe. Aye kino mukikolenga na idembe era na kitiisa.

¹⁶ Mubenga baamufu mu myoyo gyaimwe, olwo muswazenga abo ababavuma n'ababoogeraku obubi ku mpisa dhaimwe enkalamu edh'Obukurisito.

¹⁷ Ekisinga bukalamu n'okudaazibwadaazibwa olw'okukola ekituufu, bwe kuba nga n'okwenda kwa Katonda, mu kifo eky'okudaazibwadaazibwa olw'okukola obubi

¹⁸ kuba ni Kurisito atyo bwe yafa olw'ebibi byaife omukuzi mulala guti era yaamala. Oyo aziraku kibi yaafiirira aboonooni, olwo atutuuse ye Katonda. Yaitibwa mu mubiri aye yairizibwa obulamu mu mwoyo.

¹⁹ Era mu mwoyo yaaja okukobera emyoyo emisibe mu ikomera ekibono.

²⁰ Egyo n'emyoyo egy'abo abaaloba okuwulira Katonda eyabaguminkiriza mu biseera Noa bye yazimbiramu eryato. Mu lyato omwo n'omwawonera abantu abatono bati omunaana, abaawonagho mu maadhi.

²¹ Amaadhi ago gafaanana n'okubatizibwa okubalokola buti. Okubatizibwa okwo, ti n'okunaazaaku eiko ku mubiri, aye n'okweghemba Katonda atughe omwoyo omunaabuufu olw'okuzuukira kwa Yesu Kurisito.

²² Kurisito oyo yaja mu igulu era atyaime ku luuyi olw'omukono omusaadha ogwa Katonda. Era afuga bamalaika, n'ab'obukumu, n'ab'amaani ab'omu igulu.