1 Ebyomubyanda 9 - Baibuli Ekibono kya Katonda 2014

Abantu abaira okuva mu bunhage

¹ Abaisiraeli boonaboona baaghandiikibwa mu nkalala edh'obuzaale bwaibwe. Enkalala edho dhaaghandiikibwa mu Kitabo kya Bakyabazinga ba Isiraeli. Agho abantu b'omu kika kya Yuda baali nga bamaze okutwalibwa e Babilonia mu bunhage, ng'ekibonerezo olw'ebibi byaibwe.

² Kale abaasooka okwira mu bibandha byaibwe ni mu bibuga byaibwe, baali abandi ku Baisiraeli ababuliidho, ni bakabona, n'Abalevi, abaagheerezanga mu isinzizo.

³ Abandi ku b'omu kika kya Yuda, n'ekya Benjamini, n'ekya Efuraimu, n'ekya Manasse, baaja baaba mu Yerusalemu. Era abantu abo, ni bano:

⁴ Mu baasimuka mu Perezi mutabane wa Yuda, mwalimu Uthai mutabane wa Ammihudi, era mwidhukulu wa Omuri, mutabane wa Imuri, mutabane wa Bani.

⁵ Mu baasimuka mu Shilo nga yeena mutabane wa Yuda, mwalimu Asaia eyali omwana omuberi, ni batabane be.

⁶ Mu baasimuka mu Zera era nga yeena mutabane wa Yuda, mwalimu Yeueli ni baganda be. Ab'omu kika kya Yuda abo boonaboona aghalala, baali abantu lukaaga na kyenda (690).

⁷ Mu baasimuka mu kika kya Benjamini mwalimu bano: Sallu mutabane wa Meshullamu, era mwidhukulu wa Hodavia eyali mutabane wa Hassenua

⁸ ni Ibuneia mutabane wa Yerohamu ni Ela mutabane wa Uzzi era mwidhukulu wa Mikiri ni Meshullamu mutabane wa Shefatia, era mwidhukulu wa Reweli eyali mutabane wa Ibuniya.

⁹ Ab'omu kika kya Benjamini abo boonaboona aghalala, ng'ense dhaibwe bwe dhaaja nga dhiiraganwaku, baali lwenda n'ataanu na mukaaga (956). Abo boonaboona baali bakulu ba nda dha baiseibwe.

Bakabona abaabanga mu Yerusalemu

¹⁰ Bano ni bakabona abaabanga mu Yerusalemu: Yedaia, ni Yehoaribu, ni Yakini,

¹¹ ni Azaria mutabane wa Hilikia era mwidhukulu wa bano: Meshullamu, ni Zadoki, ni Meraiothi, ni Ahitubu eyalabiriranga eisinzizo.

¹² Bakabona abandi baali ni bano: Adaia mutabane wa Yerohamu era mwidhukulu wa bano: Pashuhuri, Malikiya, Maasai, Adieli, Yahuzera, Meshullamu, Meshillemithi, ni Immeri.

¹³ Bakabona abo baali bakulu ba nda dha baiseibwe, era boonaboona aghalala ni baganda baibwe, baali lukumi na lusanvu na nkaaga (1,760). Baali bakugu inho mu kukola emirimo gyonagyona egy'omu isinzizo.

Abalevi abaabanga mu Yerusalemu

¹⁴ Bano n'Abalevi abaabanga mu Yerusalemu: Shemaia mutabane wa Hassihubu, era mwidhukulu wa Azirikamu ni Hashabia abaasimuka mu Merari.

¹⁵ Abalevi abandi baali ni bano: Bakubakkari, Hereshi, Galali, ni Mattania mutabane wa Mika, nga mwidhukulu wa Zikiri, era nga mwidhukulu wa Asafu.

¹⁶ Era ghaabaagho n'Abalevi abandi bano: Obadia mutabane wa Shemaia era mwidhukulu wa Galali ni Yeduthuni ni Berekia mutabane wa Asa era mwidhukulu wa Elukana eyabanga mu byalo by'Abanetofa.

Abakuumi b'eisinzizo abaabanga mu Yerusalemu

¹⁷ Abakuumi b'eisinzizo baali bano: Shallumu, ni Akkubu, ni Talumoni, ni Ahimani, ni baganda baibwe. Shallumu n'eyali omukulu waibwe.

¹⁸ Abo n'abaakuumanga omulyango ogw'e buvandhuba ogwetebwa Omulyango gwa Kyabazinga. Era n'abaakuumanga emiryango mu kifo Abalevi ghe baasimbanga weema dhaibwe.

¹⁹ Shallumu mutabane wa Kore, era mwidhukulu wa Abiasafu eyali mutabane wa Kora, ghalala n'ab'oku nda ye abaasimuka mu dhaadha we Kora, n'abaakolanga ogw'okukuuma emiryango gy'Eweema nga badhaadha baibwe bwe baakuumanga emiryango gy'ekifo ghe baasimbanga Weema ya Musengwa Katonda.

²⁰ Finehasi mutabane wa Eleazari n'eyakuliranga abakuumi abo mu biseera eby'eira, Musengwa Katonda ng'aba ghalala naye.

²¹ Zekaria mutabane wa Meshelemia n'eyali omukuumi w'omulyango ogwingira mu Weema ey'Okwagaananirangamu ni Musengwa Katonda.

²² Abo boonaboona abaalondebwa okuba abakuumi b'emiryango, baali ebikumi bibiri na ikumi na babiri (212). Baabaghandiika mu nkalala edh'obuzaale bwaibwe, nga bajiira ku byalo byaibwe bye baabangamu. Kyabazinga Daudi n'omulanzi Samueli, n'abaataagho abantu abo okukolanga mu butongole.

²³ Kale abantu abo ghalala n'abaana, ni baidhukulu baibwe, baajanga nga bakuuma emiryango gy'eisinzizo.

²⁴ Abakuumi abo baabanga ku ndhuyi dhoonadhoona edh'eisinzizo: e buvandhuba, e bugwandhuba, ku luuyi olw'omukono omugooda olw'e buvandhuba, ni ku luuyi olw'omukono omusaadha olw'e buvandhuba.

²⁵ Aboluganda lwaibwe abaabanga mu byalo, baidhanga baababeeraku mu ngobo okukuuma emiryango, okumala enaku musanvu musanvu.

²⁶ Ku bakuumi ab'emiryango abo kwaliku abaabakuliranga bana nga Balevi, abaalabiriranga ebisenge n'amaterekero eby'oku isinzizo.

²⁷ Baasulanga agho nga beezungulwire eisinzizo, kuba baabagemya omulimo ogw'okulikuuma n'ogw'okuliigulangagho buli nkyo.

Abalevi abandi

²⁸ Abandi ku Balevi baabagemya ogw'okulabiriranga ebintu ebikozesebwa mu kusinza kuba baabibalanga nga babitwala okubikozesa, era baabibalanga nga babiizaayo okubitereka.

²⁹ Abandi baabagemya ogw'okulabiriranga ebintu ebindi ebikozesebwa, n'okulabiriranga obuwunga obuseereibwa obukalamu, n'omwenge ogw'emizabbibu, n'omuzigo ogw'ebibala eby'emiti emyoliva, n'obubbaani, n'obuwoowo.

³⁰ Aye abandi ku bakabona n'abaatabulanga obuwoowo.

³¹ Owundi ku Balevi abo ye baayetanga Mattithia, nga n'omwana omuberi owa Shallumu eyasimuka mu Kora, n'eyakolanga ogw'okufumba emigaati emitono.

³² Abandi ku baganda baibwe ab'oku nda ya Kohathi, n'abaategekanga emigaati egigheebwayo eri Musengwa Katonda, gye baatanga mu maiso ga Musengwa Katonda buli Sabbato.

³³ Abandi ku Balevi baali bembi, era nga n'abakulira enda dha baiseibwe. Baasulanga mu bisenge by'oku isinzizo, era tibaabaghanga mulimo gundi gwonagwona, kuba ogwaibwe ogw'okwemba baagukolanga omusana n'obwire.

³⁴ Abantu abo boonaboona baali bakulu ba nda dha baiseibwe, ng'ense dhaibwe bwe dhairaganwangaku. Baali bakulembeze era nga baba mu Yerusalemu.

Badhaadha ba Saulo ni baidhukulu be

³⁵ Yeiyeli eyatandiikagho ekibuga Gibeoni yabanga yeene eyo e Gibeoni, nga mukazi we ayetebwa Maaka.

³⁶ Yaazaala abaana bano: Abudoni nga n'omuberi, yaizaaku Zura, ni Kishi, ni Baali, ni Neri, ni Nadabu,

³⁷ ni Gedori, ni Ahio, ni Zekaria, ni Mikilothi.

³⁸ Mikilothi oyo n'eyali lata wa Shimea. Abo boona baabanga mu Yerusalemu ghalala ni baganda baibwe, okumpi n'ab'ekika kyaibwe abandi.

³⁹ Neri yazaala Kishi, Kishi yaazaala Saulo, Saulo yaazaala Yonathani, ni Malakishua, ni Abinadabu, ni Eshibaali.

⁴⁰ Yonathani yaazaala Meribbaali, Meribbaali yaazaala Mika.

⁴¹ Mika yaazaala Pithoni, ni Meleki, ni Taharea, ni Ahazi.

⁴² Ahazi yaazaala Yara, Yara yaazaala Alemethi, ni Azimavethi, ni Zimuri. Zimuri yaazaala Moza,

⁴³ Moza yazaala Binea, Binea yaazaala Rafaia, Rafaia yaazaala Eleasa, Eleasa yaazaala Azeli.

⁴⁴ Azeli yaazaala abaana abalenzi mukaaga, era amaina gaibwe ni gano: Azarikamu, ni Bokeru, ni Ishimaeli, ni Shearia, ni Obadia, ni Hanani. Abo n'abaali batabane ba Azeli.