1 Ebyomubyanda 7 - Baibuli Ekibono kya Katonda 2014

Baidhukulu ba Issakari

¹ Issakari yali ni batabane be bana, nga ni bano: Tola, ni Pua, ni Yashubu, ni Shimuroni.

² Tola yaazaala: Uzzi, ni Refaia, ni Yerieli, ni Yahumai, ni Ibusamu, ni Shemueli, baaba nga n'abakulira enda edh'abaasimuka mu Tola oyo. Era baali balwani ba maani inho mu luse lwaibwe. Mu biseera bya kyabazinga Daudi, abantu abaasimuka mu Tola baali emitwalo ebiri n'enkumi ibiri na lukaaga (22,600).

³ Uzzi yaazaala Izarahia. Izarahia oyo yaazaala abaana abalenzi bana, nga ni bano: Mikaeli, ni Obadia, ni Yoeli, ni Issihia, nga n'abakulira enda dha baiseibwe.

⁴ Baabayiza abakazi kamaala era baazaala abaana kamaala, abaasobola okuvaamu eigye ly'abaisirukale emitwalo esatu n'akakaaga (36,000).

⁵ Enkalala edh'obuzaale bw'abantu ab'oku nda edhaasimuka mu kika kya Issakari, dhiraga nga baalimu abalwani ab'amaani emitwalo munaana na kasanvu (87,000).

Baidhukulu ba Benjamini ni Dani

⁶ Benjamini yazaala abaana abalenzi basatu, nga ni bano: Bela, ni Bekeri, ni Yediaeli.

⁷ Bela yaazaala abaana abalenzi bataanu: Eziboni, ni Uzzi, ni Uzzieli, ni Yerimothi, ni Iri. Boonaboona baali bakulu ba nda dha baiseibwe era nga balwani ba maani. Enkalala edh'obuzaale bw'abantu ab'oku nda dha baiseibwe, dhiraga nga baalimu abalwani ab'amaani emitwalo ebiri n'enkumi ibiri n'asatu na bana (22,034).

⁸ Bekeri yaazaala: Zemira, ni Yoashi, ni Eliezeri, ni Elioenai, ni Omuri, ni Yeremothi, ni Abiya, ni Anathothi, ni Alemethi. Abo boonaboona baali baana ba Bekeri.

⁹ Era enkalala edh'obuzaale bw'abantu ab'oku nda dha baiseibwe, dhiraga nga baalimu abalwani ab'amaani emitwalo ebiri n'ebikumi bibiri (20,200).

¹⁰ Yediaeli yaazaala Bilihani. Bilihani oyo yaazaala: Yeushi, ni Benjamini, ni Ehudi, ni Kenaana, ni Zethani, ni Tarushishi, ni Ahishahari.

¹¹ Abo boonaboona baali baana ba Yediaeli, nga bakulu ba nda dha baiseibwe. Era mu bantu abaasimuka mu nda edho, mwalimu abalwani ab'amaani omutwalo mulala na kasanvu na bibiri (17,200).

¹² Iri yaazaala Shuppimu ni Huppimu, ate Aheri yaazaala Hushimu.

Baidhukulu ba Nafutali

¹³ Nafutali yazaala Yahazieli, ni Guni, ni Yezeri, ni Shallumu abo nga baidhukulu ba Biliha.

Baidhukulu ba Manasse

¹⁴ Manasse yali n'omukazi Omuaramea, ye yazaala naye abaana bano: Asirieli, ni Makiri eyasimukamu Abagileadi.

¹⁵ Makiri yaafunira Huppimu omukazi era yaafunira ni Shuppimu yeena omukazi, eriina lya mwanhina nga ni Maaka. Ate omwana owokubiri omulenzi owa Makiri oyo nga ni Zelofehadi. Zelofehadi oyo yazaala baana baghala beereere.

¹⁶ Maaka muka Makiri, yaazaala omwana omulenzi yaamutuuma eriina Pereshi. Era yaazaala omulenzi owundi muganda w'oyo, yaamutuuma eriina Shereshi. Pereshi yaazaala Ulamu ni Rakemu.

¹⁷ Ulamu yaazaala Bedani. Abo ni baidhukulu ba Gileadi mutabane wa Makiri, ate Makiri oyo nga mutabane wa Manasse.

¹⁸ Gileadi yaliku mwanhina nga ni Hammolekethi, eyazaala Ishihodi, ni Abiezeri, ni Mahala.

¹⁹ Shemida yaazaala Ahiani, ni Shekemu, ni Likihi, ni Aniamu.

Baidhukulu ba Efuraimu

²⁰ Efuraimu yazaala Shuthela, Shuthela yaazaala Beredi, Beredi yaazaala Tahathi, Tahathi yaazaala Eleada, Eleada yaazaala Tahathi, Tahathi

²¹ yaazaala Zabadi, Zabadi yaazaala Shuthela. Efuraimu era yaliku batabane be abandi babiri, Ezeri ni Eleadi, abantu Abagathi abazaale b'omu nsi eyo be baita nga bajiire okubanhagaku ebyayo byaibwe.

²² Iseibwe Efuraimu yaabalira okumala enaku kamaala, baganda be baidha okumugumya.

²³ Agho Efuraimu oyo yaaba ni mukazi we mu buliri, omukazi oyo yaatoola enda, yaazaala omwana mulenzi. Efuraimu yaamutuuma eriina Beria, kuba akabi kaagwira amaka ge.

²⁴ Efuraimu yaliku omwana omughala nga ni Sheera, eyazimba ebibuga Bethi Horoni byombi, eky'Eifo n'eky'Eitale, era yaazimba ni Uzzeni Sheera.

²⁵ Efuraimu yaliku mutabane we owundi nga ni Refa. Refa oyo yaazaala Reshefu, Reshefu yaazaala Tela, Tela yaazaala Tahani, Tahani yaazaala

²⁶ Ladani, Ladani yaazaala Ammihudi, Ammihudi yaazaala Elishama, Elishama yaazaala

²⁷ Nuni, Nuni yaazaala Yoshua.

²⁸ Obutaka bwaibwe bwali Betheli n'ebibuga ebikyezungulwire, bwaja okutuukira irala e Naarani mu buvandhuba, n'e Gezeri mu bugwandhuba n'ebibuga ebikyezungulwire. Era bwatwalizaamu ebibuga Shekemu ni Ayya n'ebibuga ebibyezungulwire.

²⁹ Baidhukulu ba Manasse baali mu Bethi Sheani n'ebibuga ebikyezungulwire, ni mu Taanaki n'ebibuga ebikyezungulwire, ni mu Megiddo n'ebibuga ebikyezungulwire, ni mu Dori n'ebibuga ebikyezungulwire. Ebifo ebyo byonabyona, n'ebyasengamu baidhukulu ba Yosefu mutabane wa Isiraeli.

Baidhukulu ba Ashera

³⁰ Ashera yazaala abaana abalenzi bano: Imuna, ni Ishiva, ni Ishivi, ni Beria. Era yaazaala n'omwana omughala, nga ni Sera.

³¹ Beria yaazaala Heberi, ni Malakieli eyali lata wa Birizaithi.

³² Heberi yazaala abaana abalenzi bano: Yafuleti, ni Shomeri, ni Hothamu. Era yaazaala n'omwana omughala nga ni Shua.

³³ Yafuleti yaazaala Pasaki, ni Bimuhali, ni Ashuvati.

³⁴ Muganda we Shomeri yaazaala Rohuga, ni Yehubba, ni Aramu.

³⁵ Ate muganda we Helemu yaazaala Zofa, ni Imuna, ni Sheleshi, ni Amali.

³⁶ Zofa yaazaala Sua, ni Harineferi, ni Shuali, ni Beri, ni Imura,

³⁷ ni Bezeri, ni Hodi, ni Shamma, ni Shalisha, ni Ithurani, ni Beera.

³⁸ Yetheri yaazaala Yefunne, ni Pisipa, ni Ara.

³⁹ Ate Ulla yaazaala Ara, ni Hannieli, ni Rizia.

⁴⁰ Abo boonaboona baali baidhukulu ba Ashera, nga bakulu ba nda dha baiseibwe abamanhiibwa einho, era nga balwani ba maani. Enkalala edh'obuzaale bw'abantu ab'oku nda dha baiseibwe dhiraga nga baalimu abalwani ab'amaani emitwalo ebiri na kakaaga (26,000).