1 Ebyomubyanda 29 - Baibuli Ekibono kya Katonda 2014

Ebirabo abantu bye baaghaayo olw'okuzimba eisinzizo

¹ Agho kyabazinga Daudi yaakoba abaali beesoloiza ati: “Mutabane wange Solomoni Katonda y'alonzeemu akaali mwana muto, ate nga omulimo oguli n'okukolebwa mukologho inho kuba kino ti kisaagaati kya bwakyabazinga bwa bantu buntu, aye isinzizo lya Musengwa Katonda.

² Kale kye nviire ni nfuba nga bwe nsoboire, ni ntaagho ebintu byonabyona eby'okuzimbisa eisinzizo lya Katonda wange, bino: zaabu ow'okukolamu ebintu ebya zaabu, ni feeza ow'okukolamu ebintu ebya feeza, n'ekyuma eky'ekikomo eky'okukolamu ebintu eby'ekyuma eky'ekikomo, n'ekyuma ekigumu einho eky'okukolamu ebintu eby'ekyuma ekigumu einho, n'emiti egy'okukolamu ebintu eby'emiti, n'amabaale ag'omughendo ageetebwa onikisi, n'agandi ag'okuzimbisa, n'ag'okudholigadholiga, n'agandi ag'omughendo agamirimiinha ag'ensambo kamaala.

³ Era nhongereiza ku ebyo bye nteereiregho eisinzizo, naaghaayo zaabu ni feeza nga ntoola ku by'obukombe ebyange ku bwange, olw'okuba ngonza inho eisinzizo lya Katonda wange eryo.

⁴ Mpaireyo talanta enkumi isatu (3,000) edha zaabu omukenenule ow'e Ofiri, naaghaayo ni talanta kasanvu (7,000) edha feeza nga yeena mukenenule, ow'okulimbya ku bimante by'eisinzizo,

⁵ n'okukolamu ebintu byonabyona ebya zaabu n'ebya feeza, abagheesi bye balikola. Kale ni olwaleero luno, naani owundi omwetegefu okwevaamu ekyeyendere, okubaaku by'aghaayo bibe ebya Musengwa Katonda?”

⁶ Agho abakulu b'enda dha baiseibwe, n'abakulu b'ebika, n'abaduumizi b'abaisirukale olukumi olukumi n'ab'ekikumi ekikumi, n'abo abaalabiriranga emirimo gya kyabazinga, baaghaayo ebigheebwayo eby'ekyeyendere,

⁷ Edho ni kilo ng'oti kinaana na itaanu (85), kuba “dariki” olw'omulimo gw'eisinzizo: talanta enkumi itaanu (5,000) edha zaabu, n'ebidhegedhege ebya zaabu ebyetebwa dariki omutwalo mulala (10,000), n'ebindi ebya feeza omutwalo mulala (10,000) ni talanta omutwalo mulala na kanaana (18,000) edh'ekyuma eky'ekikomo ni talanta emitwalo ikumi (100,000) edh'ekyuma ekigumu einho.

⁸ Abo abaali n'amabaale ag'omughendo, baagaghaayo mu iterekero ly'eisinzizo eryali lirabirirwa Yehieli eyasimuka mu Gereshoni.

⁹ Agho abantu baasagamba olw'abo abaaghaayo ku byaibwe eri Musengwa Katonda n'omwoyo omulala ekyeyendere. Kyabazinga Daudi yeena yaasagamba inho.

Kyabazinga Daudi asaaka Katonda

¹⁰ Agho kyabazinga Daudi yaasaaka Musengwa Katonda ng'abantu boonaboona abeesoloiza bali agho. Yaakoba ati: “Wo Musengwa Katonda wa dhaadha waife Isiraeli, ogwaine osaakibwenga ebyanda n'ebyanda.

¹¹ Wo Musengwa Katonda, niiwe omukologho, ow'obuyinza, ow'ekitiisa, omughanguzi era omufuzi kuba byonabyona ebiri mu igulu n'ebiri mu nsi, bibyo iwe Musengwa Katonda. Niiwe kyabazinga ali ghaigulu gh'ebintu byonabyona.

¹² Niiwe ogaba obukombe n'ekitiibwa. Niiwe ow'amaani n'obuyinza, afuga ebintu byonabyona, era aleetera abantu okuba abakologho, era ab'amaani.

¹³ Agho ni Katonda waife, ife tukusiima era twasaaka eriina lyo ery'ekitiisa.

¹⁴ “Aye nze n'abantu bange katyo niife baani, twena okukoba tuti tughanga okukugha iwe ekintu kyonakyona nga twenda? Byonabyona niiwe obitugha, era ku bibyo by'otugha kwe tutoire okukutonera.

¹⁵ Wo Musengwa Katonda, okiidhi bukalamu nga ku nsi kuno ife tuli ng'abatamanhiibwa y'oli, tuli basenze busenze abali mu lugendo, nga badhaadha baife boonaboona bwe baali. Enaku dhaife edh'oku nsi dhibitagho bubite ng'oti kinsense, tidhiraalagho naire.

¹⁶ Wo Musengwa Katonda waife, ebintu bino byonabyona bye tutairegho okuzimbisa eisinzizo erinaagheesanga eriina lyo eitukuvu ekitiisa, niiwe owabitugha era byonabyona bibyo.

¹⁷ Era ndidhi nga iwe Katonda wange oleba omwoyo gw'omuntu, waasangaalira omwesimbu. Zeena ni mpaireyo ebintu bino byonabyona kyeyendere n'omwoyo omwesimbu. Era mperaano mboine abantu bo abali ghano nga baleeta y'oli ebigheebwayo ekyeyendere era nga basangaavu.

¹⁸ Wo Musengwa Katonda wa badhaadha baife, Aburahamu, Isaaka, ni Isiraeli, kuumanga buliidho enkola ey'okwevaamu eri ng'oti n'eyo mu bantu bo, era okuumenga emyoyo gyaibwe nga gigumiire ku iwe.

¹⁹ Nkweghemba oghe mutabane wange Solomoni omwoyo ogw'okwegheerayo irala okugema amateeka go ni by'olagira byonabyona, n'okuzimba eisinzizo, lye nteereiregho ebintu ebyo.”

²⁰ Agho Daudi yaakoba abantu boonaboona abaali beesoloiza ati: “Musaake Musengwa Katonda, oyo Katonda waimwe.” Kale abantu boonaboona abaali beesoloiza baasaaka Musengwa Katonda, Katonda wa badhaadha baibwe. Baakuba amakiryaivu era baakutama n'ebyeni byatuuka ku itaka, baasinza Musengwa Katonda era baagha ni kyabazinga ekitiibwa.

²¹ Baaghaayo emisengo eri Musengwa Katonda, era ku lunaku olwairirira baaghaayo emisengo egyokebwa gyonagyona okuwaagho: ente enume lukumi (1,000), n'entaama enume lukumi (1,000), n'entaama ento lukumi (1,000), n'ebigheebwayo eby'okunhwa ebijiiraku, n'emisengo egindi kamaala, gye baaghaayo ku lwa Isiraeli yoonayoona.

²² Ku lunaku olwo baaliira era baanhwera mu maiso ga Musengwa Katonda, nga basagamba ebitaloodheka. Agho bairamu okulangirira Solomoni mutabane wa Daudi okuba kyabazinga, baamusiiga omuzigo abafugenga mu liina lya Musengwa Katonda, ni Zadoki abenga kabona.

²³ Kale Solomoni yaatyama ku kityamo eky'obwakyabazinga Musengwa Katonda kye yataagho, yaaba kyabazinga mu kifo kya lata we Daudi. Ebintu byajiiranga Solomoni oyo bukalamu, era eighanga Isiraeli lyamugonderanga.

²⁴ Abakungu boonaboona, n'abaisirukale, ni batabane ba kyabazinga Daudi abandi boonaboona, beeyama okugonderanga kyabazinga Solomoni.

²⁵ Musengwa Katonda yaaleetera Isiraeli yoonayoona okugha Solomoni ekitiibwa eky'obwakyabazinga, ekitabangaghooku ku kyabazinga wundi yeenayeena eyaali afuzeeku mu Isiraeli.

Ebigema ku bufuzi bwa kyabazinga Daudi ebitonotono

²⁶ Daudi mutabane wa Yesse yafuga Isiraeli yoonayoona

²⁷ okumala entangama ya myaka amakumi ana (40). Yafugira mu Heburoni emyaka musanvu, ni mu Yerusalemu emyaka amakumi asatu n'esatu.

²⁸ Yaafa ng'aghangaire inho, nga mukaire mwenemwene, nga mukombe, era nga wa kitiibwa. Mutabane we Solomoni yaamusikira ku bwakyabazinga.

²⁹ Byonabyona kyabazinga Daudi bye yakola, okuviira irala ku kyasooka okutuukira irala ku kyasembayo, biri mu bighandiiko by'abalanzi, Samueli, ni Nathani, ni Gadi.

³⁰ Ebighandiiko ebyo byogera ku bufuzi bwe nga bwe bwali, n'amaani ge yali nago, n'ebintu byonabyona ebyamutuukaku n'ebyatuuka ku Isiraeli, ni ku bwakyabazinga bwonabwona obw'ensi edhiriiraine agho.