1 Ebyomubyanda 27 - Baibuli Ekibono kya Katonda 2014

Ensambo Daudi ye yatereezaamu amagye n'obufuzi

¹ Luno n'olukalala lw'abakulu b'enda dha baiseibwe, n'abaduumizi b'abaisirukale olukumi olukumi n'ekikumi ekikumi, n'abakungu abaagheerezanga kyabazinga mu bukulembeze mu Isiraeli. Buli mwezi, okumalaku omwaka gwonagwona, ghaabangagho ekikunsu ky'abantu emitwalo ebiri n'enkumi ina (24,000) ekyabanga mu lugobo olw'okugheereza okwo, nga kiriku akikulira:

² Yashobeamu mutabane wa Zabadieli n'eyakuliranga ekikunsu eky'omu lugobo olw'omu mwezi ogusooka, olwalimu abantu emitwalo ebiri n'enkumi eina (24,000).

³ Yashobeamu oyo yali asimuka mu Perezi, era nga n'akulira abaduumizi boonaboona ab'eigye eryalinga mu lugobo olw'omwezi ogusooka.

⁴ Dodai mwidhukulu wa Ahohi n'eyakuliranga ekikunsu eky'omu lugobo olw'omu mwezi ogwokubiri, lwona nga lwalimu abantu emitwalo ebiri n'enkumi ina (24,000).

⁵ Benaia mutabane wa Yehoiada kabona n'eyakuliranga ekikunsu eky'omu lugobo olw'omu mwezi ogwokusatu, lwona nga lwalimu abantu emitwalo ebiri n'enkumi ina (24,000).

⁶ Oyo nga ni Benaia eyali omulwani ow'amaani, owundi ku bale “Amakumi Asatu” era nga n'eyali omukulu waibwe. Ni mutabane we Ammizabadi yali mukulu mu lugobo lwe.

⁷ Asaheli muganda wa Yoabu n'eyakuliranga ekikunsu eky'omu lugobo olw'omu mwezi ogwokuna, lwona nga lwalimu abantu emitwalo ebiri n'enkumi ina (24,000). Mutabane we Zebadia n'eyamusikira.

⁸ Shamahuthi mwidhukulu wa Izahara n'eyakuliranga ekikunsu eky'omu lugobo olw'omu mwezi ogwokutaanu, lwona nga lwalimu abantu emitwalo ebiri n'enkumi ina (24,000).

⁹ Ira mutabane wa Ikkeshi ow'e Tekoa n'eyakuliranga ekikunsu eky'omu lugobo olw'omu mwezi ogwomukaaga, lwona nga lwalimu abantu emitwalo ebiri n'enkumi ina (24,000).

¹⁰ Helezi Omuefuraimu ow'e Peloni n'eyakuliranga ekikunsu eky'omu lugobo olw'omu mwezi ogwomusanvu, lwona nga lwalimu abantu emitwalo ebiri n'enkumi ina (24,000).

¹¹ Sibbekai ow'e Husha, asimuka mu Zera, n'eyakuliranga ekikunsu eky'omu lugobo olw'omu mwezi ogwomunaana, lwona nga lwalimu abantu emitwalo ebiri n'enkumi ina (24,000).

¹² Abiezeri Omubenjamini ow'e Anathothi n'eyakuliranga ekikunsu eky'omu lugobo olw'omu mwezi ogwomwenda, lwona nga lwalimu abantu emitwalo ebiri n'enkumi ina (24,000).

¹³ Maharai ow'e Netofa, asimuka mu Zera, n'eyakuliranga ekikunsu eky'omu lugobo olw'omu mwezi ogweikumi, lwona nga lwalimu abantu emitwalo ebiri n'enkumi ina (24,000).

¹⁴ Benaia ow'e Pirathoni, asimuka mu Efuraimu, n'eyakuliranga ekikunsu eky'omu lugobo olw'omu mwezi ogweikumi n'omulala, lwona nga lwalimu abantu emitwalo ebiri n'enkumi ina (24,000).

¹⁵ Heledai ow'e Netofa, asimuka mu Othinieli, n'eyakuliranga ekikunsu eky'omu lugobo olw'omu mwezi ogweikumi n'ebiri, lwona nga lwalimu abantu emitwalo ebiri n'enkumi ina (24,000).

Abaakuliranga ebika bya Isiraeli

¹⁶ Luno n'olukalala olw'abaakuliranga ebika bya Isiraeli: Eliezeri mutabane wa Zikuri n'eyakuliranga ekika ekya Reubeni Sefatia mutabane wa Maaka yaakulira ekya Simeoni

¹⁷ Hashabia mutabane wa Kemeuli yaakulira ekya Levi Zadoki yaakulira eky'abaasimuka mu Aaroni

¹⁸ Elihu, owundi ku baganda ba kyabazinga Daudi, yaakulira ekya Yuda Omuri mutabane wa Mikaeli yaakulira ekya Issakari

¹⁹ Ishimaia mutabane wa Obadia yaakulira ekya Zebuluni Yeremothi mutabane wa Azarieli yaakulira ekya Nafutali

²⁰ Hoshea mutabane wa Azazia yaakulira ekya Efuraimu Yoeli mutabane wa Pedaia yaakulira ekitundu ku kika ekya Manasse eky'e bugwandhuba

²¹ Iddo mutabane wa Zekaria yaakulira ekitundu ku kika ekya Manasse eky'e buvandhuba mu Gileadi Yaasieli mutabane wa Abuneri yaakulira ekya Benjamini

²² ate Azareli mutabane wa Yerohamu yaakulira ekya Dani. Abo n'abaali abakulu b'ebika bya Isiraeli.

²³ Kyabazinga Daudi tiyabala bantu abakaali okutuusa emyaka amakumi abiri egy'obukulu, kuba Musengwa Katonda yali amaze okusuubiza ng'aja kuleetera Abaisiraeli babe kamaala inho ng'oti n'emuunienie edh'oku igulu.

²⁴ Yoabu mutabane w'omukazi eyayetebwanga Zeruia, yatoolera okubala abantu, aye yaaloba kusobola kumaliriza. Okubala okwo kwaleetera Musengwa Katonda okusungughalira Isiraeli, era omughendo gwe baabala tibaagughandiika mu kitabo eky'Ebyomubyanda bya kyabazinga Daudi.

Abaalabiriranga ebintu eby'obwakyabazinga

²⁵ Azimavethi mutabane wa Adieli n'eyalabiriranga amaterekero ga kyabazinga ate Yonathani mutabane wa Uzzia yaalabiriranga amaterekero agandi agaabanga mu biketezo, ni mu bibuga, ni mu byalo, ni mu bisenge ebigumu.

²⁶ Eziri mutabane wa Kelubi n'eyakuliranga abaakolanga ogw'okulima mu nimiro

²⁷ Shimei ow'e Rama yaakuliranga amasamba g'emizabbibu ate Zabadi ow'e Shifamu yaalabiriranga emizabbibu gye baanoganga mu masamba, okugita mu bikunhiro by'omwenge.

²⁸ Baalihanani ow'e Gederi n'eyalabiriranga emiti emyoliva n'emisikamore mu biketezo eby'omu biiko ate Yoashi yaakuliranga amaterekero ge baatangamu omuzigo ogw'ebibala eby'emiti emyoliva

²⁹ Shiturai ow'e Sharoni n'eyalabiriranga ente dhe baayayiranga mu Sharoni ate Shafati mutabane wa Adulai yaalabiriranga ente edhaabanga mu biiko.

³⁰ Obili Omuishimaeli n'eyalabiriranga engamiya Yehedeia ow'e Meronothi yaalabiriranga endogoyi

³¹ ate Yazizi Omuhagari yaalabiriranga entaama n'embuzi. Abo boonaboona n'abaalabiriranga ebintu bya kyabazinga Daudi.

Abaaghanga Daudi amagezi

³² Yonathani, muganda wa lata wa Daudi, yali muwi wa magezi, nga musaadha mutegeevu era nga mumanhi inho mu by'amateeka. Yonathani oyo ni Yehieli mutabane wa Hakimoni, n'abaalabiriranga batabane ba kyabazinga.

³³ Ahithofeli yali muwi wa magezi wa kyabazinga, ate Hushai Omuaraki yaaba mukagwa wa kyabazinga.

³⁴ Ahithofeli bwe yavaagho, Abiathari ni Yehoiada mutabane wa Benaia baira mu kifo kye. Yoabu n'eyali omuduumizi w'eigye lya kyabazinga.