1 Ebyomubyanda 26 - Baibuli Ekibono kya Katonda 2014

Abalevi abaakuumanga eisinzizo

¹ Bano n'abaali abakuumi b'emiryango gy'eisinzizo: Mu bantu abaasimuka mu Kora, mwalimu Meshelemia mutabane wa Kore ow'oku nda ya Asafu.

² Meshelemia oyo yazaala abaana abalenzi bano: Zekaria nga n'omuberi, kwairaku Yediaeli, kwairaku Zebadia, kwairaku Yathinieli,

³ kwairaku Elamu, kwairaku Yehohanani, memale kwairaku Eliehoenai.

⁴ Ghaabaagho ni Obededomu, Katonda ye yagha enkabi n'azaala abaana abalenzi bano: Shemaia nga n'omuberi, kwairaku Yehozabadi, kwairaku Yoa, kwairaku Sakari, kwairaku Nethaneli,

⁵ kwairaku Ammieli, kwairaku Issakari, memale kwairaku Peullethai.

⁶ Shemaia mutabane wa Obededomu oyo, yeena yaazaala abaana abalenzi abaali abafuzi b'abantu ab'oku nda dha baiseibwe.

⁷ Batabane ba Shemaia abo ni bano: Othini, Refaeli, Obedi, Elizabadi, ni baganda baibwe abaali abakugu mu kukola emirimo, Elihu ni Semakia.

⁸ Abo boonaboona baali nga basimuka mu Obededomu, ghalala ni batabane baibwe, ni baganda baibwe. Baali ba maani, nga bakugu mu kukola emirimo era nga boonaboona aghalala bali nkaaga na babiri.

⁹ Mu ndhu ya Meshelemia mwavaamu batabane be ni baganda be, abakugu mu kukola emirimo, nga baghera ikumi na munaana.

¹⁰ Mu Balevi abaasimuka mu Merari, mwalimu Hosa eyazaala abaana abalenzi bano: Shimuri, ise ye yafuula omukulu waire nga ti n'eyali omwana omuberi.

¹¹ Kwairaku Hilikia, kwairaku Tebalia, memale kwairaku Zekaria. Batabane ba Hosa oyo boonaboona aghalala ni baganda be, baali baghera abantu ikumi na basatu.

¹² Abakuumi b'emiryango baabagaba mu bikunsu bikunsu, baabata mu ngobo edh'okugheereza mu isinzizo lya Musengwa Katonda nga bajiira ku bakulu b'enda dha baiseibwe, ng'oti bwe kyalinga ku Balevi banaibwe abandi.

¹³ Buli nda, k'ebe nga yalimu abantu kamaala oba batono, baagikubiranga kalulu okubona omulyango gwe banaakuuma.

¹⁴ Akalulu ak'okukuumanga omulyango ogw'e buvandhuba, kaagwa ku Shelemia. Ate ak'okukuumanga omulyango ogw'oku luuyi olw'omukono omugooda olw'e buvandhuba, kaagwa ku mutabane we Zekaria, eyalinga omuwi w'amagezi omulungi.

¹⁵ Obededomu yaalondebwa okukuumanga omulyango ogw'oku luuyi olw'omukono omusaadha lw'e buvandhuba. Ate batabane be baalondebwa okukuumanga eiterekero.

¹⁶ Shuppimu ni Hosa baalondebwa okukuumanga omulyango ogw'oku luuyi olw'e bugwandhuba, era n'omulyango ogwetebwa Shallekethi oguli ku luguudo oluniinaniina eitale. Bombi abo baakuumanga mu ngobo.

¹⁷ Ku luuyi olw'e buvandhuba kwalingaku abakuumi mukaaga buli lunaku ku lw'omukono omugooda olw'e buvandhuba kwabangaku bana ni ku lw'omukono omusaadha olw'e buvandhuba kwona kwabangaku bana, buli lunaku. Eiterekero lyakuumibwanga abantu babiri babiri buli lunaku.

¹⁸ Ate okuliiraana n'olukuubo olw'e bugwandhuba, ghaaligho abakuumi bana abaakuumanga ku luguudo, n'abandi babiri abaakuumanga olukuubo lwene.

¹⁹ Ebyo n'ebikunsu bye baagabamu abakuumi b'emiryango, abaasimuka mu Kora ni mu Merari.

Emirimo egindi egy'omu isinzizo lya Musengwa Katonda

²⁰ Abalevi abandi, nga n'omuli ni Ahiya, n'abaakuliranga eiterekero ly'eisinzizo n'amaterekero g'ebintu ebigheereibwayo okuba ebya Musengwa Katonda.

²¹ Ladani, eyali owundi ku baana ba Gereshoni, yasimukamu enda kamaala, nga n'omuli n'eya Yehieli mutabane we.

²² Batabane ba Yehieli oyo, bano: Zethamu ni muganda we Yoeli, n'abaakuliranga amaterekero g'eisinzizo.

²³ Mu Balevi abaasimuka mu Amuramu, ni Izahara, ni Heburoni, ni Uzzieli,

²⁴ mwalimu Shebueli ow'oku lulyo lwa Gereshomu mutabane wa Musa, nga n'akulira amaterekero.

²⁵ Shebueli oyo yali n'oluganda ku bantu abaasimuka mu Eliezeri muganda wa Gereshomu. Eliezeri oyo n'eyazaala Rehabia, Rehabia yaazaala Yeshaia, Yeshaia yaazaala Yoramu, Yoramu yaazaala Zikuri, Zikuri yaazaala Shelomothi.

²⁶ Shelomothi oyo ni baganda be, n'abaakuliranga amaterekero omwateebwanga ebintu byonabyona ebigheereibwayo okuba ebya Katonda nga bigheebwayo bano: kyabazinga, n'abaakuliranga enda dha baiseibwe, n'abaakuliranga ebikunsu by'abaisirukale olukumi olukumi n'ekikumi ekikumi, era n'abaduumizi mu magye.

²⁷ Ku munhago gwe baanhaganga mu ntalo, baatoolangaku ebintu ebindi baabighaayo ng'ebirabo, ebyakozesebwanga mu kulabirira eisinzizo lya Musengwa Katonda.

²⁸ Shelomothi oyo ni baganda be, n'abaakuumanga ebintu byonabyona kiisi muntu bye yaghangayo okuba ebya Musengwa Katonda; nga n'omwali n'ebyo Samueli omulanzi, ni kyabazinga Saulo mutabane wa Kishi, ni Abuneri mutabane wa Neri, ni Yoabu mutabane wa Zeruia, bye baaghaayo.

Emirimo egy'Abalevi abandi

²⁹ Mu Balevi abaasimuka mu Izahara, mwalimu Kenania ni batabane be, abaagheebwa omulimo ogutali gwa mu isinzizo nga gwa kukulira banaibwe na kubalamula.

³⁰ Mu Balevi abaasimuka mu Heburoni, mwalimu Hashabia n'aboluganda lwe ab'amaani, nga baghera lukumi na lusanvu (1,700). Abo baagheebwa omulimo ogw'okulabiriranga Isiraeli mu by'okusinza Musengwa Katonda ni mu kugheereza kyabazinga, mu kiketezo eky'oku luuyi lw'e bugwandhuba bw'omwiga Yorudani.

³¹ Yeriya n'eyali omukulembeze wa Abalevi boonaboona abaasimuka mu Heburoni, nga bwe baabaghandiika nga bajiira ku nkalala edh'obuzaale bwaibwe oba ku nda dha baiseibwe. Mu mwaka ogwamakumi ana (40) nga Daudi ni kyabazinga, ghaaligho okunoonenkereza okwakolebwa ku Balevi abo abaasimuka mu Heburoni. Kyazuulibwa nga ghaaligho abalwani ab'amaani ab'oku lulyo lwaibwe abaali e Yazeri mu kiketezo ky'e Gileadi.

³² Agho Daudi yaalonda Yeriya oyo n'Abalevi abo abaamuliku oluganda, abasaadha abaali ab'amaani era abakulu b'enda dha baiseibwe, nga baghera enkumi ibiri na lusanvu (2,700). Yaabataagho okulabiriranga Abareubeni, n'Abagadi, n'ekitundu ku Bamanasse, mu by'okusinza Katonda n'okugheereza kyabazinga.