1 Ebyomubyanda 24 - Baibuli Ekibono kya Katonda 2014

Emirimo gye baagha bakabona

¹ Ab'oku lulyo lwa Aaroni baabagabamu bati: Aaroni yazaala Nadabu, Abihu, Eleazari, ni Ithamari.

² Aye Nadabu ni Abihu baasooka iseibwe okufa ate nga tibazaireeku mwana naire. Kale Eleazari ni Ithamari baafuuka bakabona.

³ Kyabazinga Daudi yagabamu bakabona mu bikunsu ng'ajiira ku mirimo gye baali baja okukolanga. Ekyo yakikola ng'ayambibwaku Zadoki mwidhukulu wa Eleazari, ni Ahimeleki mwidhukulu wa Ithamari.

⁴ Mu bantu abaasimuka mu Eleazari mwalimu abakulu b'enda kamaala okusingaku abo abaali mu bantu abaasimuka mu Ithamari. Kale abo abaasimuka mu Eleazari baabagabamu mu bikunsu bya nda ikumi na mukaaga, ate abaasimuka mu Ithamari baabagabamu mu bikunsu bya nda munaana.

⁵ Aye mu bantu ab'omu bikunsu ebyo byombi, eky'abaasimuka mu Eleazari n'eky'abaasimuka mu Ithamari, mwalimu abakulira eisinzizo n'abakulira eby'okusinza. Kale kyaba nti emirimo gyonagyona baagigaba nga bakuba bwa kalulu.

⁶ Abaasimuka mu Eleazari n'abaasimuka mu Ithamari baakuba akalulu nga baja mu ngobo. Shemaia owundi ku Balevi, eyali mutabane wa Nethaneli era nga mughandiisi, yaabaghandiika mu nkalala nga bano boonaboona babona: Kyabazinga mwene, n'abakungu, ni Zadoki kabona, ni Ahimeleki mutabane wa Abiathari, n'abakulu b'enda dha bakabona n'edha Balevi.

⁷ Agho akalulu akaasooka (1) kaagwa ku Yehoaribu, akokubiri (2) kaagwa ku Yedaia,

⁸ akokusatu (3) kaagwa ku Harimu, akokuna (4) kaagwa ku Seorimu,

⁹ akokutaanu (5) kaagwa ku Malikiya, akomukaaga (6) kaagwa ku Miyamini,

¹⁰ akomusanvu (7) kaagwa ku Hakkozi, akomunaana (8) kaagwa ku Abiya,

¹¹ akomwenda (9) kaagwa ku Yeshua, akeikumi (10) kaagwa ku Shekania,

¹² akeikumi n'akalala (11) kaagwa ku Eliashibu, akeikumi n'obubiri (12) kaagwa ku Yakimu,

¹³ akeikumi n'obusatu (13) kaagwa ku Huppa, akeikumi n'obuna (14) kaagwa ku Yeshebeabu,

¹⁴ akeikumi n'obutaanu (15) kaagwa ku Biliga, akeikumi n'omukaaga (16) kaagwa ku Immeri,

¹⁵ akeikumi n'omusanvu (17) kaagwa ku Heziri, akeikumi n'omunaana (18) kaagwa ku Happizzezi,

¹⁶ akeikumi n'omwenda (19) kaagwa ku Pethahia, akamakumi abiri (20) kaagwa ku Yehezikeli,

¹⁷ akamakumi abiri n'akalala (21) kaagwa ku Yakini, akamakumi abiri n'obubiri (22) kaagwa ku Gamuli,

¹⁸ akamakumi abiri n'obusatu (23) kaagwa ku Delaia, ate akamakumi abiri n'obuna (24) kaagwa ku Maazia.

¹⁹ Eyo n'engeri ye baabaghaamu omulimo ogw'okujanga mu isinzizo lya Musengwa Katonda, bakolenga omulimo ogw'okugheereza, dhaadha waibwe Aaroni gwe yabateeragho ng'ajiira ku kiragiro kya Musengwa Katonda.

Olukalala lw'Abalevi

²⁰ Bano n'abakulu b'enda abandi abaasimuka mu Levi: Yehedeia eyasimuka mu Shubaeli, ate nga Shubaeli oyo yasimuka mu Amuramu.

²¹ Issihia eyasimuka mu Rehabia,

²² Yahathi eyasimuka mu Shelomithi, ate nga Shelomithi oyo yasimuka mu Izahara,

²³ batabane ba Heburoni bano: Yeria nga n'omukulu, kwairaku Amaria, kwairaku Yahazi, ate ku oyo kwairaku Yekameamu,

²⁴ Shamiri eyasimuka mu Mika, ate nga Mika oyo yasimuka mu Uzzieli,

²⁵ Zekaria muganda wa Mika, nga yasimuka mu Issihia eyasimuka mu Uzzieli,

²⁶ Mahuli, Mushi, ni Yaazia, abaasimuka mu Merari.

²⁷ Yaazia oyo yazaala abaana bano: Beno, Shohamu, Zakkuri, ni Ibiri.

²⁸ Eleazari ataazaalaku mwana mulenzi, yasimuka mu Mahuli.

²⁹ Aye Kishi, nga yeena mutabane wa Mahuli, yazaala omwana omulenzi, nga ni Yerahameeli.

³⁰ Ate Mushi yaazaala abaana bano: Mahuli, Ederi, ni Yeremothi. Abo n'abaasimuka mu Levi ng'enda dha baiseibwe bwe dhaali.

³¹ Era abo baakola nga Balevi banaibwe abaasimuka mu Aaroni bwe baakola eira, nga kiisi mukulu wa nda ni muganda we omuto bakuba akalulu. Ekyo baakikola mu maiso ga kyabazinga Daudi, nga Zadoki ni Ahimeleki boona baligho, ghalala n'abakulu b'enda dha bakabona n'edha Balevi.