1 Ebyomubyanda 23 - Baibuli Ekibono kya Katonda 2014

¹ Daudi bwe yakairigha einho, yaafuula mutabane we Solomoni kyabazinga wa Isiraeli.

Omulimo gw'Abalevi

² Agho kyabazinga Daudi yaayeta abakulembeze boonaboona mu Isiraeli, ni bakabona, n'abalevi, beesoloza.

³ Yaabala abasaadha Abalevi boonaboona ab'emyaka amakumi asatu n'okusingagho, baaghera emitwalo esatu na kanaana (38,000).

⁴ Ku abo yaatoolaku emitwalo ebiri n'enkumi ina (24,000), yaabagha gwa kukolanga mu isinzizo lya Musengwa Katonda; akakaaga (6,000) yaabagha gwa kukulira banaibwe na kubalamula

⁵ enkumi eina yaabagha gwa kuba bakuumi ba miryango ate enkumi eina (4,000) abandi yaabagha gwa kusaakanga Musengwa Katonda nga bakozesa ebivuga kyabazinga bye yataagho olw'omulimo ogwo.

⁶ Daudi yaagaba mu Balevi ebikunsu bisatu, nga batabane ba Levi bwe baali: Gereshoni, Kohathi, ni Merari.

⁷ Gereshoni yazaala Ladani ni Shimei.

⁸ Ladani yaazaala abaana abalenzi basatu: Yehieli nga n'omukulu, yaazaala ni Zethamu, ni Yoeli.

⁹ Shimei yaazaala abaana abalenzi basatu: Shelomothi, Hazieli, ni Harani. Abo n'abaali abakulu ab'enda edhaasimuka mu Ladani.

¹⁰ Shimei yaazaala Yahathi, ni Zina, ni Yeushi, ni Beria abo abana n'abaali batabane ba Shimei.

¹¹ Yahathi n'eyali omukulu, Ziza yairaku. Aye Yeushi ni Beria tibaazaala baana bangi, kyebava babalibwa ng'enda endala.

¹² Kohathi yaazaala Amuramu, Izahara, Heburoni, ni Uzzieli.

¹³ Amuramu yaazaala Aaroni ni Musa. Aaroni yaayawulibwa n'ab'oku nda ye okulabiriranga ebintu ebitukuvu ebyanda n'ebyanda, okuniokezanga obubbaani mu maiso ga Musengwa Katonda n'okumugheerezanga, n'okusabiranga abantu enkabi mu liina lye.

¹⁴ Aye abaana ba Musa omuntu wa Katonda, baababalira mu Balevi.

¹⁵ Musa oyo yazaala Gereshomu ni Eliezeri.

¹⁶ Omukulu mu baana ba Gereshomu yali Shebueli.

¹⁷ Eliezeri yazaala omwana mulala yenka, nga ni Rehabia. Aye Rehabia oyo yaazaala abaana kamaala.

¹⁸ Mu baana ba Izahara, Shelomithi n'eyali omukulu.

¹⁹ Mu baana ba Heburoni, Yeria n'eyali omukulu, kwairaku Amaria, kwairaku Yahazieli, ate ku oyo kwairaku Yekameamu.

²⁰ Uzzieli yaazaala Mika, nga n'omukulu, ate Issihia yairaku.

²¹ Merari yaazaala Mahuli ni Mushi. Mahuli yaazaala Eleazari ni Kishi.

²² Eleazari yaafa nga tazaireeku mwana mulenzi okutoolaku abaghala abeereere. Abaghala abo baafumbirwa baanhinaibwe, batabane ba Kishi eyali muganda wa iseibwe.

²³ Mushi yaazaala abaana abalenzi basatu: Mahuli, Ederi, ni Yeremothi.

²⁴ Abo n'ab'omu kika kya Levi ng'enda dhaibwe bwe dhaali, era nga n'abaali abakulu b'enda edho. Enda edho n'edhaavaamu abasaadha abaaba nga bagheziiza emyaka amakumi abiri n'okusingagho, abaabalibwa ni baghandiikibwa, nga n'ab'okukolanga omulimo ogw'okugheereza mu isinzizo lya Musengwa Katonda.

²⁵ Daudi yaakoba ati: “Musengwa Katonda wa Isiraeli aghaire abantu be emiraala, era ni mwene yeena aidha kubanga mu Yerusalemu ebyanda n'ebyanda.

²⁶ Kale ni Abalevi tikikaabeetaagisa kubbeeda Weema ya Musengwa Katonda n'ebintu eby'okukozesa mu Weema eyo.”

²⁷ Olw'ebyo Daudi bye yasembyayo okusikirira abantu, Abalevi abaaba nga bagheziiza emyaka amakumi abiri n'okusingagho bonka, n'abaaghandiikibwanga okukolanga

²⁸ emirimo egy'okubeerangaku bakabona ab'oku lulyo lw'Aaroni, mu byonabyona ebigema ku kugheereza mu isinzizo lya Musengwa Katonda, era nga ni gino:

²⁹ okulabiriranga ebigema ku migaati egigheebwayo eri Musengwa Katonda, obuwunga bwe baakozesanga mu kigheebwayo eky'emere ey'empeke, emigaati emitono egitazimbulukusiibwa, ebigheebwayo ebifumbibwa, n'ebigheebwayo eby'obuwunga obutabwirwamu omuzigo ogw'ebibala by'emiti emyoliva. Era n'okupimanga obungi, n'obuzito, n'obunene obw'ebigheebwayo mu isinzizo.

³⁰ Abalevi abo nga bali n'okwebazanga Musengwa Katonda n'okumusaakanga buli nkyo n'eigulo,

³¹ n'okughangayo eri Musengwa Katonda oyo ebigheebwayo ebyokebwa, ku Sabbato, ni ku buli Kibinuko eky'Okuboneka kw'Omwezi, era ni ku nnaku edhindi edhaateebwagho. Ebyo byonabyona nga bali n'okubikolanga mu maiso ga Musengwa Katonda aghazira kwosaamu naire, era nga bajiira ku mughendo ogulagirwa.

³² Era baagheebwa ogw'okulabiriranga Eweema ey'Okwagaananirangamu ni Musengwa Katonda, n'Ekifo Ekitukuvu, nga babeeraku baganda baibwe bakabona ab'olulyo lwa Aaroni okugheerezanga mu isinzizo lya Musengwa Katonda.