1 Ebyomubyanda 22 - Baibuli Ekibono kya Katonda 2014

¹ Kale Daudi yaakoba ati: “Ghano n'aghaidha okubanga eisinzizo lya Musengwa Katonda waife, era ghano n'aghaidha okubanga alutaari Abaisiraeli ye banaagheerangaku ebigheebwayo ebyokebwa.”

Okutegeka okuzimba eisinzizo

² Agho Daudi yaalagira okusoloza abasenze boonaboona abaali mu nsi Isiraeli. Yaalonda ab'okusiguukulula amabaale n'okugabaadha, nga ga kuzimbisa eisinzizo lya Katonda.

³ Yaataagho ekyuma ekigumu einho mu bungi, nga kya kugheesaamu misumaali n'obubaati, eby'okukola ku ndhigi edhiigala emiryango eminene. Yaataagho n'ekyuma eky'ekikomo mu bungi, ekitasoboka na kupimika.

⁴ Yaataagho n'embaawo edh'emiti emivule kamaala inho edhitasoboka kubalika, abantu b'e Sidoni n'ab'e Tiro dhe baamuleetera.

⁵ Daudi yaakoba mule ati: “Eisinzizo lye baja okuzimbira Musengwa Katonda ligwaine okuba nga lya kitiisa inho era nga limanhikaine mu nsi yoonayoona. Aye Solomoni aja okulizimba akaali mwana muto, azira bumanhirivu naire. Kyenva ndi n'okutaagho eby'okulizimbisa.” Kale Daudi yaataagho eby'okuzimbisa kamaala inho ng'akaali kufa.

⁶ Agho yaayeta mutabane we Solomoni, yaamusikirira okuzimbira Musengwa Katonda, Katonda wa Isiraeli eisinzizo.

⁷ Daudi yaakoba Solomoni oyo ati: “Mwana wange, nayenda inho okuzimbira Musengwa Katonda wange eisinzizo okumugheesa ekitiisa.

⁸ Aye Musengwa Katonda yandobera ng'akoba ati, ‘Walwana entalo kamaala, waita abantu kamaala inho. Kale olw'omusaayi omungi gwe wayugha nga mbona, toidha kunzimbira isinzizo.

⁹ Aye olizaala omwana mulenzi yaaba muntu wa miraala, kuba ndimugha emiraala yaaloba kulumbibwa bazigu be ku ndhuyi dhoonadhoona. Olimutuuma eriina Solomoni, kuba mu bufuzi bwe ndigha ensi Isiraeli okuba emiraala n'okutebenkera.

¹⁰ Oyo n'alinzimbira eisinzizo okumpeesa ekitiisa. Aliba mwana wange, ate nze naaba lata we. Era ndireetera ekityamo kye eky'obwakyabazinga okukakata mu Isiraeli ebyanda n'ebyanda.’ ”

¹¹ Daudi yaayongera okukoba ati: “Kale ni mwana wange, nsaba Musengwa Katonda wo abenga n'iwe, akughe enkabi oghange okumuzimbira eisinzizo nga bwe yakusuubiza.

¹² Era nsaba inho Musengwa Katonda wo akughenga amagezi n'okutegeera, oghange okufuganga Isiraeli ng'ojiira ku Mateeka ge.

¹³ Bw'onaagonderanga Amateeka n'ebiragiro Musengwa Katonda bye yagha Isiraeli ng'abita mu Musa, ebintu byonabyona biidha kukujiiranga bukalamu. Guma omwoyo, otatya, era otawaamu maani.

¹⁴ Nze ku lwange mu bukaluubirivu obungi, nkoze kyonakyona ekisoboka, naateeragho eisinzizo talanta edha zaabu edhighera emitwalo eikumi (100,000) ni talanta edha feeza edhighera akakaire akalamba (1,000,000) n'ekyuma eky'ekikomo, taaku n'ekyuma ekigumu einho, ebitasoboka kupimika olw'obungi bwabyo. Era naataagho n'emiti, n'amabaale. Weena okwo kw'obe oyongereze ebindi.

¹⁵ Era oli n'abakozi kamaala: ababaadhi ab'amabaale n'abo abagazimbisa, n'ababaadhi ab'emiti, n'abagheesi kamaala abaghanga okugheesa ebintu

¹⁶ mu zaabu, ni mu feeza, ni mu kyuma eky'ekikomo, era ni mu kyuma ekigumu einho. Situkiramu otoolere omulimo. Nsaba Musengwa Katonda abenga n'iwe.”

¹⁷ Daudi yaalagira abakulembeze boonaboona aba Isiraeli okubeeraku Solomoni omulimo ogwo.

¹⁸ Yaakoba ati: “Musengwa Katonda waimwe ali ghalala n'imwe, era abaghaire emiraala ku ndhuyi dhoonadhoona. Yansobozesa okughangula abantu abaabanga mu nsi eno, era mpegaano bagondera Musengwa Katonda n'imwe abantu be.

¹⁹ Kale ni, mperaano mugheerezenga Musengwa Katonda waimwe n'omutima gwaimwe era n'omwoyo gwaimwe gwonagwona. Musitukiremu, mutoolere okuzimba eisinzizo, musobole okutaamu Esanduuku y'Endagaano ya Musengwa Katonda, n'ebintu ebindi byonabyona ebitukuvu eby'okukozesa, bibenga mu isinzizo lyemuja okuzimba okumugheesa ekitiisa.”