1 Ebyomubyanda 21 - Baibuli Ekibono kya Katonda 2014

Daudi abala abantu

¹ Agho Sitaani yaasituka okuleeta akabi ku Isiraeli, yaasendasenda Daudi okubala Abaisiraeli.

² Kale Kyabazinga Daudi yaalagira Yoabu n'abaduumizi abandi ab'eigye, be yali nabo ati: “Muje mu Isiraeli mwonamwona, okuva e Dani okutuuka e Beerisheba, mubale abantu mmanhe omughendo gwaibwe.”

³ Yoabu yaamukoba ati: “Musengwa Katonda wo agwananga yaayongera ku bungi obw'abantu ba Isiraeli emikuzi kikumi okusinga bwe bali. Isebantu kyabazinga, abo boonaboona mbona bantu bo era bagheereza mulala iwe. Aye musengwa wange kyabazinga, lwaki oyenda okukola ekintu ekyo ekinaaleeta ku Isiraeli yoonayoona omusango?”

⁴ Aye ekiragiro kya kyabazinga kyasinza Yoabu amaani. Kale Yoabu oyo yaaja ng'abitabita mu Isiraeli mwonamwona ng'abala abantu, olwo yaamala yaira e Yerusalemu.

⁵ Yoabu yaatwalira kyabazinga Daudi omughendo ogw'abantu be baabala: mu Isiraeli mwonamwona mwalimu abasaadha abasobola okulwana entalo akakaire kalala n'emitwalo ikumi (1,100,000), ate mu Buyudaaya mwabaamu emitwalo amakumi ana na musanvu (470,000).

⁶ Aye olw'okuba Yoabu tiyasiima kiragiro kya kyabazinga, ab'omu kika ekya Levi n'ekya Benjamini tiyababala.

⁷ Katonda yaasungughala olw'ekyo ekyakolebwa, kyeyava n'abonereza Isiraeli.

⁸ Daudi yaasaba Katonda ati: “Wo Musengwa Katonda nhonoine inho olw'ekyo kye nkoze. Era nkweghembye ntoolaaku ekibi ekyo nze omugheereza wo, kuba nkoze kya busiru inho.”

⁹ Agho Musengwa Katonda yaakoba Gadi omulanzi eyaghanga Daudi ku magezi, ati:

¹⁰ “Ja okobe Daudi oti Musengwa Katonda akoba ati, ‘Ndi kukugha ebintu bisatu, olondeku kirala kye mbe nkukole.’ ”

¹¹ Kale Gadi yaaja ye Daudi yaamukoba ati: “Musengwa Katonda akoba ati, ‘Ku bino olondaku kiri gha?

¹² Endhala okugwa mu nsi okumala emyaka esatu? Oba iwe okumala emyezi esatu ng'olumukanga abazigu bo abakuyiigania? Oba okumala enaku eisatu nga Musengwa Katonda ali kukugoyagoya, asindike ekibamba okwidha mu nsi yo ng'akozesa malaika we, okuja ng'aita abantu mu Isiraeli yoonayoona? Buti dhuubiriza osalegho kye mbe ndhiremu oyo antumye.’ ”

¹³ Agho Daudi yaakoba Gadi ati: “Enaku engemye inho naasoberwa. Aye ekisinga leka Katonda ali n'ekivunika ekyodo ambonereze mwene, mu kifo eky'okubonerezebwa abantu obuntu.”

¹⁴ Kale Musengwa Katonda yasindika ku Isiraeli ekibamba, mwafaamu abantu emitwalo musanvu (70,000).

¹⁵ Agho Katonda oyo yaatuma malaika e Yerusalemu okukizikiriza. Aye Malaika oyo bwe yagolola omukono gwe okukizikiriza, Musengwa Katonda oyo yaakyusa ekirowoozo kye eky'okukola akabi. Kale yaakoba oyo azikiriza ati: “Ekyo kinaamala. Lekera agho!” Agho malaika yali atuuse mu kifo aghakubirwa engaano ekya Orunani Omuyebusi.

¹⁶ Daudi yaja okulinga ati, ng'abona malaika wa Musengwa Katonda ayemereire ghagati gh'ensi n'eigulu, ng'asowoire empiima mu kiruutu kyayo yaagigema mu ngalo, era yaagigololera ku Yerusalemu. Agho Daudi n'abakulembeze b'abantu, baakuba amakiryaivu era baakutama n'ebyeni byatuuka ku itaka, nga bavaire ekutiya olw'okunakughala.

¹⁷ Agho Daudi yaakoba Katonda ati: “Ninze nalagira okubala abantu. Ninze eyayonoona, naakola ekibi einho. Aye abantu bano abali ng'oti ntaama butaama bakoze ki? Kyenva ni nkusaba, iwe Musengwa Katonda wange, omukono gwo gukube nze n'ab'endhu ya lata wange. Otaganha kibamba kugwira bantu bo.”

¹⁸ Agho malaika wa Musengwa Katonda yaalagira Gadi okukoba Daudi, aje mu kifo aghakubirwa engaano ekya Orunani Omuyebusi, azimbireyo Musengwa Katonda alutaari.

¹⁹ Kale Daudi yaaja ng'ajiira ku kiragiro kya Musengwa Katonda Gadi kye yamukobera.

²⁰ Mu kiseera ekyo Orunani yali ng'ali mu kifo aghakubirwa engaano ni batabane be abana, ng'ali kukuba engaano. Olwakyuka ati, yaabona malaika, era batabane be beegisa.

²¹ Orunani bwe yalengera kyabazinga Daudi ng'ali kwidha y'ali, yaava mu kifo aghakubirwa engaano, yaaja y'ali, yaakuba amakiryaivu era yaakutama n'ekyeni kyatuuka ku itaka.

²² Daudi yaamukoba ati: “Nguza ekifo kyo aghakubirwa engaano, nkisasule omughendo gwene ogukijaamu, nzimbiregho Musengwa Katonda alutaari olwo atoole ku bantu ekibamba.”

²³ Orunani yaakoba kyabazinga ati: “Isebantu kyabazinga, ekifo kitwale okikozese kyonakyona ky'oyenda. N'ente dhiidho ndhikughaire dhibe ekigheebwayo ekyokebwa, n'ekiti ekibairenga kikozesebwa okumulungula engaano kiikyo kikozese ng'enku, ate engaano ebe ekigheebwayo eky'emere ey'empeke.”

²⁴ Aye kyabazinga Daudi yaakoba Orunani ati: “Busa, ndidha kubigula bugule n'omughendo gwene ogubijaamu. Tiidha kutoola kintu kikyo kukigha Musengwa Katonda, waire okughaayo ekigheebwayo ekyokebwa eri Musengwa Katonda wange kye ntaguze na mughendo kuva mu nsawo yange.”

²⁵ Kale Daudi yaagula ekifo ekyo ebitundu lukaaga ebya zaabu.

²⁶ Era yaazimbira agho Musengwa Katonda alutaari yaaghaayo ebigheebwayo ebyokebwa n'ebigheebwayo olw'okutabagana. Yaasaba Musengwa Katonda, era Musengwa Katonda oyo yaamwiramu ng'asindika omuliro ku alutaari nga guva mu igulu.

²⁷ Agho Musengwa Katonda yaalagira malaika okwiza empiima mu kiruutu kyayo.

²⁸ Daudi bwe yabona nga Musengwa Katonda amughaire ky'amusabye ng'ali mu kifo ekyo aghakubirwa engaano, yeeyongera okughangayo emisengo mu kifo ekyo.

²⁹ Mu kiseera ekyo Weema ey'Okwagaananirangamu ni Musengwa Katonda Musa ye yakolera mu irungu, ni alutaari ye baayokerangaku emisengo, byali bikaali mu kifo ekigulumivu eky'okusinzizaamu e Gibeoni.

³⁰ Aye Daudi nga tasobola kujaayo kwebuuza ku Katonda, kuba yali atya empiima ya malaika wa Katonda oyo.