1 Ebyomubyanda 20 - Baibuli Ekibono kya Katonda 2014

Daudi agema ekibuga Rabba

¹ Agho omwaka nga gutoolera, mu kiseera bakyabazinga kye bajiiramu okulwana entalo, Yoabu yaakulembera eigye yaalumba ensi eya Abammoni. Yaazingiza ekibuga Rabba era yaakizikiriza. Aye kyabazinga Daudi yaasigala e Yerusalemu.

² Daudi oyo yaatoola engule ku mutwe gwa kyabazinga waibwe yaagita ku mutwe gwe. Engule eyo yali ya zaabu n'amabaale ag'omughendo einho, ng'ezitogha kilo ng'oti amakumi asatu na ina. Daudi oyo era yaanhaga ebintu kamaala inho mu kibuga ekyo.

³ Era yaatwala n'abantu abaali mu kibuga omwo, yaabakozesanga emirimo nga bakozesa emisumeeni, ensuuluulu, n'empasa. Era atyo bwe yakola abantu boonaboona abaali mu bibuga eby'Abammoni byonabyona. Agho Daudi n'abantu be boonaboona bairayo e Yerusalemu.

Abaisiraeli balwana entalo n'Abafilisiti abawaigufu

⁴ Ebyo nga biwoire, ghaabaagho olutalo e Gezeri ghagati gh'Abaisiraeli n'Abafilisiti. Sibbekai ow'e Husha yaita Sippai, ow'oku lulyo olw'abantu abawaigufu. Abafilisiti baaghangulwa.

⁵ Kabiri ghaabalukagho olutalo olundi n'Abafilisiti. Elihanani mutabane wa Yairi yaita Lahimi muganda wa Goliathi Omugitti, eyali n'eifumo eryali n'olunhago olunene, olwaga n'ekiti kye balukisa engoye.

⁶ Kabiri era yaabaayo olutalo e Gathi omwali omusaadha omukologho, ng'ali n'engalo mukaaga ku buli mukono n'obugere mukaaga ku buli kigere byonabyona aghalala n'amakumi abiri n'ebina (24). Yeena yali wa ku lulyo olw'abantu abawaigufu.

⁷ Oyo bwe yayeeyereza Abaisiraeli, Yonathani mutabane wa Shimea muganda wa Daudi, yaamwita.

⁸ Abo abasatu baali ba ku lulyo olw'abantu abawaigufu abaali e Gathi, era Daudi n'abasaadha be n'abaabaita.