1 Ebyomubyanda 17 - Baibuli Ekibono kya Katonda 2014

Nathani atwalira Daudi obukwenda

¹ Agho kyabazinga Daudi ng'amaze okutyama mu miraala mu kisaagaati kye eky'obwakyabazinga, yaakoba Nathani omulanzi ati: “Bona eno, nze nsula mu ndhu eyazimbwa n'emiti emivule, aye Esanduuku ya Musengwa Katonda yaaba bwa mu weema!”

² Nathani yaamwiramu ati: “Ja okole byonabyona ebikuli ku mwoyo, kuba Katonda ali n'iwe.”

³ Aye obwire bwene obwo Musengwa Katonda yaakoba Nathani ati:

⁴ “Ja okobe omugheereza wange Daudi oti Musengwa Katonda akoba ati, ‘Ti niiwe oja okunzimbira endhu ey'okubangamu.

⁵ Tibangaku mu ndhu okuviira irala ku lunaku lwe natoola Abaisiraeli e Misiri okutuusa ni ye buli eno. Buli ghe mbairenga nja, nga mba mu weema.

⁶ Mu bifo byonabyona bye mbairenga njaamu nga ndi n'Abaisiraeli boonaboona, ghaligho ye nkobangaku waire omulala ati ku bakulembeze be nataagho okulabiriranga abantu bange Abaisiraeli, nti lwaki timunzimbira ndhu ya miti mivule?’

⁷ “Kale ni oidha kukoba omugheereza wange Daudi oti nze Musengwa Katonda Afuga Amagye nkoba nti, ‘Nakutoola ku gw'okwayanga entaama mu byayiro, naakufuula omukulembeze ow'abantu bange Abaisiraeli.

⁸ Naabanga ghalala niiwe buli ye wajanga, naasaaniangagho abazigu bo ng'oli kumpi okutuukayo. Era ndidha kukufuula mukologho obe ng'oti n'abantu abakologho ab'oku nsi.

⁹ Ntegekeire abantu bange Abaisiraeli ekifo, mbate omwo babenga mu kifo ekyo nga kyaibwe ku bwaibwe, ghalobe kubaagho ekibatabula kabiri. Abantu ababi tibaja kwirayo kubadaazadaaza, nga bwe baakolanga eira

¹⁰ mu biseera bye nateeragho abalamuzi abaakulemberanga abantu bange Abaisiraeli. Ndidha kukuwonianga okulumbibwa abazigu bo boonaboona. N'ekindi, nze Musengwa Katonda nkukoba nti ndikwaliza abaana n'abaidhukulu.

¹¹ Enaku dho bwe dhiriwaaku n'ofa, n'oja okweyimba ku badhaadha bo abaafa, ndikusikiza owundi ku baana bo beene be weezaalira, naamutaagho okuba kyabazinga era naaleetera obwakyabazinga bwe okukakata.

¹² Oyo n'alinzimbira endhu, era ndireetera obwakyabazinga bwe okukakata ebyanda n'ebyanda.

¹³ Nze ndiba lata we ate mwene yaaba mwana wange, era tija kukomya kumugonzanga, nga bwe nakomya okugonza Saulo, ye natoolagho memale iwe oiregho.

¹⁴ Ndidha kumutaagho alabirirenga abantu bange n'obwakyabazinga bwange, era ndeeterenga n'obwakyabazinga bwe okukakata ebyanda n'ebyanda.’ ”

¹⁵ Kale Nathani yaakobera Daudi byonabyona nga Musengwa Katonda bwe yabimukoba, era nga bwe yabimwoleka.

Esaala ya Daudi ey'okwebaza

¹⁶ Agho kyabazinga Daudi yangira mu Weema, yaatyama mu maiso ga Musengwa Katonda, yaakoba ati: “Wo Musengwa Katonda wange, katyo nze ninze ani era n'ab'endhu yange ni baani, iwe okutukolera ebyo byonabyona by'otukoleire?

¹⁷ Ate nga ekyo kyali kintu kitono inho ku iwe Katonda wange, kuba era osuubiiza bingi ku izaire lyange mu biseera eby'omu maiso. Era ebyo, iwe Musengwa Katonda wange obyoleike nze omuntu obuntu naabimanha.

¹⁸ Ate kiki ekindi nze Daudi kye nnaayongera okukukoba? Iwe Musengwa Katonda wange ondidhi bukalamu nze omugheereza wo.

¹⁹ Olw'okwenda kwo waleetera ebintu bino byonabyona ebikologho okubaagho, ng'oyenda nze omugheereza wo mbimanhe.

²⁰ Wo Musengwa Katonda wange, bwenebwene tituwulirangaku wundi ali ng'oti niiwe. Niiwe Katonda wenka, ezira wundi.

²¹ Kale ighanga ki erindi ku nsi, eriri ng'oti n'ery'abantu bo Abaisiraeli iwe Katonda be waja n'onunula babe abantu bo? Waabakolera ebintu ebikologho era ebitiisa, ebyaleetera eriina lyo okumanhika mu nsi yoonayoona, waabingayo abamaghanga agandi mu biketezo bye baalimu, ng'abantu bo be wanunula e Misiri bali kumpi okutuukayo.

²² Wataagho Abaisiraeli babenga bantu bo ebyanda n'ebyanda, ate iwe Musengwa Katonda waafuuka Katonda waibwe.

²³ “Wo Musengwa Katonda wange, mperaano ni kuumanga ekyo ky'osuubiiza nze omugheereza wo n'ab'endhu yange era okituukirizenga ebyanda n'ebyanda.

²⁴ Oidha kubanga mukologho ebyanda n'ebyanda, abantu bakwogerengaku bati, ‘Musengwa Katonda Afuga Amagye oyo, ni Katonda wa Isiraeli.’ Era nkweghemba okuumenga ab'endhu yange nze omugheereza wo Daudi.

²⁵ Wo Katonda wange, nze omugheereza wo ngumye naakusaba ebintu ebyo, olw'ebyo by'ondholeike ng'okoba oti, olinsikiza abaana n'abaidhukulu abange ku bwakyabazinga bwange.

²⁶ Wo Musengwa Katonda wange, niiwe Katonda, otuukiriza buli ky'okoba, era niiwe osuubiiza nze omugheereza wo ebintu ebyo ebirungi.

²⁷ Era mpegaano siima okugha enkabi ab'endhu yange nze omugheereza wo, beeyongerenga okuba abagonzi y'oli enaku dhoonadhoona, kuba iwe Musengwa Katonda b'ogha enkabi, baba ba nkabi ebyanda n'ebyanda.”