1 Ebyomubyanda 16 - Baibuli Ekibono kya Katonda 2014

¹ Baaleeta Esanduuku ya Katonda baagita mu kifo kyayo, mu Weema Daudi ye yagisimbiragho. Olwo baaghaayo eri Musengwa Katonda ebigheebwayo ebyokebwa, n'ebigheebwayo olw'okutabagana.

² Daudi bwe yamala okughaayo ebigheebwayo ebyo, yaasabira abantu enkabi mu liina lya Musengwa Katonda,

³ era yaagabula abantu boonaboona: buli muntu, k'abe musaadha oba mukazi, yaamugha omugaati, n'ekinofu eky'emamba, n'ekitole eky'ebibala eby'emizabbibu ebikalu.

⁴ Daudi yaataagho abandi ku Balevi okugheerezanga mu maiso g'Esanduuku ya Musengwa Katonda nga basaba, beebaza, era baasaaka Musengwa Katonda, oyo Katonda wa Isiraeli.

⁵ Asafu ye baataagho okuba omukulu, Zekaria nga n'amwiririra. Ate bano baabataagho okukubanga entongooli n'endingidi: Yeiyeli, Shemiramothi, Yehieli, Mattithia, Eliabu, Benaia, Obededomu, ni Yeiyeli owundi. Asafu n'eyakubanga ebide,

⁶ ate bakabona babiri, Benaia ni Yahazieli, nga ba kufuuwanga buliidho amagwala mu maiso g'Esanduuku y'Endagaano ya Katonda.

⁷ Ku lunaku olwo Daudi lwe yasooka okutaagho Asafu oyo ni Balevi baine abo, okwebazanga Musengwa Katonda nga bamwembera.

Olwembo olw'okusaaka

⁸ Mwenamwena musiime Musengwa Katonda, musaake eriina lye, mumanhise amaghanga agandi ebyo bye yakola.

⁹ Mumwembere, nga mwemba enhembo edhimusaaka, era nga mukobera abantu ebyewuunhisa byonabyona bye yakola.

¹⁰ Muwulire okwesiima olw'eriina lye eitukuvu; abo abasinza Musengwa Katonda ka basagambe.

¹¹ Musabe Musengwa Katonda ababeerenga, mumusinzenga nga muli gh'ali ekiseera kyonakyona.

¹² Muteerabiranga ebyewuunhio n'eby'amaani bye yakola, era n'ensala ye yasalamu emisango,

¹³ ku lwaimwe abaana ba Isiraeli omugheereza we, era baidhukulu ba Yakobo oyo ye yeerondera.

¹⁴ Oyo ni Musengwa Katonda waife, ebiragiro bye bikola mu nsi yoonayoona.

¹⁵ Akuuma endagaano ye ebyanda n'ebyanda, yaagumira ku kibono kye yasuubiza ni bweghabitagho ense olukumi (1,000).

¹⁶ Akuuma endagaano ye yakola ni Aburahamu, n'ekisuubizo kye yasuubiza Isaaka nga yeerayirira.

¹⁷ Endagaano eyo yagikola n'omugheereza we Yakobo, yaagitaagho ng'eiteeka era ng'endagaano n'Abaisiraeli etaliwaagho,

¹⁸ ng'akoba ati: “Ndikugha ensi Kanaani, yaaba yaimwe ku bwaimwe.”

¹⁹ Abantu ba Katonda baali bakaali batono abazira ghe baaga, era nga basenze mu nsi eyo.

²⁰ Baatambulatambulanga eyo batyo, baava mu nsi eyindi kabiri baaja mu yindi; baava mu bwakyabazinga obundi baaja mu bundi.

²¹ Aye Katonda tiyaganha muntu yeenayeena kubatuntuza; ku lwaibwe yakaabukira bakyabazinga,

²² ng'abakoba ati: “Ghatabaagho agema ku bantu bange be nasiiga omuzigo, abalanzi bange abo mutabakola kibi kyonakyona.”

²³ Mwembere Musengwa Katonda imwe ensi dhoonadhoona, era mukoberenga abantu buli kaakyeire nga bwe yatulokola.

²⁴ Mumanhise ensi dhoonadhoona nga Musengwa Katonda bw'ali ow'ekitiisa, era mumanhise abantu boonaboona nga bw'akola ebyewuunhisa.

²⁵ Musengwa Katonda mukologho era agwaine okusinzibwa einho. Oyo n'ali n'okutiibwa okusinga ebyo byonabyona ebyetebwa bakatonda.

²⁶ Emisambwa gyonagyona abantu gye basinza, bifaananie bufaananie. Aye Musengwa Katonda n'eyakola eigulu.

²⁷ Aidhwire ekitiisa era mufuzi, mu kifo kye mwidhwire ebyoleka nga wa maani era nga musangaavu.

²⁸ Imwe abantu ab'ensi dhoonadhoona musaake Musengwa Katonda, mwatule nga Musengwa Katonda bw'ali ow'ekitiisa era ow'obukumu.

²⁹ Mughe eriina lya Musengwa Katonda ekitiisa ekirigwaniire; mwidhe mu maiso ge era mumuleetere ebigheebwayo. Musinze Musengwa Katonda mu butukuvu bwe,

³⁰ imwe mwenamwena ab'oku nsi mudhugumire mu maiso ge. Yii, ensi ngumu mu kifo kyayo gh'eri, era ghazira kighanga kugisegenhia naire.

³¹ Eigulu ka lisangaale n'ensi esagambe, era abantu bakobe mu nsi dhoonadhoona bati: “Musengwa Katonda ni kyabazinga!”

³² Enhandha k'ewolomboke n'ebigirimu byonabyona olw'eisanhu. Enimiro n'ebidhirimu byonabyona bisangaale.

³³ Memale olwo emiti gyonagyona egy'omu kibira gyembe n'eisanhu mu maiso ga Musengwa Katonda, kuba ali kwidha okusalira ensi omusango.

³⁴ Kale ni mwenamwena musiime Musengwa Katonda kuba mulungi, era okugonza kwe tikukoma, kubaagho byanda na byanda.

³⁵ Era musabe Musengwa Katonda oyo muti: “Wo Katonda Omulokozi waife tuwonie, era otusoloze okuva eyo mu maghanga ye twasansaanira. Olwo tukusiimenga olw'eriina lyo eitukuvu, era tukusaakenga olw'ekitiisa kyo.”

³⁶ Musengwa Katonda, Katonda wa Isiraeli asaakibwe! Asaakibwe buti, era asaakibwenga ebyanda n'ebyanda. Agho abantu boonaboona bakoba bati: “Amiina!” Era baasaaka Musengwa Katonda.

Okusinza e Yerusalemu n'e Gibeoni

³⁷ Kale kyabazinga Daudi yaataagho Asafu ni Balevi baine, bakulirenga eby'okusinza, nga bwe kyali kyetaagisa buli lunaku, agho mu maiso ag'Esanduuku y'Endagaano ya Musengwa Katonda.

³⁸ Yaataagho ni Obededomu mutabane wa Yeduthuni, ni Hosa, ghalala ni balevi banaibwe nkaaga na munaana nga bombi abo, Obededomu ni Hosa, n'abakulira abakuumi b'emiryango.

³⁹ Yaataagho Zadoki kabona ni bakabona baine bakulirenga eby'okusinza mu kifo ekigulumivu eky'okusinzizaamu ekyali e Gibeoni.

⁴⁰ Buli nkyo n'eigulo nga bali n'okughaayo eri Musengwa Katonda ku alutaari ebigheebwayo ebyokebwa, nga bajiira ku ebyo byonabyona ebyaghandiikibwa mu Mateeka ga Musengwa Katonda, ge yagha eighanga lya Isiraeli.

⁴¹ Aghalala n'abo, yaataagho Hemani, ni Yeduthuni, n'abandi boonaboona abaalondebwa okwebazanga Musengwa Katonda, kuba okugonza kwe tikukoma, kubaagho byanda na byanda.

⁴² Hemani ni Yeduthuni era n'abaakuumanga amagwala, n'ebide, n'ebivuga ebindi byonabyona bye baakubanga okwembera Katonda. Ate batabane ba Yeduthuni yaabata ku gw'okukuumanga emiryango.

⁴³ Agho abantu baagolola, buli muntu ewuwe. Ni Daudi yeena yairayo eka okuba n'ab'omu ndhu ye.